nokat * nokat

**Messi** · 16-06-2008 03:47 PM

مره ولد شاف قطه صغيره فى الشارع قال لاخوه
الولد : انا هاخد القطه دى وأغسلها وأربيها
الاخ : لو غسلتها هتموت

وسابه الاخ ومشى ورجع بعد ساعتين لقى اخوه بيعيط

الاخ : مالك يا حماده ؟
الولد : القطه ماتت
الاخ : مش قولتلك لو غسلتها هتموت !
الولد : ماماتتش وانا بغسلها .. دى ماتت وانا بعصرها

(2) مدرس بيسأل التلاميذ فى الفصل
المدرس : اللى شايف نفسه غبى يقوم يقف
بعد شويه وقف تلميذ
المدرس : وليه بقا يا سيدى شايف نفسك غبى ؟
التلميذ: اصلى محبتش اشوفك واقف لوحدك يا استاذ

(3) الاستاذ : فى اى فصل يسقط المطر ؟
التلميذ: فى الفصل اللى مالوش سقف

(4) التلميذ: بحبك يا أبله وعاوز اتجوزك
المدرسه : بس انا مش بحب الاولاد الصغيرين
التلميذ: وانا مش مستعجل على الاولاد

(5) مره مدرس عربى بيملى التلاميذ
المدرس : " ذهب احمد الى حديقه الحيوان يوم الأربعاء "
التلميذ: الأربعاء بالهمزه على السطر ؟
المدرس : خلاص خليها الخميس

(6) المدرس : ماهى انواع الاقمار ؟
التلميذ: قمر طبيعى _ قمر صناعى _ قمر الدين

(7) المدرس : كم عمر ابوك ؟
التلميذ: والله مش عارف بس هو من زمان عندنا

(8) مره طفل بلدياتنا راح للبقال
الطفل : عمو عندك الشيكولاته ام ربع جنيه ؟
البقال : ايوه عندى
الطفل : بكام ؟

(9) طفل كل يوم يروح للبقال
فى اليوم الاول
الطفل : عندك جبنه يا عمو ؟
البقال : ايوه يابنى
الطفل : طيب هاتلى حلاوه
فى اليوم التانى
الطفل : عندك بيبسى يا عمو ؟
البقال : ايوه يابنى
الطفل : طيب هاتلى عصير
البقال زهق وراح يشتكى لوالد الطفل
الاب : متزعلش . المره اللى جايه اضربه .. عندك عصايه ؟
البقال : ايوه عندى
الاب : اديله قلمين

(10) مره ولد بيسأل امه وهى حامل
الولد : ايه ده يا ماما
الام : ده اخوك يا حماده
تانى يوم الولد راح المدرسه
المدرسه بتسأله : انت ليك اخوات ؟
الولد : كان ليا بس ماما بلعته

(11) بنت بتسأل امها
البنت : هو بابا بيعوم يا ماما ؟
الام : بتسألى ليه يا حبيبتى ؟
البنت : اصلى سمعت بابا بيقول للشغاله انا غرقان فى حبك

(12) مره واحد بخيل ابنه بيقوله :
الابن : بابا انا عاوز ربع جنيه
الاب : ايه ! 20 قرش
اجبلك منين انا 15 قرش
معايا 10 قروش
تاخد 5 قروش

(13) طفل بيسأل ابوه
الطفل : بابا هى البيضه بتمشى ؟
الاب : لأ
الطفل : طيب اشمعنه انت لما تيجى تنادى على ماما تقولها تعاليلى يا بيضه ؟

(14) اب شاف ابنه قاعد لوحده سرحان ... فسأله
الاب : مالك يابنى ؟
الابن : عندى مشكله كبيره اوى يا بابا
العيال اللى قدى اللى بلعب معاهم دلوقتى لما يكبروا
هلعب مع مين !

(15) حلاق وابنه بيتفرجوا على ماتش كوره
المذيع : وكوره حلوه شطها بمشط رجله وجت فى المقص
الابن : الحق يا بابا دول بيلعبوا فى العده !

(16) واحد عصبى اتجوز واحده عصبيه يوم الولاده
الولد قال للدكتور : وسع انت .. أبعد .. ملكش دعوه بيا .. انا هنزل لوحدى

(17) واحد بيستهبل اتجوز واحده بتستهبل خلفوا ولد نزل عمل نفسه ميت

**mr.lonly** · 16-06-2008 05:07 PM

موضوع فانتستيك تسلم مجايبك يا احمد

**Spider GirL**(•'.'•) · 16-06-2008 05:33 PM

هههههههههههههههه
جامدة جدا
ضحكتنى وانا عايزة اضحك اصلا هههههههه

**● **Snow White** ●** · 16-06-2008 06:34 PM

هههههههههه نكت خفيفه

**● **TiTaNiC LoVeR** ●** · 16-06-2008 07:24 PM

هههههههههههههه
جامدين مووووووووووووووت
بس اللى عجبتنى اوى

شكرا يا ميسى على التوبيك

**7oDa_elray2** · 16-06-2008 09:23 PM

شكرا يا ميسى على التوبيك
برفكت يا بنى والله

**بسكوتة** · 16-06-2008 09:24 PM

(11) بنت بتسأل امها
البنت : هو بابا بيعوم يا ماما ؟
الام : بتسألى ليه يا حبيبتى ؟
البنت : اصلى سمعت بابا بيقول للشغاله انا غرقان فى حبك

هههههههههههههههههههه

ودى كمان واحدة

طفل وجارته
الطفل : لو سمحتى يا Tunt ورينى لسانك
جارته : ليه يا حبيبى ؟
الطفل : أصل ماما بتقول لسانك زى العقربة

نكت حلوة يا ميسى ميرسى

[/quote]