Nadooosh
احساس بعدم الامان
بواسطة
في 12-06-2010 عند 08:52 AM (1808 المشاهدات)
انا مكانش فى بالى ابدا انى ادخل واعمل مقالة ولا كان فى بالى انى اتكلم من اساسة وبجد دى اول مرة اشوف صفحة مدونتى من ساعت ما الادمن جدد المنتدى وبقى فى مدونات عندنا
فاقلت فرصة بقى ارغى شوية يمكن اعررف اتكلم واطلع جمللتين صح على بعضهم
انا فى الفترة الاخيرة عقلى بقى ملغى خالص
مبقيتش حاسة بوجودة اصلا ودة بسبب شوية ظروف انا مريت بيها
لدرجة ان فى حد من القريبين منى قال ان نقطة ضعفى ((انى مبعرفش اخد حقى))
وان الى يعرف نقطة ضعفى دى ممكن يدمرنى ويلغى شخصيتى ودماغى
بقالى فترة كبيرة قوى على الحال دة لحد ما اكتشف انى خلاص بقيت EXPIRED
وبجد مبقيتش عارفة اتعامل مع حد
فكرت ارجع تانى اشتغل يمكن احس انى بدات ارجع لطبيعتى وهعرف ارجع دماغى الى اتفرمتت خالص دى
وفعلا انا بدور على شغل واعتقد ان فى فرصة كويسة جت والفرصة دى فيها ميزة تانية انة بعيد .... بعيد قوى عن اى حد بيجرح ومبيقدرش .....بعيد قوى عن اى حد يعرف نقطة ضعفى دى وبيستعملها ضدى .....بعيد عن كل الناس الى لابسين ماسكات وبيضحكوا فى وشى وهما من جواهم عايزين يأذونى
القرار دة صعب قوى لانى متعودتش انى اعيش لوحدى ,دايما حواليا صحابى الى مقدرش اعيش من غيرهم وبجد خايفة قوى انى ابعد واتعب ومعرفش ارجع ولو عرفت ارجع اخاف الاقيهم اتعودوا على غيابى
بس لازم اتحدى الوضع الى انا فية انا مش عايشة تقريبا وموقفة حياتى على قرارات اخدتها قبل كدة واتفاجأت ان مفيش حد بيعمل كدة اصلا عشان حد
كل الناس ممشية حياتها وكل واحد بيشوف راحتة فين وبيروح وراها طب هو انا مبعملش كدة لية؟؟؟؟؟
ودايما شايفة انى لما هستريح اكيد هتعب غيرى
كان فى حد قالى اعملى الى يريحك ومش مهم اى حد تانى - متجيش على نفسك عشان حد - المهم انتى تكونى مستريحة
الجمل دى بترن فى ودانى يمكن انا مسمعتهاش وقتها بس دلوقتى بدات افكر فيها
وعشان كدة قررت انى اكون لوحدى اتعب لوحدى وارتاح لوحدى وافكر لوحدى واقرر لوحدى واتصرف لوحدى ولو احتجت انى اشتكى هشتكى لنفسى ولو ضحكت يبقى لنفسى بردة ولو عيطت مش هقرف حد بمشاكلى وهعيط لنفسى
المشكلة فى الامان
يارب ماعمر حد يحس بعدم الامان
دة احساس مميت ربنا مايكتبة على حد انك تكون خايف وقلقان ومش واثق فى حاجة ولا فى حد ومش مطمن لاى خطوة بتخطيها وحاسس ان كلة محصل بعضة كدة هخسر وكدة هخسر
انك تكون مرعوب من الماضى ومن الحاضر ومن المستقبل
خلاص انا محتاجة Shutdown
انا محتاجةفترة كبيرة قوى يمكن اقدر اتخلص من الترسيبات الى جوايا واقدر الاقى عقلى تانى واعمل ريفريش لحياتى
على فكرة انا مش نكدية ولا بحب النكد اساسا انا مببطلش ضحك وهزار فى حياتى وبجد قلبى منور والحمدلله عمرى ماكرهت حد ولا فكرت انى اءذى حد وبتجرح قوى لما بلاقى حد مجروح او مظلوم
هو بس كان فى بقعة سودة و كان لازم اظهرها لنفسى و اعرف اية اسبابها وازاى هعالجها عشان اعرف الخطوة الجاية الى لازم اعملها
((وعمرى ما انكر فضل صحابى والقريبين منى عليا وانهم وقفوا جنبى كتير وبجد يارب عمرى ما اتحرم منهم وعمرى ما اشوف اى حزن فى عنيهم يارب))
الحمدلله على كل حال
الكلمات الدلالية (Tags):
لا يوجد
- التصانيف
- غير مصنف
إذهب إلى الملف الشخصي
إجعلها كمقروءة
