غير مصنف

الحب عطاء
محدش ينكر ان الحب عطاء , و ان اللي بيحب حد بيديله كل حاجة بدون مقابل
اهتمام و حنية و احترام و وقت .. كل حاجة من الاخر
و بيخاف عليه من كل حاجة .. حتى نسمة الهوا اللي بتعدي جنبه
زي مانا قلت في الاول
بيديله كل حاجة بدون مقابل
و بيكون مبدأه كفاية بس عليا اني ابقى معاه و حاسس بيه
و مش مهم خالص هو بيحبني و اللاه لا
او هو مهتم بيا نفس الاهتمام و اللاه لا
بس يا ترى كده يبقى حب؟ هو ده ميعتبرش حب من طرف واحد؟
نلاقي المحب بيرد يقول : اه طبعا يبقى حب
اللي بيحب حد .. بيعمله كل اللي بيقدر عليه عشان يريحه
اللي بيحب حد لازم يشوفه مبسوط
طيب مسألتش نفسك , انت كده مرتاح؟ طيب انت كده مبسوط؟
اجابات كل الاسئلة السابقة كانت سريعة
و تم الاجابة عليها بكل عفوية بنفس الاجابة من اشخاص مختلفة
مما يعطينا الانطباع بصحة الاجابة , او المصداقية المطلقة فيها
بس السؤال الاخير اختلفت الاجابات اختلاف رئيسي باختلاف توقيت السؤال
و ان اتفقت الاجابات في توقيت معين , فهي ايضا اختلفت في اسبابها
في اول كل ارتباط يشعر كل من الطرفين او احد الطرفين على الاقل بان كل احلامه تحققت
و يحصل على كمية غير طبيعية من الطاقة يقوم بتوظيفها تجاه حبيبه لتلبية متطلباته
كذلك فهذه الكمية الرهيبة من الطاقة , تساعد المحب على تحمل حبيبه لو غلط فيه
او كان اقل منه شوية في الاهتمام او او او او من سلبيات الارتباطات
و عشان كده بنقول الحب الاعمى
عشان كده في اول كل الارتباطات كانت الاجابة عن السؤال ده

"اه انا مرتاح, انا مبسوط جدا كفاية عليا انه معايا"
اجابة ممزوجة بين شعور السعادة العمياء بتواجد شريك العمر
و السذاجة و الطيبة في تقديم الخير للاخرين و ايثارهم على نفسك
و الامل في ان حبيبك لما هيشوفك كده هيبادلك نفس المشاعر

و بعد فترة . بتختلف من شخص لاخر
بتضعف الطاقة اللي جواك دي شوية بشوية بشوية
و احيانا بتتقلب بدل ما كانت طاقة ايجابية متوجهة لخدمة حبيبك , بتتحول الى طاقة سلبية او غضب عام بمعنى اصح
زي بالظبط المثل القائل
"اذا انقلب صديقك كعدوك , فسيكون اعدى اعدائك"
و ده اساسي , لانه هيعوز الاول يخلص كل خير عملهولك قبل ما حتى يبتدي يأذيك
ربنا يعافينا و يحفظنا من الناس دي
فبعد فترة , و ان اختلفت مدتها , بتبقى الاجابة
"لا مش مبسوط, انا غلطت من الاول اديت اهتمامي لشخص ميستحقوش"

رد فعل طبيعي جدا
اي موتور لو فضل ياخد كهرباء , و انا موقفه و مثبت محور الدوران بتاعه مخليه مبيدورش
هيتحرق
رد فعل فوق الطبيعي

الحب الحقيقي مبيولدش حزن
لو حسيت بحب تجاه شخص معين , و لقيت حبك ده مولدلك حزن , اقلق .. اكيد في حاجة غلط
الحب الحقيقي هو اللي ياخد الطاقة الرهيبة اللي بين الطرفين في اول الارتباط و يكبرها و ينميها
مش اللي يحبطها و يدفنها
الحب الحقيقي هو اللي يكون سر سبب سعادة الطرفين , و كل اللي حواليهم
الطرفين نفسهم فرحانين ببعض , و اللي حواليهم فرحانين انهم شايفينهم مبسوطين
الحب الحقيقي اهتمام متبادل ,عمره ما كان من طرف واحد
لو بتحب حد حقيقي , لازم هو كمان يكون بيحبك و خايف عليك و على مصلحتك
مهتم بيك و عمره ما يقصد يزعلك
مقدرك و محترمك و بيسمع كلامك عشان واثق فيك
مش عشان انت لاغي عقله
لو بتحب حد حقيقي , يبقى لازم تاخد منه زي ما تديله
ايوة؟
هتدي على قد ما تاخد
لكن في حاجة مهمة
انك هتدي الاول
ادي الاول و شوف الموضوع ايه , و لو ملقيتش استجابة .. يبقى مبيبحبكش و هتصرف الطاقة اللي جواك دي على الفاضي
و هتطلع في الاخر تقول "انا خسران"

