انت لسه قاعد..الحق اتجوز اربعة ينفعوا وقت عوزة... الجواز ح يغلا

**Spider GirL**(•'.'•) · 10-08-2008 04:24 AM

الجــواز ح يغــلا

لا شك أن الكذب قديم لأن الإنسان قديم.. والكذب ولد من رحم الصدق، فالتصديق لابد منه لجريان الحياة.. فإذا سرت فى طريق واعترضتك لافتة مكتوب عليها ممنوع المرور.. لا بد أن تصدق، وإذا قالوا لك إن الأرض كروية لابد أن تصدق.. وإذا طلبتني في التليفون وقالوا لك مش موجود يجب أن تصدق

ولكن هل يصبح للحياة طعم اذا سارت هكذا صادقة.. كل ما فيها حقيقي وليس بها كذبة واحدة؟ أنا أكتب في نهاية خطابي إلى أي أحد عبارة: وتفضلوا بقبول فائق الاحترام.. وأنا لا أعرفه أساساً.. وأبدأ خطابي بكلمة:
عزيزي فلان ... وهو لا يعز عليّ على الاطلاق.. ولكن تخيل أن أبدأ خطابي بجملة: انت يا للي ما أعرفكش.. وأنهيته بكلمة: أحترمك لأني لم أعرفك بعد.. ستصبح مشكلة

والحياة لا يمكن أن تكون كلها جد.. الجد يقتل النفس والهزل يعيد إليها الحياة، ولذا اخترع البني آدم عيداً للكذب عمره نصف يوم يبدأ من نصف ليلة أول إبريل إلى منتصف نهاره.. يجوز للناس فيها استغفال بعضهم بعضا.. دون عتاب.. تتلقى هدية من صديق تفتحها.. تنفجر في وشك.. وهدية من صديق آخر لا تفتح أساساً..

يتصل بي فجأة وهو في قمة الانفعال.. ويهتف بي.. يوسف.. الحقني أنا مستنيك في آخر شارع الهرم أرجوك تيجي أنا فى ورطة كبيرة.. أجري بالسيارة وأذهب فلا أجد أحداً.. أو أجد شخصا آخر تعرض للمقلب نفسه

وقد نشرت جريدة أمريكية إنه في حديقة كذا في الساعة العاشرة صباحاً سيفتح معرض به خمسة آلاف حمار في مهرجان الحمير الدولى الأول، وذهب الذين صدقوا الخبر إلى الحديقة ورأوا آلاف الحمير.. أعني الذين صدقوا الخبر
لم يعد الكذب الآن هو أن تقول ما لم يحدث أو تخالف الحقيقة.. وإنما صار بعض الناس الناس يتنفس كذباً.. يعرق كذباً.. رأيتُها جالسة معه.. جميلة بلا شك.. وحينما سألني عن رأيي فيها.. قلت له مش عارف حاسس إنها كدّابة.. اعترض.. وسألني كدبتْ في إيه؟.. قلت له لم تكذب في شيء.. ولكن ردود أفعالها كذابة.. عينيها كذابة.. حركة إيديها كذابة.. شعرها كذاب مش قادر أصدقها

وأسوأ شيء حينما تحاول إحداهن أن تبدو صادقة.. طبيعية.. يا باي.. يا ساتر.. البراءة مفتعلة.. والبصة معمولة.. كل شيء مصنوع.. ولكنها على أيّ حال تجد في النهاية من يصدقها.. ربما لأنه أكذب منها
وأحدث كذبة سمعتها.. ولا أعلم إن كانت كذبة أم حقيقة.. شائعة كبيرة منتشرة أن الزواج اعتبارا من الشهر القادم ح يغلا.. يعني إيه؟

قال لي العامل البسيط في إحباط ومرارة: ح يدفّعوا الراجل اربعة آلاف جنيه تأمين، هو الشباب عارف يتجوز يا بيه لما يدفع تأمين؟.. وعشان كده كله بيتجوز دلوقتي قبل ما القانون ينزل.. أنا كنت متكلم على بنت خالتي.. كلام.. لما سمعت ده جريت وكتبت كتابي أول إمبارح.. وأختي ح تكتب بكره بالليل.. مع إنها لسه مجهزتش.. إنما خطيبها قال نكتب دلوقتي ونوفر الأربع تلاف جنيه إحنا أولى بيهم

وفي دمياط بقى ياباشا.. الجواز بالطوابير.. كله عاوز يلحق نفسه، ولعلمك المآذين بيشتغلوا برضه ماهو ده موسم بالنسبة لهم، وفي كفر الزيات البلد كلها سهرانة بتتجوز.. اللي شابك خلّص الموضوع بدري بدري.. واللي قاري فاتحة قوام قوام جاب المأذون

يقولوا السكر ح يغلا.. أمي تحول في سكر وتشيل.. يقولوا اللحمة ح تغلا.. الكل يخزن لحمة..

ولكن الجواز ح يغلا!!
ح تخزّن إيه بس؟!مفيش غير إن الواحد يشدّ حيله كده ويتجوز أربعة في الرخص ويخليهم.. ح ينفعوا.. مفيش حاجة بتخسر

- يوسـف معـاطي -

**Wezooo**(•'.'•) · 10-08-2008 04:55 AM

شكراااااااااااااااااااا ليكى يا اماااااانى على الموضوع الجميل ده
بجد الموضوع فوق الرائع
واجمل مافيه انا كل مافيه حقيقه

**M@GO** · 10-08-2008 12:42 PM

شكراااااا يااسبايدر على الموضوع الجميـــــــــــــــل

**Boshaaa** · 16-08-2008 01:21 AM

موضوع حلو اوي تسلم ايدك اسبايدر

**Messi** · 16-08-2008 01:48 AM

جميل موضوعك يا امانى
والحياه لو فضلت كلها صدق على طول مش عارفين هيكون ليها طعم وللا لاء؟
بس زى ماقولتى الكذب اتولد من الصدق
بالنسبه للجواز انه هيغلى فبجد دى حاجه غريبه اوى
والله انا فى واحد اعرفه نزل من الجيش اتجوز ورجع تانى الجيش عشان يوفر ال4الآف جنيه

شكر ع التوبك

**Hot Ice** · 09-09-2008 05:42 AM

بصراحه انتوا الاتنين أجمل من بعض !

قصدي انتي والواد ابو المعاطي ده ..فعلا مالوش حل

بس ايدي بتاكلني اعترض علي جملة ( الكذب ولد من رحم الصدق )

عدا ذلك الموضوع زي الفل فعلا وواقعي جدا

ويارب يطبقوا القانون علشان اتجوز 14 مش 4 !!