حكاية بنت عصريه هابلااااااااا !!!

**Hot Ice** · 25-05-2008 06:02 AM

عارفين ايه احساس واحده و هي ماشية في الشارع و تحس ان

حد معجب بيها..مش معاكسه يعني و كده ..لأ بيبقى فيه كده كيميا زي مابيقولوا الأجانب ..و على فكرة فيه جوازات كتير بتبدأ كده ...واحد يشوف واحده في الشارع..يمشي وراها ..يعرف ساكنة فين و يسأل عليها و يخطبها ..ابن عمي عمل كده ... المهم دي بس مقدمه ..

المهم أنا يوم نازله من البيت رايحه الشغل..حسيت بكيميا م اللي كنت بقولكم عليها دي ..حسيت ان فيه عين هتخرم قفايا ..اتديرت بسرعه كده في الخباثة لقيتلكم راجل انما ايه .. طول بعرض بارتفاع. ماسك ف ايده شنطة سودا و لابس بدله و كرافته و نضارة شمس....عامل كده زي العيال اللي كانوا بيطلعوا في إعلانات جمعية شباب المستقبل بتاع جمال مبارك فاكرينهم؟..
المهم الواد كان حليوة وانا قلبي هفهفله أول مالمحته ..استنيت شوية ع المحطه و بعدين جه الميكروباص..ركبت راح راكب ورايا..قلت الشياكه دي كلها هتركب مكروباص ؟

ليه يعني..أكيد في الأمر إنا ..و جه كمان قعد جنبي ... (.يا حلولي ياحلولي ).. بس كنت خايفه ليعاكس و ساعتها أنا ماعرفش أبويا ..باللي ف رجلي و لايهمني لا شباب المستقبل و لا مين بالذى .. ولا حاجه أبدا..
بس لاقيته في نص المسافه كده ..بيميل عليا و بيقول باسلوب رزين كده ...لو سمحتي ممكن أسأل حضرتك على حاجه ..؟
وانتوا ماتعرفونيش... بتسطل لما حد يقولي حضرتك ..بس برضه مش سهله يعني.. المهم صدرت الوش الخشب و قلتله

..خير بمناسبة ايه ؟...

يعني كنت عايز أسأل بس .. هو حضرتك مرتبطه ؟

..واضح انك مش مخطوبة ولا متجوزة .. مافيش دبل في ايديكي ..بس الإرتباط بأه لازم أتأكد منه من حضرتك .....(حضرتك تاني يا حلولي)..

والله الكلام ده مايتقالش في مواصلات و بعدين انا ماعرفكش و مش متعوده أكلم حد ماعرفوش ..طب يعني أنا لو معجب بحضرتك و عندي نيه أتقدم رسمي ..أعمل ايه ..أصلي بصراحه متابعك من مده بس دي أول مرة أتشجع و أحاول أكلمك

.. ياحلاوة ياحلاوة متابعني من زمان ..ده واقع بأه..بس برضه على مين .. لازم أثبت ..

و الله لو حضرتك متابعني زي مابتقول تبقى عارف بيتي و

عارف بابايا ..هو الوحيد اللي ينفع يتكلم في المواضيع دي ..

..لو سمحت ماتحرجنيش اكتر من كده .. ( جامده جامده يعني )

... الحقيقة انت كده أثبتيلي اني أحسنت الإختيار ..

....ياسلام ياسلام..الله الله ..هو ده الكلام

..لحد كده الأمور كلها صح و مية مية .. صديته آه بس كمان

قلتله كلم بابا .. سيبتله سكه مفتوحه يعني .

الواد بأه التباع راح شاخط فيا في اللحظه دي .....الأجرة يا أبله والا هتركبواببلاش .. .يابن اللذينا .. دانا عماله أترسم من ساعتها تبعتر كرامتي كده ؟...جيت أمد ايدي جوه الشنطه لقيتلكوا الأخ بأه راح بسرعه مطلع فلوس و محاسبلي ..لأ مايصحش ..لأ بأه اسمحيلي ..أنا لا يمكن أقبل واحده هاتقدملها تدفع و انا موجود

وجون وجون وجون ..هيتقدملي خلاص !

أيوة كده هو انا صحيح ماعرفش هو بيشتغل ايه و الا عايش فين والا بيقلد فنانين والا ايه نظامه بس الجواب بيبان من عنوانه .

أول ما المكروباص وقف لقيته نزل معايا في نفس المحطه و بصلي و قاللي ..أنا حبيت أنقذك يعني في المكروباص ..واضح قوي انك ماعاكيش فلوس...!!
الدم ضرب في نافوخي .. وله انت هتتمنظر عليا ولا ايه !