يبقى الملخص المفيد
الحب عمره ما كان عطاء
في شكله الخارجي عطاء
لكن في جوهره عشان يستمر خد و هات
و لاحظ الترتيب
الحب الحقيقي عمره ما كان عطاء بس

11-7-2010
للاسف كسلت انزله على الموقع قبل ما اروح المصيف

قد ايه احنا الشباب قابلتنا الجملة دي؟
كام مرة انطلب مننا اننا ندادي و ندلع تحت هذا الشعار
اعذرني فانا انثى
موضوع قريته من فترة
و وجدته في اكثر من منتدى
و ده الملخص المفيد بعد ما اختصرت الكلام اللي ملوش لازمة

قد ايه التوبيك فيه يا عيني حجج و تبريرات لكل افعال البنات اللي تغيظ
و مع ذلك بنفوتها
و كالعادة كل الفتيات اتأثروا قوي بالتوبيك
و الله جميل و محصلش و فعلا بيحس بينا و فعلا مش عارف ايه
مهو لازم يقولوا كده
مهي دي الحجة اللي بيها بياخدوا كل اللي هما عايزينه
البنات عندهم سكتين عشان ياخدوا اللي عايزينه
اما اعذرني فاني انثي ( و دي معاناها دلعني يعني )
و التاني برده اعذرني فاني انثى ( بس المرة دي معناها انها هتقعد تعيط لحد ما تاخد اللي هي عاوزاه )
طيب و هو مفيش خالص اعذريني فاني راجل؟؟؟؟
يعني مفيش مثلا

لما ارجع من الشغل تعبان
و اقول انا داخل انام و مش ضروري كارفور النهاردة
اعذريني فاني رجل

لما الاقيكي طول النهار بتتفرجي على الشيف شيربيني و الشيف حسن
و منفضالي طول النهار
و ارجع بالليل ملاقيش العشاء جاهز و اتنرفز
اعذريني فاني رجل

لما تحصل بينا مشكلة
و تلاقيني قلبي جامد
و لاغي الحنية و اللطافة
و بتعامل بالعقل و بحزم
اعذريني فاني رجل

لما اتنرفز و اتضايق
من مخالفات تنبيهات نبهت عليها قبل كده
اعذريني فاني رجل

لما اغير عليكي
و دمي يفور لما حد يضايقك
اعذريني فاني رجل

لما موافقش على حاجة
و تعمليها من ورايا
و اطربقها بعد كده فوق دماغك
اعذريني فاني رجل

لما ارجع البيت
و الاقيكي مشغلة اغنية شرين اخيرا اتجرأت
و اقفلها و اكسر السي دي و اشغل ابو الليف
اعذريني فاني رجل

و لما و لما و لما و لما و لما
اعذرونا احنا رجالة

و عشان احنا رجالة
بندلع و ندادي و نشيل فوق الراس
و انتوا كمان بتعملوا كده
بتدلعوا و بتدادوا و بتشيلوا في الراس
بس يا بنات حواء
متجيوش على مصلحتكم و تقولوا اعذرونا احنا اناث
و في الحاجات اللي فيها مصلحتنا احنا
و تقولوا لا انتوا مش هتعملوا فيها سي السيد!

موضوع من رجل خايف على صنف الرجالة

بعد المدونة دي

و اللي كانت مكتوبة الانجليش و بعد ما حصل لبس مع بعض الناس
وجب التوضيح!
الموضوع و ما فيه
لما حد يبقى معاه حاجة و ميستاهلهاش .. الصح انه يتخلى عنها
لقب The Dark Knight بالنسبة ليا حاجة كبيرة
و بالنسبة لناس تانية كتير شاركت في فهم المعنى
انا بغيير اليوزرنايم بتاعي من وقت للتاني .. و دايما بيكون عاكس للشخصية اللي انا بمر بيها
كنت حابب قوي اللقب ده
و حابب شخصيتي و انا فيه
كنت بكتبه و انا مبسوط
و كان في جملة معلق عليها قوي
It's not who we are underneath but what we do, that defines us
الجملة معناها .. ان ممكن يبان للناس مننا وشوش تانية تخليهم يحكموا علينا باننا اشخاص تانيين
بس ده مش مهم
المهم اللي احنا بنعمله .. اعمالنا هي اللي بتحكم علينا
و مكنش هاممني قوي اللي الناس فاكراه عني ايه
طالما اللي بعمله انا راضي عنه
مش هتكلم عن اللي بعمله .. بس انا كنت راضي عنه
و كنت باخد قرارتي صح لمصلحة الاغلبية
كان فيها قرارات صعبة .. جدا .. خصوصا لما تكون دايما منتظر منك الاختيار الصح
و انت مش عارف ترضي مين واللاه مين!
بس كنت باخد القرار الصح
و خدوا بالكم انا مش بتكلم على المنتدى
انا بتكلم على حياتي كلها .. انا كنت بتصرف بنفس الاسلوب في اتخاذ قرارتي في حياتي كلها , في الجامعة , في البيت , و في المنتدى , مع اصحابي و زمايلي و بيتي و هنا كمان
عشان كده كنت Dark Knight و فخور بكده
لحد ما حسيت اني مستاهلش اللقب ده
و الاحساس ده جالي على مراحل .. مجاش مرة واحدة

