فـــ إيديك الاتنين

[ابو اسكندر]

مش كل لغات الدنيا حروف
ولا كل عيون بتحس النور ...
تقدر ع الشوف

إنما بالحس تعدى خيال
عناقيد م الفكر بتربط كل حدود العالم
شرق و غرب
ودا حال الكون

ولقيتك جنب الحيط تواريخ
بتعافر لسه ف قلب الريح
شخابيط بتدارى جمالها الناس
وسواس ف حواسهم ...
بيزن
وضهور م الشيله عماله ...
تئن
مش معنى سكاتك يعنى خلاص ...
الكل اتجن

من يوم الليله اللى إحنا بدرنا
الخوف م الخلف
وبدرنا بذور الفول قدام
والشاي ع النار
والجبنة ليلتها بتحضن آخر رصة عيش
قمنا نبله بسهر الليل

اتمطع ... شق الأرض الفول
وادارى الخوف م الخوف لَـ يبان
ورسمت ف إيدى طلوع الفجر
ساعتها ضحكت عليا عشان
مارسمتش شمس ....

ولقيتك ماشى ترش كلام
وحروفك طايحة مابين النايم
و الفارد رجله ف قلب الشارع
و الرجل التانية ف ليل امبارح
و مكنتش سارح

بس كلامك ...
خدني سنين تانيه لقدام
إعدام الحرف لا يمكن يبقى شريعة و سنه
بستنى الحنة
بتمنى تلون وش وشوش
وتجيى يا صبح فى ايدك فرحى
وتنزل على احزانى ستارة ...
الختام

واخدنى ف ديل جلابيتك فين ما تكون
بتحـزّم رحلة يومك ف المنديل
و بشيلها معاك
و تشيلنى لما الحيل ...
يتهد
تعقدلى دماغى بنص فانلة صوف
ف عرفت معاك ايه معنى ...
الضد
ماتزيدشى عليا الرحلة ...
تعبت
و ارتاحت منى خلاص
الروح
م الصعب عليا أقولك
روح
و تسيبنى ازاى مع إن الروح

ف إيديك الاتنين

**********************

أحــلــى ســـلام

[اغادير الوله]

لصعب عليا أقولك
روح
و تسيبنى ازاى مع إن الروح

ف إيديك الاتنين

الله الله بجد رائع سطور قلمك بانتظار جديدك بفارغ الصبر

[ابو اسكندر]

ميرسي يا منى

[كوكى]

الله يا حسن تسلم يا قمر

[ابو اسكندر]

ميرسي يا نونه