هى ايه ؟

**فراشة الاسلام** · 09-08-2012 06:40 PM

مصر هي النيل بيجري
ولا دم شباب حزين
مصر هي املنا بكرة
ولا صرخات الانين
مصر امن امان محبة
ولا كره الحاكمين
مصر عيشة وبكرامة
ولا قتل الغلبانين
مصر جيش يضرب و يجري
ولا مصر شهيد امين
مصر بلد الطيبين
ولا بلد المقتولين ....المسحولين
مصر فيها مثقفين
ولا كله بلطجية و مأجورين
مصر ليهم ولا لينا
ولا تبقى ارض مين
نفسي اعرف بس حاجة
دايما احنا الغلطانين
جيش و شرطة..مضروبين
حكم عسكر او مبارك متهانين
طب قولوا لي اروح لمين
مجلس الشعب ال لسه ما اتعملش اهو اتحرق
و الشعب من كتر الخناق و الدوشة حقه يتخنق
نفسي ما ارويكيش بدمي
بالعرق او بدم اللي سرق
نفسي انسى الماضي و ارتاح م الوجع
نفسي اقول المصري اهو حقه رجع
نفسي احس اني مواطن
مش حسالة و مش زبالة
نفسي اشوف فيكي عدالة
نفسي يبقى مافيش بطالة
نفسي ابني لك حضارة
عمري ما هاحرق ف مجلس او وزارة
فهميني انتي بلد الاهرامات
ولا دي كمان اشتغالة

بقلم /e.m

---------- تم إضافة المشاركة في 05:40 PM ---------- المشاركة السابقة كانت في 05:38 PM ----------

دى قصيدة كنت كتبتها من فترة لكن فى قصيدة حايا بكتبها عن اللى حصل فى رفح

**Wezooo**(•'.'•) · 10-08-2012 03:58 PM

ةالله يابنتى انتى فنانه بجد كلام جميل جدااااااااا
وانتى قولتى اللى جوانا بجد دى مش معقول يبقى اللى كاتب ده لسه جديد يا اما انتى بتلطشيها من حد
انا بهزر على فكره بجد جميله جدااااااااااا
واستمرى

**فراشة الاسلام** · 10-08-2012 04:55 PM

ميرسى يا ويزوو على زوقك وانا فرحانة انها عجبتك ونفسى بقية الاعضاء يقرؤها ويدخلوا بقى على المنتدى

والله لسة مبتدأة بس أنا مجنونة شعر قريت لناااااااااس كتيييييييييييييييييييير اوى وخصوصا لصلاح جاهين

وعارفة انك بتهزر بس انا ملطشتهاش من حد

ونورت التوبيك وان شاء الله هستمر

**Wezooo**(•'.'•) · 10-08-2012 05:08 PM

ياريت الاعضاء ترجع تانى بس انتى عارفه الفيس بقى
لان لو رجعوا انا متاكد انهم كلمهم هتعجبهم وهيقولو كلام احسن من اللى انا قولته
انا قولت كده لما لاقيت الشعر جميل قولت هتلاقيها بتقرا لى ناس كتير
اصل الاسلوب جامد جدااااااااااااااا
مش اسلوب عادى ولا حد مبتدا خالص
وبجد بسجل اعجابى تانى مره