المرحلة الاولى
شوية بشوية .. انا لاحظت اني متغيير
بدأت تقع مني صفات The Dark Knight صفة ورا التانية
بقيت بتنرفز بسرعة .. بقيت بفكر في مصلحتي
بقيت بظلم بعض الناس احيانا
بقيت بتصرف بعدوانية معظم الاوقات
مكنتش باخد بالي من الحاجات دي
الا بالليل .. قبل ما انام
و انا بحاسب نفسي عن اللي عملته في يومي
و اقول .. طيب مش مشكلة .. اهي غلطة و حصلت و انتهت
و مش هتتكرر
و بقيت اهو
It's not who I'm underneath, but what I do that defines me
و انا كويس .. و هصلح من نفسي و هتظبط تاني
كل ده و انا بخسر الصح اللي جوايا شوية بشوية
بس حاسس باهمية لقبي .. و مش عايز اتخلى عنه

المرحلة التانية
المرحلة دي لما اخطائي بدأت تكتر
لدرجة اني مبقتش قادر اواجه نفسي بيها
و شوية بشوية حملها بيزيد عليا
عرفت اني خلاص وقعت .. لما كنت في القاهرة من كام شهر
و بسجل دخول في المنتدى من جهاز ابن خالتي
و انا بكتب اليوزرنايم بتاعي
The Dark Knight
و انا بكتبه ابتسمت لنفسي ابتسامة استهزاء كبيرة
و كأني بقول لنفسي
بلا نيلة .. بلا دارك بلا بتاع
دارك ايه في وسط كل النيلة اللي انت بتعملها دي
و بقيت كل ما اشوف اليوزرنايم بتاعي .. افتكر ان اخطائي كترت
مش قادر اواجها
بس لازلت بقول اني من جوايا لسه زي مانا
و هتظبط تاني
خصوصا اني الاخطاء دي مش اخطاء عامة .. اخطاء بسيطة في تعاملاتي اليومية
معظمها مع ناس معرفهاش

المرحلة التالتة
لما بقيت بغلط على الملأ
لما بقيت باخد القرار الغلط في الوقت الغلط
و بقت مصلحتي بتأثر على اتجاهي ..
بتأثر عليه .. انما مش كل اتجاهي لمصلحتي .. انما بقيت ابص للامور بزوايا تانية
مش الصح المطلق .. انما صح مشروط
قرار صح .. انما فيه مصلحة
و للاسف احيانا كان بيبقى فيه ظلم للاخرين
و بعد ما كان مجرد كتابتي للقب The Dark Knight بيخليني استهزأ بنفسي
بقت جملة كمان
It's not who I'm underneath, but what I do that defines me
بتعصبني زيادة
لان بقى الظاهر و الاعمال كمان غلط!

ساعتها بجد عرفت اني مستاهلش اللقب ده
و اني لازم اتخلى عنه
مش برضايا .. بس لاني اتحولت .. اتغيرت
غصب عني ..
و يمكن شوية الصح اللي جوايا بيخلوني اخد قرار صح على الاقل
و اني اقول اني مش قادر اكون كده .. فمحدش يقول عليا كده .. مش عايز اتوصف بالصفة دي عشان مبقتش فيا
و انا كمان مش هقول اني dark knight لحد ما ارجع كده تاني
و ده السبب الاساسي اني قررت التخلي عنه
الموضوع بالكامل خاص بيا .. و غير مرتبط باي اشخاص تانية نهائيا

مش معنى اني بقول اني بغلط كتير .. او اني بقيت شرير او اني ضايع خالص
انما هي اخطاء بسيطة .. عابرة .. مع ناس انا معرفهاش .. و مع ذلك بتأثر فيا اني بتعامل بالعدوانية و الانانية دي !
و ان كانت حاجات بسيطة بس انا مش متعود عليها
و خايف اتعود عليها
و تبقى اسلوب حياتي
انا حابب نفسي و انا مصطفى اللي بياخد باله من اصحابه و بيته و زمايله و بيفكر فيهم و يحبلهم الخير زييه و اكتر منه كمان
و ان ده عكس مصلحته

.........
مش دي نهاية المدونة
بس انا مسحتها و فضلت انها تكون من غير نهاية .. على الاقل مؤقتا

Many things changed
I'm not feeling as dark knight any more
dark knights do things I'm not doing anymore
dark knights don't do things I started to get used to doing it
I'm not feeling as a dark knight, but I'm still feeling dark
I'm still wearing black, but not dark knight custom
how long can anybody fight darkness, until he finds darkness inside himself?
The good thing I love in myself, is that I blame myself for my mistakes
But my mistakes are are getting more and more
and even bigger
I'm afraid to get used to them and use them as a pattern of life
We are at the years of life, when man changes to the man who he'll be for the rest of his life
and I won't be like this for long
I won't give up and I'll be back

