يا شعب مصر ليست غير ابيض واسود والوان ( اهلا يا حكومة )

[ابو اسكندر]

السلام عليكم ازيكم جميعا
مصر ابيض واسود والا الوان؟
وهي: بتسالو عن الاخلاق في الشارع المصري؟
ازاي وسط الزحمه من العربيات والزحمه والدخان والكلاكسات
تحبو نبدا منين الحكايه؟
تعالو نبتدي من الشارع نفسه نقول سؤال بسيط كام واحد بيلمع جزمته ع الصبح والله يا بخته اللي يعمل كده وبيتحسد لان مبقاش لها لازمة لا والبنات شالو الشرط ده من فارس احلامهم ده لو حد نفسه مفتوحه وبيحلم او حد بيتقدم
تعالي بقي لنزل الشارع ياللا بقي وريني شطارتك وحاول تعدي بقي مستحيل طبعا من سواقين الميكروباص الحلوين اللي هما عبارة عن ناس بيطيرو وكانهم جاين من المريخ او الفضاء ولو طلعت جرئ وعديت تبقي عينك في وسط راسك

ياللا بقي ندخل جوه شويه يعني في مكروباص او اوتوبيس عينك ما تشوف غير النور
يا تري هتلاقي ايه؟
مش هتري طبعا لسبب ان الرؤيه منعدمه ومنغلقه علي قفا الباشا اللي اسعدك الحظ ووقف قدامك وياسلام لو واحد حشر نفسه في وسطيكم اصلها ناقصه بقي انت بقي طبعا لو اظهرت لاسمح الله انك تعبان يبقي علي طول هيحطو السيخ المحمي في صرصور ودن سعادتك ونجيبلك ابو رجل مسلوخه غير طبعا التريقه علي سعادتك والافيهات لاننا شعب يحب النكته

ياللا نخرج من الاوتوبيس حاول تروح تدفع فاتورة التليفون اللي المولعه واللي انت اصلا مبتتكلمهاش المهم روح وادفعها هتلاقي جهاز الكمبيوتر عطلان ليه بقي لان المصلحه الموقرة مافيهاش غير جهاز واحد
غير بقي طابور العيش الصغنن اللي بيكون طوله شارعين بس
هسال سؤال صغنن حاولت توقف تاكسي قبل كده؟ها ايه اللي حصل طبعا لازم تستشيره في المكان اللي سيادتك عاوز تروحه ولازم يوافق وانت تقدم الرضا وبعدين هو اللي يقرر غير انه لازم يسالك عن الاجرة ويا ويلك وسواد ليلك لو انت مقولتش اللي هو عايزه يبقي مصيرك انه هيبصلك بقرف
طبعا ومش عايزين ننسي الدروس الخصوصيه وتسرب الامتحانات وغيرها

انا عارف اني طولت اوي بس انا حاولت اختصارها هي عندي كبيرة اوي
بس انا عايزة اعرف رأيكو انتو فعلا شايفين مصر ابيض واسود وا الوان؟

يا ترى الحكومة كان عندها حق فى ان مصر ابيض واسود والوان

[كيوبيد]

ابو اسكندر موضوعك هايل ...والحكومة طبعا لها دور...
بس بجد أنا ليّا رأي يمكن يضايق البعض...
وهو إن التصرّفات اليومية في حياتنا واللي منها كتير غلط....لها دور طبعا واكل واحد المفروض كمان يغيّر من نفسه ويربّي عياله ع الاحساس العالي..
وده ممكن يقلل حجم المشكلة شويّة....
والواحد يبقى حاسس إنه عمل شوية من اللي عليه

[ابو اسكندر]

عندك حق والله بس ياترى هتتحل كدا

[كيوبيد]

ابو اسكندر ...ممكن ماتتحلّش كليّا...
بس جزء كويّس منها هاينحلّ وكمان قوة صبرنا واحتمالنا احنا وأجيالنا للأزمات والنّكبات هاتزيد وتقوى...
والجيل اللي جاي يستحمل ويحاول يقدّم حلول تانية بِدُوره....

[ابو اسكندر]

كلامك كويس بس جيلنا احنا ليه دور عشان اللى جي بعدنا يكمل عليه

[كوكى]

اولا يا حسن توبيك اكتر من رائع
ثانيا انا رايي من راى امام
يعنى الحكومة عليها دور بس الدور الاكبر علينا احنا
احنا عندنا سلوكيات خطأ وللاسف بنربنى عليها اولادنا فبقت عادات عندنا خلاص
ربنا يسترها على البلد دى يا رب
شكرا جدا يا حسن على التوبيك الرائع ده

[ابو اسكندر]

عندك حق والله يا كوكي لحد لدوقتى راى امام متفق عليه انا وانتى اما نشوف هيبقى فى اختلاف من باقى الاعضاء ولا لا

[كوكى زمالك]

انا بقى شايف مصر بالالوان الطيف السبعة يعنى كل مكان فيها ليه لون خاص بيه يعنى شبرا غير مصر الجديدة غير الساحل الشمالى غير مارينا غير شرم كل واحدة من دول ليها حاجات خاصة بيها وشكرا يا ابوعلى على التوبيك الاكثر من رائع

[ابو اسكندر]

تسلم يا كريم على مشاركتك الفعاله تقبل تحياتي

[صوفى]

انا كمان رايى من رايى امام الحكومة مالهاش دعوة بتصرفاتنا اليومية يعنى مثلا الناس اللى بتبصق فى الشوارع ديه ولا سواق الميكروباص اللى لما بركبه بحس انى مش هنزل منه وياويلك ياسواد ليلك لوقلتله على مهلك اسمع بقى تريقة وانزل اركب تاكسى ومن مين من الناس اللى راكبه معاك ويقولولك ماتعاصبهوش تخيل . وياعينى بقى لو ركبت اتوبيس وواحد ضايقك وبتقوله مثلاابعد شوية يبقى ليلتك مش فايته وانا جيت جنبك انت وانت والناس اللى فى الاتوبيس معاه مش معاك انت وياعينى لو واحد بيشرب سجاير جنبك وانت مثلا مريض مرض صدرى وبتستاذنه يطفى السيجارة بكل ادب واحترام تعرف انا مرة حصلت معايا وبقول لواحد كده قالى انا اطفى السيجارة علشان خاطرك انت ليه يعنى وبصلى بقرفه كانى جربانه وماسالمتش من لسان الناس يعنى انت ماحدش عندك بيدخن يعنى ويعنى ماخالصتش.
بص ياحسن انا من رايى ان المشاكل والمضايقات اليومية ديه احنا السبب فيها مش الحكومة يعنى لو كل واحد خد باله من تصرفاته وماتعداش بحريته الشخصية على حرية الاخرين صدقنى هنبقى احسن من كده وكمان نغرس فى اولادنا ده قولى كده كام واحد بيقوم لشخص عجوز او ست مسنه فى المواصلات انا يابنت بعملها وبتبقى الرجالة والشباب والاولاد الصغيرين كمان والله العظيم قاعدين وانا يابنت بقوم واقعد الناس ديه بجد مابقاش فيه اخلاق ولا دين الناس بقى همها نفسها وبس ايوة الحكومة لها دور بس الدور الاكبر علينا احنا . والله المستعان
بجد مواضيعك جميلة جداااا ياحسن