حظك اليوم ؟؟؟

**| **Alyaa** ●** · 07-02-2009 11:13 AM

عجيب امر المصريين وبالاخص المسلمين ..لما واحد يشتري الجرنان عشان اول حاجه يفتحها وبقراها هو حظه اليوم ..ويبقي نفسه اوي يالاقي ف حظه اليوم اللي بيتمناه..يعني مثلا لو واحد نفسه يبقي غني..يبقي نفسه يلاقي حظه يقوله انه هيكسب فلوس ..والواحده اللي مبتخلفش عايزه تلعرف المولد اسمه ايه ...ورجل الاعمال بيعرف هيخسر امتي ف البورصه ..وطالب الثانوي..بيعرف مجموعه...ومحدود الدخل بيعرف سعر رغيف العيش كم....وبعد كده نلاقي الناس بتهاجم الدجالين ويقبضوا عليهم زي مثلا الشيخ الدجال حجاب كستور..اللي بسحره وشعوذته وجبروته ..خلا الرجاله تولد ..وبالتوأم كمان

طب ايه الفرق بين الدجال وبين حظك اليوم اللي ف الرجايد..مالنتيجه واحده ...ولا الشيخ حجاب بيتعامل مع جن معارضه ...والجرايد بتتعامل مع جن حزب وطني

مش بس كده ده كمان بقي فيه برامج في كل القنوات..يقولك حظك وبرجك..والموضع بقي دراسه فلكيه...وبرج الطور مش بيحب الخس..وبرج الميزان..علي طول حرامي..وبرج الاسد..علي طول غضبان ..طب بقي طالما كله بيفتي واكل عايز تهجيص يبقي انا كمان اهجص
************************************************** *******

الابراج المصريه

للجهلاء والفاضيين فقط

برج الحمل [21(أذار-مارس-شوال) - 20(نيسان-أبريل-ذو القعدة)]

صباح الخير ياحمل ...لاداعي للتشاؤم ...فانت حمل وضيع ..ده انت مولود ف شهر مارس ياراجل ..يعني عيد الام ..يالا كل سنه وانت طيب,ومش تدايق من الناس اللي تقول عليك حمل..بوقلك ايه متروحش البيت انهارده ..العذراء بتخونك مع الجدي ..يالا ياحبيبي عايز حاجه ..سلام ..

برج الثور [21(نيسان-أبريل-ذو القعدة) - 20(أيار-مايو-ذو الحجة)]

صباح الخير ياثور.. مالك هايج كده ع الصبح ..مش تنرفز نفسك هقولك فزوره..ولا بلاش اقولك نكته انت ليسه هتفكر ..بص ياسيدي بيقولك مره واحد سأل واحدة قالها اسمك ايه؟ قالت لة : أسماء. قالها : يعني ما فيش اسم محدد !!...كركركركركركركر....استني مسدج من العذراء...يالا ياحبيبي عايز حاجه ..سلام ..

برج الجوزاء [21(أيار-مايو-ذو الحجة) - 21(حزيران-يونيو-محرم)]

ازيك ياعم جوزاء ..انت انهارده حظك جامد جدا علي فكره ..اه والله حتي بص تحت رجليك هتلاقي ربع جنيه...اي خدمه ..وكمان لو روحت البيت هتلاقي ماما عملالك قلقاس اللي بتحبه....متشربش لبن رايب كتير عشان الاسهال..واتغطي وانت نايم ...... هتقابل بكره موذه من الميزان.. يالا ياحبيبي عايز حاجه ..سلام ..

برج السرطان [22(حزيران-يونيو-محرم) - 22(تموز-يوليو-صفر)]

اعوذ بالله ..انا مش عارف اقول فيك ايه ..انت حظك باين ...ابعد يبني عني ربنا يخدك....سرطان في عينك ..ارحم الناس بقي مش تبقي رخم ...عفا الله عنا وعنكم ....ستدخل في صراع مع برج الاسد ....يالا ياحبيبي عايز حاجه ..سلام

برج الأسد [23(تموز-يوليو-صفر) - 22(آب-أغسطس-ربيع1)]

قشطه ..حبيبي ملك الغابه ...انسان الغاب طويل الناب...انت اليومين دول مش عجبني..ركز ف شغلك وخليك شجاع..وخد بالك انت داخل علي ايام سوده ..لو احتجت فلوس ..اوعي تستلف من حد ..اسرق.. ده انت الاسد ..يعني الشجاعه كلها....هيجيلك سرطان..قصدي هيجيلك واحد من برج السرطان .....يالا ياحبيبي عايز حاجه ..سلام

************************************************** *********

نعتذر عن استكمال باقي الابراج ..الخط قطع بيني وبين الناس اللي فوق...وتقريبا كده ..فيه مشاكل بين الميزان والعقرب..وبيقولوا الجدي السبب ... بس عموما انتوا ..زي الفل وهتعيشوا في سعاده وسلام والي مش لاقي ياكل هيلاقي فلوس تحت السرير..واللي حبيبته سبته هترجعله..واللي عايز ينجح هيبقي دكتور .....ومصر والسودان هيفتح فرع جنب بيتكوا..

======================================
اعرف مقدار حبك لحبيبتك....

أدخل الأسماء بالحروف الانجليزيه :- اصل الجن اللي معايا مش بيعرف عربي....ان شاء الله موصيين علي واحد من الشرابيه

انت ( sido )----------هيا ( Egypt)

النتيجة = 100%..........مبروك ياعبيط بتحبك ومش هتسيبك

ملحوظه :-
اذا كانت النسبة فوق 10% تعتبر جيدة

**| Nadooosh ●** · 07-02-2009 11:21 PM

ههههههههههههههههههههههههه ههههههههه

ههههههههههههههههههههههههه هههههههههههههههههه

ههههههههههههههههههههههههه ههههههههههههههههههههههههه ههه

يخرب عقلك يا علياء

بس والله عندك حق

والله شعب غلبان قوى وبيتضحك علية من اقل حاجة

شكرا يا قمر على التوبيك الجامد دة

**I'm Alive** · 08-02-2009 01:01 AM

ميرسى ليكى علياء على الموضوع

**● **TiTaNiC LoVeR** ●** · 08-02-2009 03:54 AM

**M_@lShReeF** · 09-02-2009 12:46 PM

مالك بينا بس يا علياء

**| Tears Of The Moon ●** · 10-02-2009 12:02 PM

واضح انك بجد بجد كارهة موضوع الأبراج ده يا علياء
علشان كدة عاوزة تخرجى مساوئه كلها
ههههههههههههههههههههه

ميرسى لموضوعك يا قمر
تقبلى تحياتى

**| Mannora ●** · 10-02-2009 09:04 PM

ههههههههههههههههه

بجد موضوع جامد وانا معاكى انه حاجه تافهه والللى فاضى هو اللى بيعملها
بس الناس فى الايام دى فى قمه الاحباط والكبت والهم الدنيا ملطشه على الاخر فبيخدوا شىء من التفاؤل من الابراج وده مش معناه انهم مؤمنين بيه بس اهى نقطه بيضاء فى وسط البحر الاسود
تقبلى مرورى ورأيى بس بجد موضوع لذيذ