الرسالة دي انا كاتبها و مسيفها عندي على الكمبيوتر من اسبوع
كاتبها مخصوص عشان احطها في المدونة
عشان اعز انسان ده يقراها
و كنت بكسل احطها على المدونة
و اتلخمت في الامتحانات
النهاردة انا مسحت الرسالة دي من على الكمبيوتر
و مش هنزلها !
بس خلاص

شوفوا يا عساسيل .. انتوا هتلاقوني مقلوب دلوقتي حبتين
يعني هتكلم جد حبتين
يعني مش كل حاجة بهزار
اصل دلوقتي دماغي ملخومة حبتين
و بقت عاملة زي ازازة المية اللي مليانة على اخرها
و لازم تطرطش شوية
بس دونت وري .. الموضوع سهل
انا بس ملخوم حبة بالمحروقة الكلية
و بعدين الكلية معكوكة معايا حبتين
المفروض اني معايا اربع مواد الترم التاني
اللي هو الترم ده
يعني في احتمال اشيل السنة تاني
و ان كان احتمال الاول كان مستحيل في نص الترم كان ضعيف دلوقتي بقى محتمل!
و السبب ان الاربع مواد اللي معايا تلاتة منهم اتشال منهم ابواب و نزلت ابواب جديدة
و الرابعة اتغيرت خالص و جه مكانها مادة جديدة
و انا عندي حاجة خمول غير طبيعية!
حالة الخمول دي بتيجيلي دايما لما بيتكربس عليا شغل كتير .. انا عارفها
بس بتبقى خراب بيوت بقى
لاني بفضل دماغي ملخومة بالمشاكل اللي هتحصل لما ااخر الشغل .. عن تنفيذ الشغل نفسه
يعني دلوقتي تلاقيني ملخوم بحل المشاكل اللي لسه هتحصل لو اني شيلت مواد
عن اني اراجع المواد اللي عندي مثلا!
و ده كلام فاااااااااااااااااااااارغ ! جدااااااااااااااااااااااا ااااااااااااااااااا
بس لما الشغل بيتكربس عليا .. ده اللي بيحصل!
و ببقى عايز افضي دماغي
بحاول اني اعمل عملية ريفيرش .. و اقول النهاردة فري و بكرة هذاكر
طريقة بتمشي مع ناس كتير
صح؟
بقالي شهرين بقول لنفسي النهاردة فري و بكرة هذاكر
متخيلين 60 محاولة فاشلة
متخيلة كمية الاحباط اللي انا فيها
انا للاسف مبتحركش الا في الوقت بدل الضايع
عايز الحق نفسي من بدري .. بس بتلخم
حاجة تفرس
انا يعني بتكتب دلوقتي عشان مفرووووووووووس و هطق
و لما اكون تعبان قوي اقول لنفسي ايه
لا انا مش هذاكر انا مصدع دلوقتي
لا انا مش هذاكر انا هطلع اعمل شاي و ارجع اذاكر
لا انا مش هذاكر عشان ابن خالتي بيكلمني على الماسنجر هشوفه عايز ايه و هذاكر
لا انا مش هذاكر عشان الوقت اتاخر و عندي سكشن الصبح
لا انا مش هذاكر عشان الوقت لسه بدري و عندي سكشن متاخر
طيب و انا عمال اطلع حجج ليه .. مع اني مش بتحجج
بس تحسوا اني بتحجج!!
طيب ما اريح نفسي سواءا بتحجج و اللاه , اريح نفسي و اقول مش مذاكر و خلاص
بس انا عايز اخلص من ام هم الكلية
انا ممكن اتخرج و مشتغلش , مع انها مش هتحصل
بس اتخرج و مشتغلش .. عن اني افضل مربوط بكلمة طالب دي
ييييييييييييييييييييييييي ييه مقرفة
و حاجة تانية بتفرسني
ان بقت كل الناس شايفاني مهييس
محدش مصدق ان ده الوش اللي بيتصور
يا جدعان انا لما بتصور بتصور و انا مهييس
و ده 25% بس من وقتي , في 75% تانين بيتقضوا في شغل و جد
بلاقي الناس بتدخلني في موود التهييس غصب عني
في ناس قالت خلاص مش تفتح المخروب ده خالص اللي هيجيبلك الكافية ( الكمبيوتر )
هو فعلا قفلته هتحل الموضوع
بجد
اولا مش هلاقي حاجة اتخلم فيها
ثانيا ... مش عارف دلوقتي ثانيا ايه
بس قفلته دي شئ مستحيل
مش هقدر
بجد
هتقولوا شيل كابل الباور وارميه فى داهية بعيد
يا جناب الكوماندا المهم
انا لو الكمبيوتر كله اتشال
غصب عني
هتصل بواحد صاحبي
اخد الكمبيوتر بتاعه
و هشغله
الموضوع ده منتهي
و غير ارادي بالمرة!
انا عايز اصب تفكيري في الموضوع مش عواقب فشل الموضوع
انا قلتلكوا انا بس محتاج اطرطش شوية
الموضوع كبير فعلا
عشان بقاله كتير
على فكرة انا استريحت شوية
هو بس دماغي كانت مخرفة حبتين
overloaded
و انا ظبطتها
و بما اني فايق قلت لما اكتب المدونة دي بعد ما هخلص هقوم اذاكر
مع اني عارف اني هخلص من هنا كتابة
هلاقي دماغي تقلت
و لا بلاش النهاردة و هقول لنفسي انا بكرة اجازة هذاكر بكرة من اول النهار
يييييييييييييييه لعب عيال
سيبكوا من الكلام الفارغ ده
صباح الفل
مووووووووووة
19 - مايو - 2010
الساعة 4:30 فجرا

