"برمودا".... بادي "ستومك"... و"شبشب "مديحة""!

**Messi** · 20-02-2008 02:50 PM

"برمودا".. بادي "ستومك".. و"شبشب "مديحة""!

جامعة القاهرة- 1968
تدق ساعة الجامعة الشهيرة معلنة تمام الثالثة عصرا، يخرج د."أنور" من قاعة المحاضرات، وقد انتهى الوقت المخصص له، ويبدأ الطلاب في التزاحم حول الباب في نظام واضح ليخرجوا خلفه، "ليلى" هذه الطالبة الشطورة الناجحة، تقف محتضنة كشكول المحاضرات، وهي ترتدي ملابس "أنثوية" رقيقة تليق بـ"بنوتة".. جيب رمادي طويل واسع مربوط عليه حزام أسود عريض، وفوقه "بلوزة" بيضاء فضفاضة، وإلى جوارها يسير "أشرف".. مجدع ورجولة وشباب برضه.. يرتدي هو الآخر ملابس تليق بشاب جامعي.. بنطلون أزرق وقميص كاروه.. حاجة ظريفة يعني يميل على "ليلى" بابتسامة خفيفة وهو يقول:
"نهارك سعيد"!

تومئ هي برأسها وتبتسم بدورها ابتسامة خفيفة وهي ترد:
"نهارك سعيد"!

يخرجان من القاعة وهما يتناقشان فيما ورد في المحاضرة، وينتظران الأتوبيس معا لفترة، حتى يأتي الأتوبيس الذي تستقله "ليلى" إلى منزلها.. "باي باي" متبادلة.. تركب "ليلى" الأتوبيس.. وينتظر "أشرف" أتوبيسه حتى إذا ما أتى.. "تشعبط" في الرفرف ليوفر ثمن التذكرة!

***
جامعة القاهرة- 2008ينطلق صوت "هيفاء وهبي" من الموبايل وهي تغني "مش قادرة أستنى.. تيرارارا!" ليدوي في قاعة المحاضرات ،فينتبه د."أنور" لما جرى، ويحدد بدقة الجهة التي خرج منها الصوت، وبعد التهديد والوعيد، يعترف "أشرف" بأن التليفون تليفونه:
"معلش يا دكتور أصل كنت ضابط الموبايل يرن ع الساعة 3 الفجر عشان أصحى أذاكر فضرب الساعة 3 العصر.. سوري بجد!"
- "وظابطه على هيفاء وهبي ليه يا أستاذ"
- "ما هي الوحيدة اللي بأصحى لما أسمع صوتها يادكتور"!
تضج القاعة بالضحك، فيقرر د."أنور" إنهاء المحاضرة وهو مستاء، وقبل أن يخرج، يتزاحم الطلاب على باب القاعة في "فوضى" ويدفع كل واحد منهم هذا أو "هذه" من زملائه وهم يهتفون "مرواح مرواح"!، تميل "ليلى" على "أشرف"، لتتندر معه على ما حدث قبل أن تسأله:
"إيه رأيك بقى في الطقم الجديد بتاعي"؟

ينظر "أشرف" إلى ملابسها.. بنطلون برمودا ضيق، وتي شيرت قصير خفيف ذو فتحة كبيرة من أعلى وحزام ضخم غليظ يتدلى نصفه على الأرض.. يهتف :
"واو.. تحفة بجد.. شفتي بقى الطقم الجديد بتاعي".

تنظر "ليلى" إلى ملابسه.. بنظلون جنيز مقطوع من أكثر من جزء... وبلوزة "كت" فوق تي شيرت نص كم!، والحلو "شبشب أبو صباع" في القدم!
"يجنن يا "أشرف".. ظبتطه كده إزاي"
"خبرة يا بنتي.. خبرة.. لعلمك الشبشب ده بـ150 جنيه.. أمال، ده بلاستيك طبيعي! احكي لي بقى عاملة إيه مع الواد بتاعك"
"ده مغلبني.. شوف ياسيدي...................."

***
لو سمحت ممكن تركز شوية على الملابس اللي بيرتديها طلاب الجامعة زمان ودلوقت..
أيوه غش من فوق مافيش مشاكل
خدت بالك.. عملت مقارنة؟
إيه الفارق بقى؟
كبييييييييير قوي

قبل ما تتصور إننا في "بص طل" ناس جايين من زمن الأبيض والأسود و"نهارك سعيد" و"عمت مساء يا صاحِ"!

