علمني..وهعلمك...افتكرك ...وتفتكرني..برجاء الاهتمام والمتابعه

**ReRe** · 10-05-2008 06:16 PM

السلام عليكم ورحمة الله وبركاته

مساء الخير علي احلي شباب

جايه النهارده ومعايا فكره جديده

من تفكيري الشخصي...

ان شاء الله تعجبكم..

الفكره با اختصار اننا هنا هنتعلم من بعض

بيتهيالي احنا بنقضي مع بعض هنا فترات طويله

فاصبح المنتدي اكتر مكان ممكن نتعلم منه وفيه

فايه رايكم كل واحد عنده معلومه جديده ييجي يقولهالنا

كل واحد قري كتاب او سمع محاضره او اسطوانه واتعلم منها حاجه مايبخلش علينا بيها

كل واحد فينا لفت نظره معلومه في توبيك علي الانترنت بدل ما ينقلنا التوبيك

ينقلنا اتعلم ايه من التوبيك ده

كل واحد سمع خبر جديد يعرفنا بيه

ونناقشه

بكده هنمي تفكيرنا

هنتعلم جديد
واللي هنتعلمه من بعض عمرنا ماهننساه

لاننا هناخد المعلومه بحب

وهناقش الفكره بحب من غير مانحس اننا مهاجمين من حد مش فاهمنا

اللي اوحالي بالفكره دي كذا شخص حواليا قربوا مني وعلموني حاجه

كل ما باجي اطبقها بفتكرهم

وهفضل افتكرهم طول مانا بستفيد باللي علمهولي

فانا فكرت اننا نعمل حاجه نفضل بيها فاكرين بعض طول العمر

وحتي بعد 20 سنه نقول ياه ده فلان مره قالي كذا وكان عنده حق

ياريت الفكره تنال اعجابكم

والاقي استجابه

وشكرا ليكم

**ReRe** · 10-05-2008 06:27 PM

وانا هبدا...

وهتكلم عن التسامح

وطبعا مش هتكلم في نقطة ان الله غفور رحيم

ولا هتكلم في مدي تسامح الرسول عليه افضل الصلاة والسلام

علشان كلنا عارفين

هقولكم مثل صيني قاله دكتور ابراهيم الفقي في احد محاضراته

اذا قررت الا تسامح فحفر قبرين فبر لك وقبر للشخص الاخر

فاهمين يقصد ايه

مش هوضح اكتر من كده هسيب كل واحد يفهم المثل براحته

ويفكر بينه وبين نفسه

ياتري هو لو ماسمحش هيقدر يعيش...

ياتري اللي حواليه هيقدروا يعيشوا

؟؟؟؟؟؟؟؟؟؟؟

يلا اسيبكم مع تفكيركم
وياريت تنفذوا قراركم

بانكت تدوروا في الدفاتر القديمه

وترفع سماعة التليفون

او تمسك موبايلك ومسج من اللي بربع جنيه

تقول بس

مسامحك من قلبي

**| **Silent Guardian** ●** · 10-05-2008 06:31 PM

صباح الاختراعات
و احلى حاجة انها في وقت الامتحانات

التوقيت اللي كلنا بنذاكر فيه و بنلاقي معلومات غريبة بتظهر في وقت الامتحانات الواحد مكنش يعرف عنها حاجة طول الترم
ريري اسمحيلي ارفعلك القبعة على هذه الموضوع
و احد هذه المعلومات اللي اكتشفتها النهاردة
هي ان لو بحب اجمع رقمين مكونين من اربعة ارقام ثنائية , بستخدم 3half adder لو واحد full adder + واحد halfadder و انا اخترعت الحكاية دي النهاردة

**Messi** · 10-05-2008 06:42 PM

الفكره زى الفل يا ريري واللهى

بالنسبه لموضوع التسامح ده
المشكله ان دلوقتى الناس بتفهم التسامح ده غل
بمعنى دلوقتى واحد غلط فيا تمام
جه واعتذر
ماشى. انا سامحته
المفروض منه انه ميكررش اللى عمله ده تانى
بس طبعا ده مبيحصلش اللا قليل اوى .

بس برضه ده ميمنعش ان التسامح ده حاجه جامده اوى لو كلنا التزمنا بيها
الدنيا هيكون لها طعم تانى.

شكرااااااااااااااا مره تانيه ع الفكره
ومنتظرين المزيد

**Spider GirL**(•'.'•) · 10-05-2008 10:39 PM

يا افكارك يا رحاب بجد فكرة جامدة جدا
بالنسبة للتسامح
انا اعتقد ان التسامح قدرة وموهبه مش كل الناس تقدر عليها
والواحد بيسامح اللى عارف ان هو هيقدر التسامح دة
مش شخص هيعتبر التسامح دة ضعف
والتسامح بيكون والإنسان قوى وإلا بيكون أستسلام

**Hot Ice** · 10-05-2008 11:55 PM

ياهلا بالأفكار الريريه التعليميه والتفاعليه

وتعليميه علشان زي ماقلتي في مقدمتك الجميله

وتفاعليه علشان هتعمل نوع من الحوار وتبادل الافكار

ومن هنا بيكون التفاعل بين الاعضاء !

( اذا قررت الا تسامح فاحفر قبرين واحد لك والاخر لمن لن تسامحه )

هو حكم معنوي بالموت .. !!