شاف كافح عشان يجيب شقة عشان يتجوز
و اخيرا بعد تعب السنين عرف يجيب الشقة
و راح يتقدم
لقى اهل العروسة طالبين طلبات مش هيقدر ينفذها
فرد عليهم بالكلمات دي

انا جيبت شقة في زمن لو جيبت شقة يقولوا تهييس
طب مهر لا يا اخوانا حرام هو التشطيب رخيص؟
سيبوا اللي اتبقى هاتوا نص العفش, ليه القفش ؟ بيس
الرحمة حلوة حلوة حلوة الله يكون في عون العريس
مين اللي نقى مش بنتكوا دي يبقى ذنبي ايه تدبيس؟
وفرت طقة , طقة و بصوم و النعمة اتنين و خميس
انا كان فاضلي زقة و اهج و الم هدومي في كيس
ناقص ابيع المنطلون , المنطلون و القميص!

لا يا انكل لا .. لا يا ابلة لا
يرضيكوا تيجوا بنتكوا بيتها تجوع جواه؟؟

في لسه خلفة و عيال حلوين يا نهار ده هبل المصاريف
مش لاقي صرفة هبتي بريستيجي كده منظري مش ظريف
لو خدت سلفة من حد قصاد بنتكوا انا هبقى ضعيف
و هقعد في البيت بجلابية .. هههههه.. يا خسارتك يا ابو الليف

لا يا انكل لا .. لا يا ابلة لا
يرضيكوا تيجوا بنتكوا بيتها تجوع جواه؟؟

و الله الكلمات معبرة جدا جدا جدا جدا جدا جدااااااااااااااا
دي من كلمات ايمن بهجت قمر
اغنية انا جيبت شقة لابو الليف
و ده رابط الاغنية من على نجومي رابط مباشر

يا رب تعجبكم
مصطفى شومان

ممممممممم
من سنين و انا بعاني من مرض اسمه الوسوسة !
مش عارف بجد الوسوسة دي حاجة كويسة و اللاه وحشة
الا اني بجد مديون ليها بافضل الحاجات اللي حصلت في حياتي
انا مقدرش انكر اني مريض بالوسوسة !
فعلا الوسوسة و الشك عندي وصلوا و من زمان لمرحلة المرض !
* طيب ايه اعراض حالة الوسوسة اللي عندي ؟!
1- ده دايما بيشوف كل حاجة صعبة جدا
2- كل حاجة وحشة جدا
3- المذنب عندي متهم حتى تثبت براءته !
4- عشان اثبت ( لنفسي على الاقل ) ان اللي بعمله صح , لازم اثبت الاول انه مش غلط , فابتدي اثبت انه غلط لو فشلت يبقى مش غلط و بالتالي يجوز ليه الصحة , ثم ابتدي اثبت انه صح , لو بقى نجحت يبقى يجوز برده ليه الصحة , و احيانا بعد ما اثبت صحته بشك في اني غلط في اني افتكرته مش غلط و ارجع اعيد من الاول !
شغل مجانين من الاخر
و لو الموضوع اللي انا بوسوس عليه مهم ممكن يوصلني لمراحل اني بفقد فيها السيطرة تماما على تصرفاتي و تعاملي مع الناس لحد ما اوصل لنتيجة مؤكدة
ممكن فقدان السيطرة يوصلني ان لو الموضوع ده فعلا خرج من ايديا ( في وسوستي ) اني ممكن ادمره عشان دماغي تبطل تفكير !
الموضوع ده بجد و الله عندي غير ارادي نهائيااااااااااااااا
يعني انا عمري ما اخدت بالي في وسط وسوستي اني بوسوس
لكن باخد بالي لما بأفور في الوسوسة واللي حواليا بيقولولي , غير كده ببقى شايف ان ده طبيعي
بسبب الوسوسة , و اني دايما شايف كل حاجة غلط , او صعبة , او وحشة , او هتحصل مصيبة , او او او او او او
فبيبقى حلي الوحيد عشان اهدى اني لازم استعد للغلط او الصعب او الوحس او المصيبة او او او او او
فتلاقيني دايما مستعد للصعب , مستعد للوحش لاني شايف الحاجة هتطلع صعبة و وحشة
و لان الوسوسة دي بتطلع في اغلب الاحيان غلط
فانا بكون جاهز للصعب , و بتطلع الحاجة سهلة فبتعدي الحمدلله
فعشان كده , انا مديون للوسوسة اللي من غيرها مكنتش هبقى مصطفى شومان بتاع النهاردة
فبسبب الوسوسة دي
1- بفكر كتير قوي قبل ما اتصرف ( يعني اغلب الاوقات مش على طول )
2- بقيت بشك في ناس تستاهل انها يتشك فيها ( عشان الاول كنت ساذج جدا و سهل انه ينضحك عليا )
3- الصراحة , نميت تفكيري حبتين قصاد التعامل مع المشاكل , وصلتني لمرحلة البرود قدام المشاكل
احيانا بتظهر مشكلة , و بتكون مفاجأة و مع ذلك بتعامل معاها بكل برود و هدوء لاني في وسوستي مريت بيها و حليتها
و موضوع البرود ده مسببلي مشاكل كبيرة قوي هنا في البيت , ممكن تحصل مشكلة كبيرة و يبقى كل رد فعلي عليها
"طيب , ربنا يسهل"
و أغلب ردود افعالي قصاد اي مشكلة , او اي مصيبة هو اني بعمل كده
" " , مجرد الابتسامة البسيطة دي !
بقت ردي على كل مشاكلي , لدرجة ان مبقاش يتعرفلي ابتسامة انبساط من ابتسامة زعل
ماما او بابا او اي حد بتفتكر اني مش في دماغي , لكن الموضوع اني اصلا عديت على المشكلة دي قبل كده ( في وسوستي ) , و اما عندي ليها حل , او يبقى ملهاش عندي حل
فمفيش رد فعل مني منتظر غير كده !
4- وصلتني لاحسن و اخنق مبدأ في حياتي ( ليه تدفع اكتر , لما ممكن تدفع اقل ؟ ) مبدأ خنيق جدا , أناني جدا جدا , لكنه مع بعض الشخصيات بيكون افضل كتير!