خلينا نأكد لك إننا مع كل أشكال العصرية والتطور.. وأكبر دليل على كده إننا موقع على الإنترنت.. مش مجلة محفورة على الصخر والمعابد وأوراق البردي!

وطالما اتفقنا على كده –أيوة اتفقنا-..
خلينا نسألك سؤال في الصميم

شايف أنت ملابس الطلاب في الجامعة "ولاد على بنات.. وبنات على ولاد".. م الآخر يعني.. تنفع؟!

مناسبة يعني لحاجة كده بيسموها "قداسة الحرم الجامعي" و"أهمية العلم"؟

لاحظ إن التطور- بلاش تتطور خليها تغير- في ملابس الطلاب في الجامعة صاحبه تغير في السلوكيات.. "بص تاني على الجامعة سنة 68 والجامعة سنة 2008"..

والتغير أمر طبيعي ولازم يحصل.. بس أنت شايف إن التطور في تعامل الطلاب – من ناحية الملابس- مع الجامعة إلى الأفضل أم إلى الأسوأ؟
يعني لما بنت تكون رايحة الجامعة.. -رايحة تتعلم بالمناسبة مش أي حاجة تانية!- ولابسة "بدي استومك" أو "برمودا" أو "جيب فوق الركبة" أو "بلوزة كت" أو "بنطلون جينز ضيق ماتعرفش لو لبسته هتقعله إزاي"،.. يبقى ده اسمه إيه ولا مؤاخذة؟ ويا سلام بقى على بنات بيلبسوا اللبس ده وهم كمان "محجبات".. ده على اعتبار إن شعرها هو اللي عورة ولازم يتغطى أما الباقي فـ"حلال"!

نفس الكلام مع الولاد..
تلاقي الواحد من دول "طول بعرض بارتفاع" ولابس بنطلون ولا مؤاخذة "ساقط" يعني مش على بعضه خالص، وممكن البنطلون يكون متقطع أو – عفوا- "وسخ" ويضحك ويقول لك "ده ديرتي.. موضة يا جاهل"!.. وممكن كمان تلاقيه رايح الجامعة بشبشب "مديحة" ويقنعك إن دي الموضة في "بورتريكو" وإنك جاهل عشان ما بتسافرش كتير هناك!
ده برضه اسمه إيه؟

هتقول ده بيحصل في جامعات أوربا وأمريكا
ماشي ياسيدي مش هنختلف..

بس أولا.. احنا في مصر مش في أمريكا..

ثانيا.. كل مجتمع وله تقاليده وقيمه.. والعلم عندنا له- أو المفترض يكون له- "هيبة" و"احترام".. يعني لا يصح أن تستقبل العلم وبنطلونك واقع على الأرض أو وأنت لابسة "بادي ستومك على هوت برمودا"!..

ثالثا.. الجامعة – أي جامعة- في مصر لها خصوصيتها.. يعني اللي عاوز يلبس "مديحة" نفسها مش شبشبها واللي عايزة تعمل عرض أزياء لـ"ميني جيب المحجبات" أو "ذا بيست بادي ستومك".. يعمل كل اللي عايزه بره الجامعة حضرتك مش جواها.. محدش هيقول له حاجة.. دي حريته الشخصية.. مالنالش دعوة إحنا لكن في الجامعة "ستوب بقى.. إشارة حمرا"
تفتكر إحنا مزودينها حبتين ولا كلامنا صح؟

وفي رأيك..
إيه السبب اللي مخلي كتير من الطلاب والطالبات
يتعمدوا يلبسوا ملابس "غريبة" و"شاذة"
وهما رايحين المحاضرات؟

هل ده تطور طبيعي لازم نتقبله
ولا تحول إلى "الأوحش" لازم نغيره؟

متنسوش اهم حاجه تقولوا رايكم

**Spider GirL**(•'.'•) · 21-02-2008 11:39 PM

والله يا احمد عندك حق هو فعلا تغيير للأسؤ احنا اتعودنا نقلد الغرب فى كل حاجة حتى من غير مانفكر اذا كان اللى هنعمله دة مناسب لعاداتنا وتقاليدنا وتعاليم ديننا ولا لاء وياريت لما بنقلدهم بنقلدهم فى علمهم وتطورهم العلمى والثقافى لا بنقلدهم فى الهيافات
الموضوع مش موضوع لبس فى الجامعة (ومعاك ان الجامعة المفروض يعنى مكان للعلم بس هى دلوقتى بقت للعلم وحاجات تانية )
الموضوع اكبر من كدة بكتير المشكلة مشكلة غزو جيل كامل بأفكار وعادات تبعدنا عن ديننا تقليد اعمى وانبهار بكل مافى الحياة الغربية بدون ادنى تفكير اذا كان دة صح ولا غلط مفيد ولا لاء
شكرا احمد على موضوعك ومناقشتك لية بشكل رائع