انا لا اسامح فانا شخص ميت القلب والمشاعر !

والاخر في حكم الميت الذي يطلب الغفران ولايجده !!

هايل يا ريري .. واجمل الامنيات بدوام الرقي .. والارتقاء .

**● **Snow White** ●** · 11-05-2008 01:00 PM

أختراع هيجنن الالفيه القادمه يا اعلى دماغ (دا أنتى يا ريري):X

المهم أن عايزه أحكى والله بس ماما بتنادى شويه و هرجع أصدعكم سلام

**ReRe** · 11-05-2008 01:34 PM

طبعا مش هشكركم بئا علي مروركم وحركات من دي

لان التوبيك مش بتاعي انا التوبيك بتاعنا كلنا

كل واحد هيطرح فكره او هيقول معلومه يفيد بيها الباقي

ف اولا...مسي ...ماتنتظرش الجديد لان الجديد هيكون منك ومن باقي الاعضاء مش من ريري بس

ثانيا اماني...فعلا التسامح موهيه وقدرات

بس تعرفي اول حاجه تمي قدرتك علي التسامح حبك لله عز وجل ورغبتك في السمو الروحي
وانك ماتتدانيش لمستوي ااقل من المفروض المؤمن التقي يبقي عليه

هوت ايس...تفسيرك للمثل عجبني جدا
وانا عارفه انت قد ايه شخص متسامح علشان كده هقولك ربنا يديمها عليك نعمه

ضحي ..هستني صداعك ..بس هستني معلومه او فكره جديده منك مش هستني رايك في التسامح ..لاني سبت الراي ليكم كل واحد يفكر بينه وبين نفسه قد ايه هو يقدر يسامح

شكرا علي التفاعل يا شباب

بس منتظره اضافه وليس تعقيب فقط

**ReRe** · 11-05-2008 01:39 PM

وكالعاده هرجع وهبدا ..من تاني

والمرادي هتكلم عن فكرة ضياع الهدف

وهحكي موقف علي لسان دكتور ابراهيم الفقي

وهي ان ام راحت تستشيره بتقوله بنتي مابتصحاش خالص بتغلبنا علشان تصحي تروح المدرسه

فجاب البنت وقالها انتي عندك كام سنه قالتله 12 قالها مابتحبيش تصحي بدري قالتله لا

قالها بتحبي السفر قالتله جدا

قالها طيب لو قولتلك انك كسبتي رحله حوالين العالم بس هتصحي الساعه 4 الصبح

قالتله امتي الرحله؟؟؟؟

شايفين البنت ماكنتش بتصحي لانها مش شايفه انها هتصحي تعمل حاجه هي حباها فبتهرب في النوم

وده لان انت لما بتعمل حاجه مش عجباك او حاجه مفروضه عليك عقلك بيترجمها علي انها الم وبالتالي عقلك الباطن بيخليك تهرب منها علشان ماتوجهاش
زي احنا لما نفضل طول السنه نلعب ومانزكرش علشان مستصعبين المناهج
او بنقول ماكده كده هننسي ونرجع نزاكر تاني ايام الامتحانات كانها اول مره

وحاجات كتير بنخاف نقدم عليها لاننا من جوانا حطناها في خانة مسببات الالم فبنهرب منها

المهم المفروض دلوقتي انك تفكر بايجابيه في الحاجات اللي انت المفروض تعملها
ماتغمقهاش ديما بالعكشس حاول تشوفها انها هتنجح وانها حاجه حلوه
هتلاقيك من نفسك متلهف انك تنجزها

وياريت كل واحد يحدد بالظبط ايه اهدافه ويرتبها علي حسب الاهميه
ويحط اسباب هو ليه عايز يعمل الحاجه دي
وبكده هيقدر ينجزها في الوقت اللي هو عايزه
ومافيش حاجه هتقف قدامه

وبرده قال حاجه جميله جدا في المحاضره دي
ان اليس في بلاد العجايب بتيجي اثناء القصه بتسال القط شرشر بتقوله هو منين يودي فين قالها انتي عايزه تروحي فين قالتله مش عارفه قالها يبقي كل الطرق هتودي هناك..

فاهمين يقصد ايه؟؟

طول مانت ماشي كده من غير هدف.. يبئا كلها زي بعضها

وبث انا كده خلصت

يلا بسرعه اكتب اهدافك في ورقه ورتبها واكتب اسبابك انت عايزها ليه
وثق في الله سبحانه وتعالي
وامشي ناحية هدفك وهتلاقيه هو اللي بيجري عليك

وشكرا مع تمنياتي لكم بمزيد من التفوق والنجاح

**Messi** · 11-05-2008 02:32 PM

يا سلام عليكى يا ريري
جامده اوى النقطه بتاعت الهدف دى
وجت فى وقتها على فكره والله
وكمان نقطه ان الواحد يحب الحاجه كنت محتاجها موت عشان طبعا اليومين دول مفيش مذاكره
فاان هضحك على نفسى وهعمل انى بحب المذاكره بالذات ماده النظم اللى هذاكرها دلوقتى يمكن ربنا يصلح حالى واقعد اذاكر.
كلامك زى الفل والله يا ريري
ويارب تفضلى تفدينا كده على طول انتى والدكتور ابراهيم الفقى