أصدقائي أحبائي فلذات أكبادي ..
بالطبع كلكم عارفين إننا مقبلين على شهر كريم
حد فيكم ذكي هيسألني شهر إيه دا يا أبلة، أحب أقوله إنه شهر رمضان ..
وبما إنه شهر مفترج، كل سنة وانتم طيبين ومن ربنا قريبين، فأنا قررت إني أدلي بدلوي (جردل يعني) وآخد فيكم ثواب، وفي نفس الوقت يبقى في وقت مفيد نعرف فيه في كل يوم معلومة جديدة في مجال جديد ..
موضوعنا باختصار هو مسابقة صغيرة الهدف منها هو الإفادة قبل أي شيء آخر، ودا لإننا في مسابقتنا هنتكلم عن مجالات الإعجاز العلمي في القرآن الكريم ..
ويمكن نفس الشخص الذكي اللى سأل فوق يرجع يسألني مرة تانية بلماضة: اشمعنى ؟
أحب أقوله إننا يمكن بعيدين شوية عن الجانب العلمي عموماً في حياتنا، رغم إننا بنتعامل مع وسائل التكنولوجيا في كل لحظة، لكننا برضه بعيدين عن العلم بمعناه الحقيقي، وبعيدين أكتر عن معناه الديني وجوانب إعجاز القرآن والسنة في المجال العلمي، رغم إنه جانب مهم جداً، يمكن يقنع ناس كتير بشكل أكبر من اقتناعهم بالدين والعبادات نفسها ..
وعشان كدا قررنا نحن الأستاذة صفاء المحامية بالنقض والدستورية العليا وأمن الدولة والنيابة العسكرية، قررنا إنه يكون موضوع مسابقتنا السنة دي هو الإعجاز العلمي في القرآن الكريم ..
كل يوم هنتكلم عن وجه من أوجه الإعجاز، اتكلمت عنه آية معينة أو مجموعة آيات، وعلى أعضاء المنتدى الموقرين ذكر الآية واسم السورة التي توجد بها تلك الآية ..
نرحب بالاقتراحات ..
وتذكروا إن رمضان شهر الجود والإحسان ..
ودا معناه إننا كمان بنرحب بالتبرعات للجوايز للفائزين ..:4:
رفعت الجلسة !