..واضح ان شنطتك فاضية آخر الشهر بأه يالا وفرتلك أجرة

المكروباص تنفعك ..بصتله بذهول كده و قلت له ..مين اللي قالك الكلام الفارغ ده ..انا عمري مامشي بشنطتي فيها أقل من 300 جنيه.. ! قالي باستهزاء كده ..لاااااماصدقش..
الدم كان خلاص قرب يطلع من نافوخي زيالنافورة..رحت مطلعه كل اللي في المحفظه مورياهولي ..أهه حتى شوف

50-100-200-220

لقيته مد ايده اخد الفلوس..و بصلها كده و عدها و قاللي آه صحيح انتي معاكي فلوس أهه

و في لحظه راح مطبقهم و حاطتهم في جيبه ..و قاللي انا هاخليهم معايا بأه سوفينير لحد لما آجيلكم البيت ..

ماستوعبتش و قبل ما آخد فرصة أقول كلمه واحده راح راكب ورا واحد على موتوسيكل شكله كده كان ماشي ورا المكروباص و هوا .. فص ملح و داب !!

أختكوا بأه واقفه في وسط الشارع هابلاااااااااا .. زي اللي اتدلق عليه جردل مايه مش نضيف..مش عارفه أصوت والا أطلع أجري وراه والا ألطم على وشي ......فضلت واقفه يجي خمس دقايق في الشارع مش عارفه اروح فين والعربيات تقعد تزمرلي .. وانا ولا هنا ... مسهمه كدا وهابلااا

تقريبا اللي سايقين يقولوا في نفسهم دي يا اما طارشه يا اما مجنونة يا اما م اللي بيبيعوا مناديل .. و الناس تعدي

تبصلي... و العيال الصغيرة يشدوا في هدوم أهاليهم .. بابا بابا هي الست دي عامله كده ليه؟

بعد شوية كده لفيت و دخلت المستشفى اللي باشتغل فيها ..و على وشي تعبير كده زي تعبير العمده الآلي بتاع زمان ..دخلت الصيدلية..قعدت ع المكتب ..و فجأه .....انفجرت في العياط ..و العيال زمايلي اتلموا حواليا..مالك ..فيه ايه؟...حد زعلك ..حد كلمك؟

من بين العياط و الشحتفه ما اقدرتش أقولهم غير كلمه واحده اتسرقت !!!

ملطوش طبعا .. للعظه لنون النسوة !

**بسكوتة** · 25-05-2008 01:28 PM

هههههههههههههههه

دى مش بس هابلااا

دى كمان غبية هههههه
شكرا يا هوت موضوع جاااامد

**Spider GirL**(•'.'•) · 25-05-2008 04:41 PM

هههههههههههه
جامد بس ..
اية موضوع دخلت الصيدلية دى ( قصدك انها صيدلانية يعنى ) وانضحك عليها ههههههههههههههه

شكرا احمد

**Haneen** · 26-05-2008 03:05 AM

هههههههههههههههه بلي في رجلي ايه ده هههههههههههههههه يخرب مخك ياهوت اسمحلي بس تعرف والله جامده فعلا يسلموا بجد ربنا يحفظ بنات المسلمين اجمعين ويهدي شبابهم شكراااااااااا يا كابتن احمد

**Hot Ice** · 02-06-2008 02:55 AM

غصب عنها يا بسكوته معلش

وبعدين الاغراء كان قوي

نورتي الموضوع والله ..

**Hot Ice** · 02-06-2008 02:58 AM

ههههههههههههه .. تصدقي دا انتي ( اروبه ) بجد

لأ مركزة

بس مش كل الصيادله كدا طبعا

( فيه اعفاء ضريبي لطوال القامه )

**Hot Ice** · 02-06-2008 03:03 AM

هههههههههههههههه ... طب دا انتي بالذات يا حنين

استحاله تعملي كدا ( قال بللي في رجلي قال )

دا انتي اول واسرع واحده تعيط

نورتي الموضوع يا حنين وربنا يتقبل دعوتك الجميله

**Spider GirL**(•'.'•) · 02-06-2008 05:16 PM

هههههههههههههههه
ربنا يسامحك ياللى فضحانى كدة دايما ( يا قزعة يا ... ربنا يوفقك )

**Haneen** · 03-06-2008 03:02 AM

هههههههههههههههه ... طب دا انتي بالذات يا حنين

استحاله تعملي كدا ( قال بللي في رجلي قال )

دا انتي اول واسرع واحده تعيط

نورتي الموضوع يا حنين وربنا يتقبل دعوتك الجميله
يسلام؟؟؟؟؟؟؟؟؟؟؟ ليه بقي يا كابتن قصدك تقول انو حنين ارق كتير من انها تعمل كده طبعا ههههههههههههه ماااااااااااااااااااااشي يا احمد مردودالك (قال اول واسرع واحده تعيط قال ) في المشمش ههههههههههه