بس نرجع و نقول ان اكيد في اعراض جانبية للوسوسة دي!
و اي اعراض , دي بلاوي جانبية مش مجرد اعراض
1- و هو أسوأ بلوة من بلاوي الوسوسة الا و هي "الشك"
حاليا انا بشك في كل حاجة و في كل الناس
سوري يعني
لدرجة اني حاليا بشك في نفسي ( اقرأ البند الرابع من اعراض الوسوسة باللون الازرق )
2- ممكن التفكير الكتير يوصلني لمرحلة اني انام في اليوم مجرد ساعتين او تلاتة , او ممكن منامش خالص لحد ما اوصل لحل عقلاني و واقعي للمشكلة الوهمية اللي في دماغي !
3- البرود قصاد المشاكل , بيخلي منظري وحش , و بيبوظ علاقتي بالناس اللي حواليا , مع اني مش بارد و الله , كل الموضوع اني شوفت الموضوع قبل كده , و لقيت ان ردود الافعال التانية مش هتأثر , يبقى ليه اعملها ؟
( منطق غريب , انا نفسي مستغربه )
4- مبدأ ليه تدفع اكتر لما ممكن تدفع اقل مفيد لو الشخصية اللي قدامي فعلا متستاهلش الخير , بس ممكن تكون الشخصية تستاهل الخير ابقى كده مديتهاش حقها , لكن برجع و بقول انه مبدأ لم يثبت خطأ فيجوز صحته!
5- مبدأ المتهم مذنب حتى تثبت براءته
احيانا بيكون قدامي 5 او 6 اختيارات
و مش عارف اختار انهي واحدة , لانهم كلهم يصلحوا
فببتدي بالعكس , و اني مش اشوف مين اللي يصلح
لا اشوف مين اللي ميصلحش لحد ما يتبقى واحدة في الاخر
الوسوسة فادتني كتير في المواقف اللي زيي دي

مش فاكر ايه تاني , بس موضوع الوسوسة دي بجد على قد ما هو مفيد , الا ان بلاويه و بكل صدق اكتر كتير من فوايده
بس ارجع و اقول , لولا الوسوسة , مكنتش نجحت في حاجات كتير
و لولا الوسوسة و التفكير الكتير بسبب الوسوسة مكنتش هحس اني مهندس ( في بعض الاحيان يعني لما احتاجت لشك و تفكير عشان نوصل للمشكلة و نحلها )
و لولا الوسوسة كنت هفضل شخصية ساذجة , كويسة و ذكية و لكن سهل ان حد يستغلها او يضحك عليها
بس اقول برده ان الوسوسة مسببالي اكبر هم في حياتي و هو "الشك"
و حاليا , و لاني وصلت لنتيجة نهائية بخصوص الوسوسة انها هتفضل ملازماني طول حياتي , و استحالة هتتغير , فانا حاليا تفكير مبقاش منصب على كيفية تحكمي في الوسوسة , و لكن بقيت بفكر في ازاي اتعامل و اتعايش و احجمها عشان متطولش اللي حواليا و تأذيهم!
او على الاقل احاول اوصل لطريقة تبيني خطأ وسوستي أسرع شوية قبل ما اتصرف غلط بسببها !
معلش انا زماني دوشت اي حد بيقرا التوبيك
بس انا كنت بتكلم على الماسنجر مع بنت خالتي الصغيرة , و فتحنا الموضوع و حسيت انه ممكن اناقشه او اطلعه كده حبة عشان ميخنقنيش !
( مع انه مش خانقني الصراحة )
بس نيجي في الاخر بقى و نقول
ان السؤال بجد دلوقتي !
"يا ترى الوسوسة حد جميل؟"

