اسئلة رخمة بنتعرض لها يوميا

**pop_top** · 03-09-2009 10:38 PM

فيه أسئلة بديهية مالهاش اي لزمة في الدنيا

بنتعرّض ليها كل يوم من كل الناس

خلـونـــا نشــوف أمثلة***********

إنت في أوضتك .. على السرير وطافي النور ومتغطي

ييجي أخوك الظريف ويفتح الباب عليك ويقول : ايه ده انت هتنام ولاّ ايه ؟

(( أظن ده مش وضع الرقص !!! واضح ان انا هنام ,,, امال شايفني بستعد اجري ))

***********

انتم معزومين عند ناس ورحتو لبيتهم وأول ما فتحولكوا الباب يقول ابنهم الصغير: انتوا جيتــواااااااااااااااا ؟

(( لا لسه واقفين على الباب بنفكر نيجي ولا لاء ))

***********

والعكس : انت لابس هدومك و متأنتك و على سنجة عشرة وريحة البارفان واصله لاخر الشارع .

. وخلاص بتفتح باب الشقة,,

يجي حد من أهلك وينادي بصوت عالي : انت خااااارج ولاّ اييييييييييه

(( !!! لاء دانا لسه راجع و عاوز انام عشان خاطر اقابل حد في الحلم ))

***********

أو مثلا راكب العربية ودوّرتها وخلاص هتطلع ..

. يجيلك لك البواب ويخبطلك على الزجاج,, انت بكل ذوق تفتح الزجاج وتقوله : خير في حاجة؟

يقولك : انت رايح الشغل يابيه ؟

(( لا.. العربية واحشاني ))

***********

مثلا ماسك سماعة التلفون وقاعد تضغط الارقام يجي حد من أهلك ويقولك: انت هتتكلم في التليفون ؟

(( لا.. بتفرّج عليه ,, شكله عاجبني ))

***********

او صاحب ليك بيتصل على البيت بتعكم و تروح انت ترد عليه يقولك انت في البيت؟؟؟

(((( امال قاعد في الشارع انا و التلفون )))))

***********************

مثلا : ماسك مذكرة أو كتاب وقاعد تحفظ ومتحمس (أول مره بقى) .. جه حد وقالك: هاه.. قاعد تذاكر ؟

(( تقوم رامي الكتاب و تقوله لااااااااء بتفرج على الصور ))

***********

ربنا هاديك كده ... ماسك سبحة و عمال تسبّح ، يجي حد من البيت يعدي عليك ويقول: هوّه انت بتسبح ؟

(( لاء.. هفرطها و أسلقها ))

***********

ولاّ تعالــو شوفو قنواتنا واسئلتهم البديهية البايخة

برنامج اهداءات يتصل واحد يطلب أغنيه

ترد عليه ست الكوتكوته (المذيعة) بكل خفه ورشاقة : إنتا بتحب الاغنيّة ديه ولا ايه ؟

(( لاء.. طالبها اخنق على نفسي ))

***********

أو مثلا في العيد

المذيع : هههههه هههههههه هههههه نتعرّف بيك

المواطن : فلان الفلاني

المذيع :هههههه هههههه هههههه بتقول ايه للأهل ههه و صحابك ههه

وقرابيك هههه و للناس اللي انت مخاصمهم كمان ؟ هههههه هههههه ههههههه

المواطن : أقولهم كل عام وأنتم بخير

(( أكيد يعني مش هيقولهم البقاء لله ))

***********

,,,المذيعة الظريفـة : وياترى بقى هتعملوا ايه العيد ده هتقضوه ازاي ؟

أكيد بيبقى زيارات الأهل و الصحاب و تخرجوا تشوفوا مظاهر العيد في الشوارع

و تفسحوا أولادكم ونتصل بالمعارف نعيّد عليهم و نقولهم كل سنة و انتو طيبين

(( سبتيله ايه يقوله يارخمة ؟ ))

***********

والأسخف بقى ... الشلل الكبير.. لما المذيعين يكلّموا الاطفال

يقول المذيع للطفل : إنت بتحب ماما وبابا ؟

(( يعني أساسي الواد لسه ما طلعلوش عرق الندالة علشان يقول لأ ))

***NONIA*** · 03-09-2009 10:45 PM

ههههههههههههههههههههههههه
هههههههههههههههه
حاجه تشل
:ka:

**ali_202000** · 03-09-2009 10:46 PM

ههههههههههههههههههههههههه ههه
ونعم الاسئله

**see_1987** · 03-09-2009 11:58 PM

ههههههههههههههههههههههههه هههه

دانتا رخم اوي

هههههههههههههههههه
مرسي قوي صراح موضوع مميز مشكور وتقبل مروري

**ابرام** · 09-09-2009 12:13 PM

,,,المذيعة الظريفـة : وياترى بقى هتعملوا ايه العيد ده هتقضوه ازاي ؟

أكيد بيبقى زيارات الأهل و الصحاب و تخرجوا تشوفوا مظاهر العيد في الشوارع

و تفسحوا أولادكم ونتصل بالمعارف نعيّد عليهم و نقولهم كل سنة و انتو طيبين

(( سبتيله ايه يقوله يارخمة ؟ ))