خد ايدى من ابويا لا هاتيها انتى

**Messi** · 14-08-2008 02:38 PM

كان يا ما كان ... كان بيحصل أيام زمان .. في أي وقت وأي مكان...وفي حاضرنا ومستقبلنا كمان.... لحتى كان..

كان فلان ابن فلان ماشي في الشارع..شاف فلانة الفلانية برضه ماشية في الشارع!!!!
راح بصلها بصتله....
ضحكلها وضحكتله....
كلمها وكلمته....

اتولد بينهم حب جديد من الشارع..
وقعد يمشي معاها 3 شهور
حبة على كبري قصر النيل
وحبة ترمس ولب وسيما ومناديل
قالها مقدرش ابعد عنك مقدرش اعيش من غيرك
قالت ولا انا ده انا حبيتك ومعاك في سيرك
قالها طب نعمل ايه ؟؟؟؟؟؟؟؟؟؟؟؟؟؟؟؟؟

قالت روح خد ايدي من ابويا...
بس هي عنده غالية شوية وتتاقل بالدهب
قالها انتي عارفة ظروفي
ده انا باخد من ابويا مصروفي
اديني انتي ايدك دلوقتي واهي ارخص
ولما يفرجها ربي
ارجعهالك واخدها من ابوكي باغلى الاسعار
وفلانة ما صدقت سمعت
لكنبرضه لازم تفهمه انها مش رخيصة اوي كده
قالت تعمل حبتين بس من جوة نفسها ومنى عينها
قالتله لا ده ابويا يقطعني
مش ممكن مقدرش
قالها وايه يعني
ما هو مش صدريله الطرش
قالت لا
قالها يبقى مش بتحبيني
ولا تتمني تحضنيني
قال لا خلاص انا موافقة
بس علشان بحبك يا .... ولا بلااش

وضربوا ورقتين عرفي
وبعدها بشوية كده
فلانة لقت نفسها امام الامر الواقع وحامل
تروله تقوله
يا ابن الحلال اتصرف
يقولها والله ما اعرف
انتي اللي جريتي ورايا
وحبيتي تكوني معايا
تقوله لو اختك حصلها مثلي
يقولها اخرسييي
اختي اشرف منك
وممشيتش ورا حد
تروح فلانة لاهلها وتعترف
كام قلم على كام شلوط على كام لطمة عالخدود
ويتمنوا تكون نهاية العمر الممدود
ويسمعوا خبرها قبل ما يحسوا بصدمة بلا حدود
يقعدوا يفكروا هيتصرفوا ازااي
والحزن يعزف لهم الحان الناي
حاولوا يتهاودوا مع فلان
لكن ميقبلش
يروحوا لعلان
عيل عبيط مبيفهمش
يجوزوهالو الصبح
ويطلقوها بالليل
وبعد كده
ولا كانه البت عملت حاجة
وتعيش في بيت ابوها مش لحد محتاجة
مرفوعة الراس معززة مكرمة
اهلها افتكروا انها مظلومة
وقالوا ان الحكاية محسومة
وخافوا على سمعتهم
وعلى جيرانهم وبيتهم
وحلوا المشكلة
وفجروا قنبلة
وقالوا تصبحوا على خير
ونامو وعاشوا بخير

وتوتة توتة
وتتعاد الحدوتة
والله يستر على بلدنا
من العادات المشحوتة

الموضوع منقول

**| Mysterious man ●** · 14-08-2008 02:55 PM

جميلة يا مسي
تسلم اديك يا احمد

**Wezooo**(•'.'•) · 14-08-2008 03:29 PM

شكرااااااااااااااا ليك يا مسى على الموضوع الرائع
بجد الوضوع ده مش عارفين له حل ودا بسبب ان الجواز بقى غالى
وطبعاااااا دى بسبب انهيار المجتمع واختفاء الدين
وطبعااااااااااا لازم كل بنت تتعلم من انا الولد الى يبدأ حياته بغلط يبقى
لازم تكون النهايه كده مشكله الجواز العرفى مش النهارده بس
لكن ما فيش بنات بتتعلم
وربنا يستر على وبلدنا
ويرجع الدين والاخلاق زى ما كانت

**● **Snow White** ●** · 14-08-2008 04:04 PM

دول ناس محظوظه ولقو لبنتهم حل رغم أن الحل بيغمى عيون الناس لكن بتفضل البنت صغيره فى عين نفسها و عين أهلها طووووووول العمر

تخيلو بقى لو ملقوش الجدع الأهبل إلى هيشيل تبقى البنت بقت لبانة الأهل و الجيران

الموضوع صعب

أكيد السبب الررئيسى فيه غياب الأخلاق و الدين و كمان المبالغه فى طلبات الزواج

ربنا يستر علينا و على أصحبنا وأهلينا

شكرا يا ميسسسى