نفسى أنام يا رب !!!.....وعليا امتحان @

[| سندباد ●]

نفسى أنام يا رب!!! ........وعليا امتحان@

طبعا دى حقيقة للأسف

وفى عز الاحتفال بأعياد الربيع زى مابيقولوا ،، المفروض ان احنا نقوم ونام عشان نذاكر وبس عملت بالنصيحة دى ونمت ،، وبعد ساعتين صحيت عشان أصلى الفجر ونذاكر بقى مانا عليا بكرة امتحان ......

المهم صحيت وصليت والحمد لله ،،،كله دلؤتى قشطة هشوف بقى هذاكر ولا.......
المهم لقيت نفسى تعبان ومش محصل كويس قلت لأ بقى ....أكل حاجة ...قعدت أدور وفى الأخر عثرت على طبق رز بلبن ... المهم مشيت حالى بيه وقلت يلا بقى نذاكر ،،،،،، مش جايب برده ما انا منمتش الا ساعتين قلت بلاش عطلة ونام أحسن عشان تصحى مركز ...............

ودارت عجلة الزمان – دى دقايق ولما ظبطت المنبه وكده - دخلت على سريرى عشان أنام واذ بضربات متتالية من دقات معرفش فين نازلة تدق وانا حاسس انها بتضرب على دماغى *يامصيبة انا عايز أنام* طب وبعدين قلت هتخلص فى الانجاز (ودا كله الفجر)

سكتت ،، الحمد لله
كويس هنام ،، لقيت الضرب شغال قلت حط المخده فوق دماغك ......ولا الهوى
دق دق دق دق
قلت: ايه ده ...دا وقته
سكت الصوت ،،، الحمد لله ألحق أنام
جيت انام لقيت الدق شغال – قلت يا خرابى-

على فكرة الناس كلها عندها اختراع اسمه خلاطات والحاجات دى ،،، بس هى زى ماتقول تنشيف دماغ وعايزة تقرف جوزها وعيالها وجيرانها

المهم سكتت قلت : عسل خالص...... ألحق انام
ولسه هنام كان فاضل هنيهة واروح خلاص
ولقيت الدق اشتغل من جديد وأكتر من الأول

ياربى
نفسى انام ...عليا امتحان

المهم انا عرفت الصوت طالع من بيت مين ،، وانا معايا نمر تليفونات المنطقة
رنيت ع البيت من ع الموبيل وانا على السرير
لقيتها بطلت ،، قلت يا واد يا حودة يا عبقرى – ماهى راحت ترد وانا طبعا فصلت –
قلت انام بقى ..... لقيتها رجعت تدق كأنها بتضرب فوق أم راسى وعارفة انى اللى برن

قلت يارب خليها تهدى 5 دقايق بس دا أنا بنام فى دقيقتين و38 ثانية.... ولا الهوى

قلت أجرب أرن تانى جايز تقع من ع السجادة ولا تتكعبل فى حد من عيالها يعطلها شوية وحصل انى رنيت وحصل انها قامت وفصلت ،،، لقيتها جت جرى تكمل ومش تتوصى بقى

يخرب بيت الهم

أعمل ايه؟؟؟؟ اروح أولع فى بيتهم ولا أخنق لهم عيل من عيالهم ،،،، عشان ينشغلوا شوية

يارب ارحمنى ......هى تدق وانا عايز ألطم ،،، لولا انى عارف انه حرام ...ولو قمت مش مذاكر

وقعدت تدق وانا متعذب ساعة ونص
كان نفسى .........ولا بلاش
المهم أنا كنت مصمم انى أنام برده –اول مرة اصمم على حاجة بالشكل ده-

أخيرا الصوت بطّل ...يا فرحتى يا هنايا !!!

واللى أظرف من دا كله ...فجأة لقيت الباب بتاع حجرتى انفتح وانا طبعا لسه مالحقتش انام ،،، فاذا بأمى بتقولى مش هتقوم بقى عشان تفطر وتذاكر بقى
طلعت لها من تحت البطانية وانا بصرخ مانا اتعقدت بقى ،،، ولسه هقولها روحى انتى ............ قلت: وانا لى دعوة ،، بصى انا مش قايم ..هذاكر فى الكتاب ده ..اهه ورحت راميه –هتقولولى بقى ايه ذنبها هى – معلش بقى.. مش لىّ دعوة،،

المهم
تعرفوا بقى
الست دى طلعت مين؟؟؟؟؟

ههه

الست دى أمى

يا ربى ،،،،
واللى أنيل من كده انى كنت مكسل أقوم أقول لها بطلى شوية صغننين بس
– لحسن هى كانت قاعدة فى شقة وانا فى شقة فوقيها –

وطبعا فى الأخر قمت ذى ال.......بطل طبعا
وقلت اكتبها بقى ماهى خربت خلاص
اه سلام بقى

عشان ورايا مذاكرة

[Hot Ice]

عارف ياسندباد لما قريت موضوعك اتمنيت ايه ؟؟

اقول ومافيناش من زعل ولا رفع قضابا ؟

اتمنيت يبقي في ايدي ( الشومه ) اياها واحاول اخدمك

واساعدك تنام .. ماتخافش هضربك بيها وانت مش اخد بالك !!

يارب بئا تعرف تنام !

[● همسة ●]

ههههههههههههههههههههههههه هه
لا تعليفق
ربنا معاك

[| سندباد ●]

اشكرك يا هوت على مرورك

بس ماتخافش انا قمت بالواجب
ونمت برده ولسه صاحى اهه

ادعيلى بقى عشان عليا امتحان بكرة وبعده وبعده وبعده

[| سندباد ●]

اه ما هو كان ساعتها لا تعليق
عادى ياما بيحصل!!!

بس لو تعرفى بقى انا كلت ايه ؟؟
كان اكل تحفة ........بس عموما انا خلصته

شكرا لمرورك

[| المقصرة في حق الله ●]

بتحصل

[| Silent Guardian ●]

اشد ما اكره
حد يقلق نومي
انا بقالي فترة طويلة نومي مش منتظم اطلاااااااااااااااقا

[| سندباد ●]

شكرا لمرورك مينى

[| سندباد ●]

شد حيلك يا بطل
انت داخل على ملاحم وامتحانات وقرف بعيد عنك

بس ما بلاش من البيضة اللى فى التوقيع دى


اه وشكرا لمروركم الكريم يا ماجيك مان

[Wezooo(•'.'•)]

ربنا معاك ياابنى