**Messi** · 21-02-2008 11:53 PM

الله على ردك يا امانى واللهى تسلمى ع الرد
وفعلا دلوقتى احنا بنقلد وخلاص بنقلد علشان نبقى زيهم نبقى زيهم فى لبسهم فى شكلهم فى الاستايل عموما نبقى زيهم فى قله الادب انما نبقى زيهم فى احترام النظام او احترام القوانين او احترام العمل واحترام الوقت لاء طبعاانا مش عارف هنفضل كده لحد امتى يعنى؟

**Spider GirL**(•'.'•) · 22-02-2008 12:25 AM

هنفضل كدة لحد مانتعلم ازاى نفكر فى اللى بنعمله قبل مانعمله نفكر هنستفيد منه اية نفكر بعقول متفتحة مدركة للحقائق اللى حوالينا
لما نبص حوالينا ونفهم اللى بيحصل

**● **Snow White** ●** · 22-02-2008 01:33 PM

طبعا موضوع تمام جدا ومش سهل خالص و كلام سبيدر 100 100 ومظبوط اخر حاجه بس
ليه منرميش الكوره فى ملعب الرقابه يعنى انا مبقولش أن الطالب أو الشاب مش غلطان لاء طبعان غلطان
بس كمان فى حد غلطان إللى سمح له يدخل كده فى مكان ليه أحترامه زى ما سعتك بتقول يعنى المفروض فى رقابه يعنى فلنفرض إن هيا او هوا لبسه كده يبقى بره بس يلم نفسه فى الجامعه لانه مش زى ما قلت يعمل عرض أزياء وهوا لو عرف انو لو راح كده فى حرس و فى رقابه و فى دكتور يوقفه او عميد كان عمل و عملت الف حساب للبس و المظهر العام
بس بردو انا بقول ان كل جيل ليه تطوره يعنى مينفعش ناو حد يروح الجامعه بقميص كاروهات و بنطلون قماش و بدله يعنى والرسمى ده هيبقى غريب أو منتقد شويه من إللى حوليه
هوا عادى يجارى عصره ويبقى محترم مفيش أى مانع
وبالنسبه لسؤالك احنا هنتعدل امته فا ده مشوار طوييييييييييل لا يتعلق بالمظهر فقط ده فكر و تخطيط و سياسه الموضوع كبير
و الف شكر ليك يا سعت الباشا

**Spider GirL**(•'.'•) · 23-02-2008 12:46 AM

عندك حق سنو وايت بس الرقابة مش لازم تكون فى الجامعة بس مفروض قبل كدة تكون فى البيت وإلا هما هيروحوا الجامعة محترمين وزى الفل بس لما يخرجوا من الجامعة هيكون شكلهم اية ؟؟؟؟
انا عارفة ان انا خرجت الموضوع من شكل فى الجامعة بس الى شكل عام فى حياتنا وشوارعنا بس انا شايفة ان الاتنين مربوطين ببعض يعنى لو الطلبة اتعلمت تروح الجامعة بلبس يليق بالجامعة وهما مقتنعين هيكون صعب انهم يخرجوا بشكل مبتذل مستفز للى يشوفهم
اعتقد ان البيت والتربية هما الاساس

**..●●**آه...لو**●●..** · 23-02-2008 01:05 AM

اولا الموضوع ملوش حل
وانا في راي اظغنطوط ان كل واحد هيتعدل لما يبدا يغير من نفسه ونفسه وبس ملوش دعوه بالناس ماشيه ازاي
منقدرش نرمي الكوره في ملعب الرقابه يعني اقصد احنا اللي هنخسر لان الرقابه لها مسئوليها اللي احنا مش منهم ولذلك لازم كل واحد يخلي بالو من نفسو الاول
اما عن اللبس انا مكسوف اقولها بس المغريات معدتش مغريات من كترتها يعني البارموده والبادي وابو صابع هما النسبه الاكبر واحنا لازم نكون محايدين

