شعر من تأليف رئيس جمهورية لشعبه

**Essoo** · 24-07-2007 09:36 PM

شـعــر مـن تآليف رئيس دولة .. اهداء الى شعب مصر

ياشعبي حبيبي ياروحي يابيبي ياحاطك في جيبي يابن الحلال

ياشعبي ياشاطر ياجابر خواطر ياساكن مقابر وصابر وعال

ياواكل سمومك يابايع هدومك ياحامل همومك وشايل جبال

ياشعبي اللي نايم وسارح وهايم وفي الفقر عايم وحاله ده حال

احبك محشش مفرفش مطنش ودايخ مدروخ واخر انسطال

احبك مكبر دماغك مخدر ممشي امورك كده باتكال

واحب اللي ينصب واحب اللي يكدب واحب اللي ينهب ويسرق تلال

واحب اللي شايف وعارف وخايف وبالع لسانه وكاتم ماقال

واحب اللي قافل عيونه المغفل واحب البهايم واحب البغال

واحب اللي راضي واحب اللي فاضي واحب اللي عايز يربي العيال

واحب اللي يائس واحب اللي بائس واحب اللي محبط وشايف محال

واحبك تسافر وتبعد تهاجر وتبعت فلوسك دولار او ريال

واحبك تطبل تهلل تهبل عشان مطش كوره وفيلم ومقال

واحبك تأيد تعضض تمجد توافق تنافق وتلحس نعال

تحضر نشادر تجمع كوادر تلمع تقمع تظبط مجال

لكن لو تفكر تخطط تقرر تشغلي مخك وتفتح جدال

وتبدأ تشاكل وتعمل مشاكل وتنكش مسائل وتسأل سؤال

وعايز تنور وعايز تطور وتعمللي روحك مفرد رجال

ساعتها حجيبك لايمكن اسيبك وراح تبقى عبره وتصبح مثال

حبهدل جنابك وحيكون عذابك ده فوق الاحتمال

وامرمط سعادتك واهزأ سيادتك واخلي كرامتك في حالة هزال

وتلبس قضيه وتصبح رزيه وباقي حياتك تعيش في انعزال

**mr_gawafa** · 25-07-2007 03:48 PM

جميييييييييييييييييل يا Esso بس يارب منتحبسش

**| **Silent Guardian** ●** · 25-07-2007 05:20 PM

ههههههههههههههه
شكرا يا Esso
و معلش انا عدلت شوية في اسم الموضوع
و اظن انتي فاهمة
سلام

**| **Alyaa** ●** · 25-07-2007 06:49 PM

ههههههههههههه
على فكره جميل مووووت الموضوع ده يا esso
ويارب تنزلي موضيع جامده كده علطوووول

**Messi** · 26-07-2007 07:02 AM

تسلم ايدك يا esso
بس ده الريس حببنا برضه مش كده
انا بقول كده عشان ما انحبسش معاكم( ببيع)
نحو مزيد من الجرأة

الموضوع: شعر من تأليف رئيس جمهورية لشعبه