للكوسة فى بلادى شئون

**$$ بسملة $$** · 24-10-2008 04:59 AM

للكوسه فى بلادى شئون

بتخلي المسنود فرعون

يتفرعن فين مهما يكون

وتخلي الجاهل أستاذ

والأعرج لاعب جمباز

وتخلي الأحول هداف

والكوره الآوت ف الجون

للكوسه ف بلادي شئون

لو تعرف واحد ف الشرطه

راح تخرج من أجدع ورطه

والراجل اللي انت ظلمته

تلاقيه متلقح مسجون

أو تعرف شخصيه كبيره

شغاله ف البنك مديره

راح تاخد من غير ضمانات

كام قرض بمليون مليون

وهروبك طبعا مضمون

ويا عيني لو تعرف نايب

ف المجلس مش نايب خايب

راح تبني أبراج وهميه

أوراقها مظبوطه أكيد

وفلوس الناس المهريه

حتجيلك م الجيب للإيد

بعديها تروح المستشفى

وتقيد نفسك مجنون

أحكامك تسقط ف ساعتها

بعديها ترجع موزون

ويا عيني لو تعرف شيخ

فجنابك طاهر علطول

وصيامك طبعا مقبول

وإذا فرضا حبيت تتجوز

تتجوز من غير مأذون

وإذا ساكن ف عماره جديده

وحبيبك راجل مسئول

فسيادتك من غير ما تقول

يركب لك فورا تليفون

ولو انت عندك عربيه

ونمرها سوده بنسرين

حتعدي أجدعها كمين

وحتكسر أوضحها إشاره

ماهو نمرك سوده جباره

ولا تعرف أيتها قانون

ولو انت بتعرف فرّان

أو واحد بياع جرنان

راح تاخد طلبك وحتمشي

من غير ولا دوشه ولا دور

والناس الغلبانه حتاخد

طلباتها بعدك وتغور

ماهو كله غيرك بيهون

ولو انت زميل الحلاق

راح تحلق اولها زبون

وإذا كنت بتعرف دكتور

حتعيش متطمن مسرور

وحتسلك ف لجان الشفوي

ومجال تعيينك موفور

وحتطلع فالتليفزيون

بالبدله وفيها الببيون

تتكلم وبكل بساطه

عن شرف المهنه المدفون

لكن لو شاعر غلبان

قلت اللي ف نفسك علطول

حيقولو مين قال لك قول

ويهاجمك مليون إنسان

**● **TiTaNiC LoVeR** ●** · 24-10-2008 11:20 AM

ههههههههههههه
جامده
يخرب عقلك يا بسمله
هى دى الكوسه بجد
شكرا على التوبيك

**| Mannora ●** · 24-10-2008 12:17 PM

والله القصيده جامده بتبين كل الاوضاع الكوسه فى كلمات بسيطه

شكرا بسمله

**رايق** · 24-10-2008 03:14 PM

**Spider GirL**(•'.'•) · 26-10-2008 07:26 PM

شكرا بسملة
والله الكوسة شغالة فى بلدنا كتيير

**..●●**آه...لو**●●..** · 26-10-2008 07:38 PM

بعديها تروح المستشفى
وتقيد نفسك مجنون
أحكامك تسقط ف ساعتها
بعديها ترجع موزون

انتي مش عاديه بجد انتي بتجيبي الافكار دي منين
بجد غايه في الروعه والجمال وانا عمري موصل عندي الابداع لهذا الحد ابدا بجد تستهلي تلت وردات

**محمد عزت حجازى** · 27-10-2008 12:25 AM

بسملة تقبلى كل تحياتى بجد انتى ما حصلتيش

جامدة جدااااااااااااااااااااااا ااااااااااااااااا

**عاشق البحر** · 27-10-2008 11:36 AM

جامده مووووووووووووووووووووووت
بجد ملهاش حل
شكرا بسمله

**ريحانه** · 27-10-2008 06:52 PM

شكرا بسمله
بجد جميلة

**$$ بسملة $$** · 07-12-2008 07:29 AM

هههههههههههه

المهم تكون عجبتكم الكوسة

يارب نخلص منها فى حياتنا ونعيش بضمير

نورتوا يا أحلى شباب ويا أجمل بنوتات

شكرا على الثناء والمرور الغالى

ربى يوفقكم

لكم منى أرق تحية

دمتم فى حفظ الرحمن