**Wezooo**(•'.'•) · 23-02-2008 02:25 AM

الموضوع جامد اوى يا Messi
يعنى كل البنت والولد فى اول يوم فى الجامعه بيروحه علشان يتعرفوا على بعض طبعا مش علشان يحضروا المحضره اما البنت والولد كل واحد فيهم بيلبس اللى على مزاجه طبعا بيكون شاف الطقم على فنان طبعا البت كده يعنى بيقلدو بس فى الجاجات الخيبه اللى هتخلينا دايما متخلفين
يعنى التخلف هنه مش التخلف اللى هترد عليك اى بنت لو انت قلتلها انتى لبسه ليه كده
بس هرجع واقول انا البيت والتربيه لها عامل اساسى لو كل بنت وولد وكل بيت عرف ولاده ازى نخاف من الله مش هنشوف اللى بنشوفه فى الجامعه والشارع
وبالنسبه لسؤالك دى تحول إلى "الأوحش" لازم نغيرهبس السوال الاهم ازى نغيره........................................ ...
والف شكر ليك

**● **Snow White** ●** · 21-03-2008 08:40 PM

تفتيفى باشا تحية طيبه وبعد
طبعا حضرتك معترض على كلامى بس أنا بردو بقول أختلاف الرأى لا يفسد للود قضيه ......
بص بقه طبعا أنا مش معنا كلامى أننا ملناش زنب والرقابه هيا الغلطانه لاء أنا قصدى أن الرقابه بردو مبتعملش دورها يعنى مش دور الحرس أنو يمنع إللى مينفع يدخلا أنو يدخل لأن الحوار يا سيدى الفاضل يدور حول الحرم الجامعى وليس الحياة العامه
بس كده و السلام عليكم ورحمة الله و بركاته

**Hot Ice** · 22-03-2008 04:39 AM

والله يا ميسي موضوع من اجمل الموضوعات اللي شفتها علي المنتدي

وموضوع فعلا شائك جدااااااا .. رغم انه في الاساس سهل جدااااااا !!

تفسيري للي بيحصل انه .. أولا تقليد أعمي دون النظر لشرقيتنا وعادتنا

ثانيا محاولة للظهور بمظهر المتابع والمساير للموضه اول باول ماتقولش

متابع تطورات البورصه يعني !! ثالثا من جانب البنات اعتقد انه محاولة للفت النظر

خصوصا في عصر ( المغريات ) وال ( سماوات المفتوحه ) ربنا يفتح دماغه زي مافتحها

اللي مايتسمي صفوت الشريف علشان البداية كانت من عنده !

الحلول في رأيي المتواضع .. اول حاجه لو افتكرنا ( في الزحمه كدا ) اننا مسلمين

أكيد هنفكر الف مرة قبل مانتصرف تصرف شاذ ... ثانيا لو اقتنعت البنت مثلا انها بمظهرها ده

مش اكتر من ( فرجه ) وان الشاب لو نوي يرتبط مش هيرتبط غير بانسانه محترمه محافظه

علي الامانه اللي ربنا ائتمنها عليها في جسمها وجمالها .. أكيد هتفكر الف مرة ..

وعلشان مابقاش متحيز ضد البنات رغم كونهم ( اساس البلاوي لا مؤاخذه )

الشاب كمان بئا حاجه تفضح .. خصوصا البناطيل الساقطه وال ( راسبه ) واللي

مالهاش حتي ملحق ولا دور تاني من اصله !! ومش هنسي منظر واحد من اياهم

نازل ادامي من ميكروباس و ( حاجه ) خارجه من وراه !! ايه الفضايح دي !!!!

وكمان ( السمنه روابي ) اللي ( مغطس ) دماغه فيها قبل ماينزل .. هي دي الرجوله !!!

وياسلام بئا لو الشعرتين اللي حيلته رافعهم زي ايريال الاذاعه والتلفزيون ... بلا وكسه !!

ثالثا المظهر اه مهم بس مش بالشكل الهستيري ده .. لأن فيه حاجات كتي جدا برضه مهمه

وهي العلم ومواكبة التطور العلمي الرهيب والتمسك بتقاليدنا ..

رابعا دور الاسرة الهام جدااااا ... مش فاهم ازاي اب او ام يسمح ان ابنه او بنته ينزلوا

الشارع من غير هدوم .. امال في البيت ايه شاطيء العراة !!!!

خامسا دور الجامعه او المدرسة .. اتفرجوا علي بنات اعدادي مثلا الايام دي !!

اخيرا ليا سؤال رخم يا ميسي .. هو د / انور ربنا يديله الصحه فضل في الجامعه من

سنة 68 لحد سنة 2008 ؟؟

بجد شكراااااااااا يا ميسي علي موضوعك الرااااااااااائع