للي مش متابع الموضوع من الاول
دي المقدمة



الجزء الاول



الجزء التاني

بعد ما فتحت المنتدى بالجيل الرابع
كنت متاكد متاكد متاكد مع اني كنت شاكك ان اكيد هتظهر مشاكل !
و رغم ان الوقت كان اتاخر و كنت تعبان و مرهق جامد
الا اني قلت بقى لما اجرب الحاجات الجديدة اللي ظهرت دي
فتحت صفحة الرئيسية لقيتها تمام
صحيح المحتوى اللي فيها هو المحتوى اللي نازل مع النسخة ( الاساسي يعني )
بس كانت شغالة
فتحت المنتدى سليم
فتحت المدونات كمان لقيتها شغالة
قلت مية مية
فتحت صفحة what's new? اللي بتظهر فيها اخر المشاركات
لقيت ايرور
قلت حبيبي , اهلا و سهلا
الصراحة كنت تعبان جداااااااااااااااا , شوفت الايرور , قفلت صفحة المنتدى و قفلت الكمبيوتر و نمت
تاني يوم الصبح , بدأت ادور على حل للمشكلة دي
المشكلة كانت كبيرة فعلا
و في وسط التدوير



مشرفة الصيدلة و القسم العلمي ,كانت لاحظت مشكلة هي كمان
و فتحت توبيك في غرفة العمليات
من الجدير بالذكر ان التوبيك ده كان ليه اكبر اثر في اكتشاف اخطاء كتير قوي في المنتدى , و بسببه في مشاكل كتير اتصلحت
sankio MonyanA

المهم كانت بتعاني من مشكلة في التنسيق , و بتسال عن البنك والاهداءات و مش عاجبها صفحة الملف الشخصي من غير الوان

و بعديها Spider Girl اكتشتفت ابوخ اكتشاف و اللاه هو ان المدونات كانت بتظهر علامات استفهام !

و انا معكوك في وسط مشكلة السيرش دي,عشان كانت مشكلة عامة على كل المنتدى

فضلت ادور ادور ادور , لحد ما قدرت احدد ان المشكلة في حاجة اسمها encoding
و دي عشان تتغير للجداول الجديدة , حاجة مرهقة جدا يدويا
فدورت على حاجات بتعمل الحكاية دي اتوماتيك
بعد البحث , لقيت واحدة
و فشلت

في وسط الهوجة بتاعت تغيير الencoding
مونيانا اكتشتفت ان الالبومات كمان بايظة , و دي كان حلها بسيط و اتحلت
يعني قلت احل حاجة

و دورت على حل تاني للانكودينج , لقيت في ناس كتير بتقول عليها شغال , و الحمدلله مشتغلتش
لكن اكتشفت ان في خطوة ناقصة
و الحمدلله ظبطت الدنيا

و مع حل مشكلة الencoding اتحلت مشكلة المدونات كمان

ياااااااااااه استراح قلبي

و بعد كده بدأت التعليقات على الاستايل انه مريح و الناس بدأت تاخد عليها و هكذا

و ده كلام كان مريحني جدا و الحمدلله , عشان انا كنت مقلق قوي من الناس متاخدش على الجيل الجديد بسرعة

كان في ناس بتقول ان الموقع بيقع معاهم كتير , لكنها حالات فردية و مكنش ليها دخل بالموقع و الحمدلله

و كده كله تمام
الا اني اتفاجأت بخبر وحش جدا جدا جدا جدا جدا جدا !!



و الخبر في ملخصه
ان في ثغرة في المنتدى , ممكن اي حد بيها يسرق باسورد الادمن , و طبعا ممكن يمسح بيها كل المنتدى !

هنشوف اتعاملنا مع الموضوع ده ازاي في المدونة الجاية

للي مشافش المدونة دي

دي الجزء الاول من الموضوع

من اربع ايام انا اخدت القرار
و قلت عليا و على اعدائي يا رب
قفلت المنتدى
و نسخت قاعدة البيانات عشان يبقى معايا باك اب لو حصلت مشكلة و اللاه حاجة
و اتكلت على ربنا
بسم الله الرحمن الرحيم
نبتدي الرحلة بقى
ابتديت في الترقية , خطوة ورا التانية خطوة ورا التانية
و انا عمال اتابع الخطوات , مستني كل ما ادوس next الاقيه يقولي ايرور
و لو جت ايرور دي , ربنا يستر منها , في ايرورات كده بتتحل , و في ايرورات بتبقى زي النصيبة , حارة سد! بتهد الدنيا
المهم كلمت
next next next next
اخدت حوالي عشر دقايق و كملت الترقية على خير
سجلت دخول في لوحة التحكم مدخلش
افتح صفحة المنتدى يقولي ايرور و انسى يا عمرو بقى , و مفيش طريق و لا يمين و لا شمال ههههههههههه

