اعرف صاحبك و علم عليه

**Hegazy** · 13-04-2008 03:17 AM

السلام عليكم ورحمه الله

عاوز تعرف صاحبك

الاول لازم تعرف اننا كلنا فينا عيوب ومميزات

يعني كلنا بنجمع بين الصفات المتناقضه

كل شخص جواه جزء من كل الصفات

يعني حتلاقي جواك صفه الكرم والبخل

وحتلاقي الذكاء والغباء والشهامه والنداله

وكل الصفات موجوده بنسب متفاوته

والصفه اللي بتطغي علي باقي الصفات هي دي الصفه المميزه للشخصيه

تعالي بقي طبق الكلام ده علي صحابك

وحدد كل واحد ايه الصفه المسيطره فيه

صاحبك البخيل

تلاقيه دايما اخر واحد يحط ايده في جيبه وانتم قايمين من علي القهو
علشان تحاسبوا القهوجيه

صاحبك الغبي

اخر واحد يضحك علي نكته قالها واحد تاني وتلاقيه بيضحك بصوت عالي

صاحبك المغرور

دايما يتكلم عن انجازاته اللي عملها

ودائم التحدث عن المهارات اللي عنده

ومش عند غيره وتلاقي امكانياته اقل بكتير من طموحاته

صاحبك البكاش

الكذاب نسااي يعني يحكي لك حاجه النهارده

وتاني يوم يحكي لك نفس الحاجه بصوره تانيه خالص

صاحبك الندل

اول واحد يجري لما ابو البنت اللي انت ماشي معاها

يقفشك وانت ماسك ايدها

صاحبك الحقود

قليل الكلام علي وجهه ابتسامه مالهاش ملامح

تزيد الابتسامه دي لما تتمسك في خانه اليك

وانت بتلعب طاوله وهو بيتفرج عليك

صاحبك اللي تصاحبه

هو اللي تلاقيه وقت الضيق

اللي يحب لك الخير

اللي ما يزعلش لما يلاقيك ناجح

اللي ينصحك ويشدك ناحيه الخير والالتزام

اللي يزعل لزعلك ويفرح لفرحك

اللي يرد غيبتك

اللي تحس انه اكتر من اخوك

والمثل الشعبي بيقول

اعرف صاحبك وعلم عليه

يعني يا اما علامه صح او علامه اكس

مش كده ولا ايه؟؟؟

**Hot Ice** · 13-04-2008 03:30 AM

والله يا حجازي موضوع من صميم الحياة

وعرضته لنا بطريقه عصريه بسيطه جدا ومعبره جدا

لدرجة حستني اني قاعد سامع صوت الزهر اللي مش

باين من دخان الشيشه !! بجد عرضك رائع لحقائق

تمتليء بها حياتنا .. والمهم زي ماقلت هو الاختيار الصح !

تسلم ايدك واسلوبك الجميل

**Hegazy** · 13-04-2008 03:32 AM

ميرسى يا هوت على المرور و الرد و الراى اللى فى الصميم

**Messi** · 13-04-2008 11:35 PM

تسلم ع الموضوع يا حجازى
وانا علمت عليك خلاص

**Hegazy** · 17-04-2008 03:02 AM

ههههههههه قشطه يا مان

**| **Silent Guardian** ●** · 17-04-2008 03:05 AM

sankio حجازي
انا عملت زيك كده على فكرة من فترة
من حوالي سنة و نص
و صفيت كل اصحابي و معارفي
و الحياة فلة

**roooony** · 17-04-2008 03:43 PM

حلو اوى الموضوع يا حجازى
تسلم ايدك يا باشا

**Hegazy** · 17-04-2008 09:58 PM

نورت يا روووونى و ميرسى على المرور و الرد يا باشا

**● **Snow White** ●** · 17-04-2008 10:24 PM

طيب البنات بتاخد اكس ولا صح يا حجازى

سلم إيدك يابو حميد

**Haneen** · 24-04-2008 12:31 AM

اللي ما يزعلش لما يلاقيك ناجح

اللي ينصحك ويشدك ناحيه الخير والالتزام

اللي يزعل لزعلك ويفرح لفرحك

اللي يرد غيبتك

اللي تحس انه اكتر من اخوك

والمثل الشعبي بيقول

اعرف صاحبك وعلم عليه
صح ميرسي يا حجازي للموضوع حلو جدا