الشباب يعمل ايه

[ابو اسكندر]

الشاب يعمل إيه

ياللي ظلمتوا البلد .... وظلمتوا أولادهــــــا
نازلين عليها هدد .... وتهدِّدوا وجودهـــــا
خيْراتها من غير عدد .... قـُمتوا بتبديدهـــا
وشبابها يوم مااتوَّلد .... نازل ف إيدُه قيـود
ــــــــــــــــ
مين في البلد مسئول .... راعَى حقوق الغير
يجعل إيديه بتطـُول .... من بلدُه حَبَة خيـــر
يعمِل بدون ما يقول ... مش يسعَى للتصوير
أو يتقِن التهويل ..... في كتابة التقريــــــــر
بكلام يكون معمول .. بحاجات ماليها وجود
ـــــــــــــــــ
يبقىَ الإيراد مسروق .... ويقول عليه كسبان
وبكل قلة ذوق ...... بيجيب كمان برهـــــان
ويزيد عليه ويسوق .... في الكِدب والبُهتــان
وان جت لِجان من فوق .. تلقى الرصيد خربان
والمخزن المحروق .... ولـَّع ما شافـُه شهـود
ـــــــــــــــــ
مشاريع كتير تنعَمل .... لاكن بدون عايـــده
وبدل زراعة الأمل .... تلقى النفوس قايــــده
الخطة ما بتكتمَل ...... وتضيع بدون فايـــــده
ويقولوا أصل العِلل .... سكان كتير زايــــــده
آخرتها يظهَر خلل ..... ف الخـُطه والمـردود
ـــــــــــــــ
قالوا الصحاري كتير .... فوق التلـَت تِخمــــاس
والخـُمْس وادي صْغِير .... مزحوم بكل النـــاس
وعشان يكون فيه خير .... لازم نشيل الفــــاس
ووزارة التعمير .... فيها الخطط أكـــــــــــداس
لاكن نهاية الدُور ..... نلقى الطريق مســـــدود
ــــــــــــــــــ
وان جه رجُل أعمال .... لاكن نزيه وأميـــــن
بينفذ الأعمال ...... من غير سلف أو ديــــــن
هيلاقي ميت موَّال ...... من تعليمات وروتين
يصرف ف راس المال .... ع الرسم والتأمين
آخرتها تلقاه قال ..... عمره ما يوم ما يعــــود
ـــــــــــــــــــ
أموال بنوك تنسرق .... على بره وبتهْــــرب
والناس هنا بتنحرَق .... خايفة البلد تِخـْــــــرب
مليانه غم وقلـَق .... عايشه ف ظروف أصعب
رغم ان كوننا اتخلق .... بالأكل والمشـْـــــرَب
لاكن لصوصه ف سبَق .... واللي سبق بيسُـود
ــــــــــــــــــــ
الشاب يعمِل إيــــــــه .... وهموم مَلِت بالــُــــه
هيعيش حياته بإيــــه ..... ويجيب منين مالـــُـه
إدُّوا الشهاده ليـــه .... وسابوه يشوف حــالـُـــه
لاكن وظيفة بيه ......... للي النقيب خالـُــــــــه
واللي مالوشي عليه ...... بالخالق المعبـــــــود
ــــــــــــــــــــ
ليه الشباب ينهـــــان ...... ليه تظلموا الخريـج
ليه حالة التوَهَـــــان ...... واللِعْب والتهريــــج
الشاب دا إنســـان ........ مش حاجه للتتليــــج
ليه تجعلوه فقران .... عايش بحال معــــــووج
مش مِنـَّه أو إحسان ...... إنه يعيش مسعــــود
ــــــــــــــــــــ
الشاب بعد اليأس ...... إللي عليه ظاهـِــــــــــر
من بعد حالة بؤس ....... ميقِرِّهاش كــــــــافِر
وسببها عقدة نقص ...... من إعتداء سافــــــــر
ساب المرار في الكاس ..... مليان وراح سافر
أصبح هناك كالتِرس ..... طول النهار مكـدود

***************

__________________
ابو اسكندر

[كيوبيد]

آآآآآآآآآآآآآآآآآآآآه والنبي ياخويا قول..
ههههههههههههههههه
بجد انت روعة

[ابو اسكندر]

ههههههه عجبتك اوى دى

[كيوبيد]

ههههههههههههههههههه..
اه

[Eshoo_m7m]

:wa::wa::wa::wa::wa:

قووووول ماحكومتنا لا ترى ولا تسمع ولا تتكلم ,,,, بس برضوا قووووووول
:32::32::32::32::32:
توبيك جمييييييييييييييييييييييل ياسكندر

[ابو اسكندر]

ميرسي شيمو على المرور

[مشاعر صادقه]

تسلم ايدك ياابو اسكندر

توبيك معبر أسعد الله ايامك

[ابو اسكندر]

ميرسي ليكي مشاعر على المرور