قلت لنفسي و بعدين؟!
افتكرت اني مشيلت الزيادات بتاعت الجيل القديم
و لوحة التحكم مقفولة مش عارف ادخل اشيلهم
افتكرت ان في حيلة صغيرة كده , بقدر بيها اعطل كل زيادات او هاكات المنتدى و فعلا وقفتهم لوحة التحكم اشتغلت و صفحة المنتدى الرئيسية كمان اشتغلت
تنفست الصعداء و قلت تمام لما ارجعهم بقى تاني و اشوف انهي فيهم اللي ممكن يشتغل و انهي لا
و ده طبعا غباوة
لانهم كلهم متصممين للجيل التالت و لا واحدة منهم هتشتغل
بس قعدت نص ساعة
اشغل واحدة و اجرب , الاقي ايرور , و اوقفها و التانية والتالتة
غباوة بعيد عنكم
بس كان نفسي حاجة منهم تشتغل
المهم
مشيتلتهمش , سيبتهم قلت عشان اعداداتهم تفضل موجودة , و قلت ادور على اصدارات جديدة منهم متوافقة مع الجيل الرابع

لقيت زي اخر عشر مواضيع
و الاحصائيات
و اخفاء الروابط عن الزوار
و شكرا على هذا الموضوع
كل دي زيادات , الحمدلله نزلتها و ركبتها تمام
لكن للاسف ولا لقيت الاهداءات و لا لقيت البنك
و دي حاجات مزعلة مننا الناس قوي
بس بدور عليهم و ان شاء الله قريب نلاقيهم متوافقين مع النسخة الرابعة

و فتحت المنتدى و قلت بقى لما استنى اشوف المشاكل بقى اللي هتحصل
يا ترى ايه حصل؟

ده اللي هنشوفه في المدونة الجاية

النهاردة 18-03-2010
تمت حركة تطوير جامدة جدا في فكك مني
زي اي برنامج , كل فترة بيظهر ليه تجديد
يعني مثلا كان في ياهو 8
و كان في ياهو 8.1
و بعدين بقى في ياهو9
و حاليا ياهو10
طيب ايه الفرق؟
الفرق ان لما بيكون التغيير في الاصدار رقم من مية مثلا ده معناه ان التغيير بسيط
و لما يكون رقم عشري , ده معناه ان التغيير كبير شوية
انما لو كان التغيير في الرقم نفسه , ده معناه ان التغيير جذري!
للي يفهم في المنتديات
يعرف ان المنتدى زيه زيي اي برنامج , بيظهرله كل فترة تطوير او ابدايت , و لان الابدايت ده احيانا بيكون غير ضروري , و احيانا هيسبب مشاكل , و احيانا لمجرد الكسل من تركيبه , مبركبوش

الاول نسخة المنتدى كانت
3.6.7 و دي اول نسخة منتدى عملنا بيها فكك مني
و حصل تغيير كتير في الرقم الاول (المئوي) 7 لكن ده معناه ان التغييرات مش كتيرة قوي فكسلت ارقي الصراحة
و بعد كده طورنا الموضوع شوية لما حصل تغيير في الرقم التاني (العشري) 6
و رقينا للنسخة 3.7.0
و لما حصل تغيير تاني رقينا للنسخة 3.8.0
و في الاونة الاخيرة كان حصل اختراق بسيط كده للموقع و رقينا لل3.8.4
كل ده كانت ترقيات داخل كسور
يعني الاساس اللي هو 3 او الجيل التالت زي ما هو
عشان كده كانت تقريبا كل حاجة زي ما هي , الاستايل كان بيفضل زي ما هو
و الزيادات زي الاهداءات او او او او او الخ
من فترة قريبة نزلت الجيل الرابع
و رقمها 4.0.2
و من الواضح ان التغيير كده تغيير جذري
و بالتالي مش بس هنخسر كل الزيادات
لا و كمان هنخسر الاستايلات
و هندخل في دوامة المشاكل الجديدة اللي بتظهر مع كل اصدار جديد
و خصوصا ان كل الخوارزمات اللي كنا بنمشي عليها في الصيانة في الجيل التالت هتتغير!
الوضع كان محتاج دراسة
بعد الدراسة , و مراجعة قدرات الجيل الرابع
اظن ان الموضوع يستاهل المخاطرة

و دلوقتي فكك مني للسنة التالتة
بالجيل الرابع
و احدث نسخة من نسخ المنتديات في العالم
بيقدم خدماته

رقم واحد منتدى فكك مني



رقم اتنين مدونة فكك مني لكل الاعضاء



رقم تلاتة مجلة فكك مني



و نتمنى ان الموقع ينول اعجاب الجميع