شايف نفسك ازاى ؟

**| Bugs Bunny ●** · 12-03-2008 09:15 PM

هى الفكره عرفتها من برنامج
و هو انه كل واحد فينا يدخل يقول هو...

شايف نفسه ازاى ؟؟

سواء فى شكله او فى شخصيته او تصرفاته او فى اسلوبه

و انا هبدأ...

انا شيفه نفسى انسانه مزاجيه جدا يعنى ساعات بكون عصبيه جدا و ساعات بكون برده جدا , ساعات بشوف نفسى هاديه و ساعات شعنونه , ساعات اجتماعيه و ساعات انطوائيه خالص , ساعات كئيبه و ساعات مرحه
يعنى من الاخر انا معرفش انا ايه بالظبط ؟

**| **Silent Guardian** ●** · 12-03-2008 09:59 PM

ههههههههههههههه
حلو قوي الموضوع
و الاحلى كلامك عن نفسك
بس عيب الموضوع الوحيد , ان ممكن بعض الناس تتهم بعض الاشخاص بالغرور
المهم
بصي يا سيتي
بالنسبة ليا
انا شايف نفسي بني ادم يبان عليه انه طبيعي
مرح و بحب الضحك , و لما بضحك كتير بفتكر لحظاتي الحزينة , فاتضايق تاني
عشان كده متشائم في اغلب الوقت , خصوصا لما بكون قاعد على النت
بحب الكمبيوترات قوي قوي , و بعتبرها اهم حاجة حصلت في حياتي (حتى الان )
اصلها اجهزة على قد ما بتبان ذكية جدا , الا انها غبية جدا جدا , و متعديتش كونها حتة حديدة , بس كل الميزة اللي فيها انها بتتصرف بمنطقية , 1+1=2 على عكس البني الادمين 1+1=21 و انا بقول الجملة دي كتير لما بتسأل عن حبي للكمبيوترات
من النوع اللي بيحب يعمل عبيط , ازاي؟ يعني مثلا ابقى عارف ان فلان مش بيحبني و بيكلمني من تحت سنانه , و انا عاااااااااااادي خالص , و ممكن اعرف كمان انه غلط فيا وابقى في قمة البرود , و زي مهو غلط من تحت الترابيزة بردها انا كمان كده
سهل عليا قوي اعمل ديليت لاي حد في حياتي , بتحكم في مشاعري جامد , اللي بيحبني بحبه و بخاف عليه
و اللي بيكرهني مش بحبه و ميهمنيش
بموت في حاجة اسمها فكك مني
و بعشق اسطورة اسمها عمرو دياب
نفسي الاقي بنت الحلال
و كفاية عليكم كده , والبقية اللي عارفني كويس يعرفها
و السلام عليكم و رحمة الله و بركاته

**● **TiTaNiC LoVeR** ●** · 12-03-2008 10:11 PM

انا بقى اكون هاااااااااااااادى وفجأه تلاقينى قلبت وبقيت مجنون ازاى مش عارف
وانما من ناحيه المزاج انا مزاج اوى ومرح واصحابى بيحيبونى اوى عشان على طول بيلاقونى مبتسم حتى او كان فى مصيبه وساعات لما بكون بعمل اى حاجه زى مثلا بصلح حاجه وهى مش راضيه تصلح احتمال كبير بكون محتاج اى واحد جنبى يشلها بسرعه لانى هتنرفز عليها وهكسرها و ساعات بكون اجتماعى على فكره انا لو فى حد عايز مشاعده منى بساعده بس لما انا بكون عايز مساعده من حد ملاقيش اى حد عارف يساعدنى دى اكتر حاجه اكرها
على فكره فى حاجات كتير مقلتهاش بس يلا كفايه دول عشان مش فاضى
شكرا يا bugs bunny على موضوعك

**The White Wizard** · 12-03-2008 10:30 PM

اقولك بقى عني
بالنسبه لحالتي المزاجيه
انا انسان مرح جدا بحب الضحك جدا
ما ينفعش يعدي يوم من غير ما اضحك من قلبي
بس ساعة الجد ممكن تكرهيني من شدتي
لما بحزن وكمان بعيط بيبقى من قلبي وبصدق
بالنسبه للصداقه
انا ممكن اصاحب كل الناس بس طبعا بشروط
لازم يكون كويس عارف اخلاقه وغير كده كمان لازم يكون عارف طبعي مش يمكن معجبوش؟؟؟؟
اللي يبقى وفي معايا بشيله فوق راسي واللي يخوني او يضربني في ضهري بنساه وبالاصح ما ببقاش شايفه خالص
بالنسبه للشكل
انا مش هقولك انا توم كروز والا ليوناردو دي كابريو انا انسان طبيعي من حيث الشكل لون بشرتي قمحي ولون عيني عسلي غامق مش بحب تسريحات الشباب الجديده اللي عاملي شعره زي الديك واللي ناكشه خالص واللي صحي الصبح مالقاش فطار قال والله لرايح الجامعه من غير ما اسرح شعري
وكمان مش بحب الموضه الجديده في الهدوم بحب الاعتدال مش لازم البس المقطع والهدوم المكسره والمدغدغه
بس مش معنى كده اني مهمل في شكلي انا بهتم بشكلي على قد مقدر
بالنسبه للتصرفات
انا راجل لما بدي كلمه لازم اوفي بيها ولو على رقبتي بس ده مايمنعش ان فيه بعض الظروف القهريه
انا بكره الكذب بكل انواعه بكرة النفاق وبكره الطبع المرق او الماسخ في الرجاله
احب البنت تكون في قمه شياكتها بس تكون في قمه احترامها لنفسها وللمجتمع اللي عايشه فيه
بالنسبه للمشاعر
انا حبيت بنت واحده في ابتدائي واختفت بعد كده معرفش راحت فين
بعد كده بقى بحاول اوهم نفسي اني في حاله حب
بالنسبه للدين
انا مسلم عارف ربنا كويس بصلي وبصوم وبستغفر ربنا كتير
ده تقريبا كل شئ عني
شكرا على الموضوع الهايل ده

**Spider GirL**(•'.'•) · 13-03-2008 02:08 AM

موضوعك جميل روكا وفرصة اننا نتعرف على بعض اكتر
بالنسبة ليا انا انسانة طبيعية إلى حد ما
شكاكة الى درجة كبيرة جدا ( كل ما اعتقد ان انا اتغيرت تحصل حاجة ترجعنى شكاكة اكتر من الاول )
لحد سنتين كنت انطوائية جدا وماليش دعوة بحد والموضوع دة اتغير دلوقتى وبقيت ممكن اعرف ناس كتير وكمان اصاحبهم
بحب جدا اصدقائى وممكن اعمل اى حاجة عشانهم
رغم حبى وثقتى فيهم بحس بصعوبة شديدة ان انا اصارحهم بحاجة فى حياتى ، ويمكن كمان بخاف اشركهم معايا فى مشاكلى ( يعنى بلاش ازود مشاكلهم )
بكره وبشدة اى حد يخونى او يفتكرنى عبيطة رغم ان انا بعمل عبيطة احيانا

هذه spider Girl فى سطور

**| Bugs Bunny ●** · 15-03-2008 01:23 AM

شكرا يا , ,
,
على مشاركتكم الجامده و كلامكم الرائع و مروركم

**..●●**آه...لو**●●..** · 15-03-2008 02:59 AM

موضوعك متميز جدا يا bug bun
بصي يا ستي انا اكتر حاجه في حياتي بتضايق منها هي الخوف بخاف من بكره والخطوه الجايه وده على قد مبيريحني نفسيا بيتعب علشان بضيع وقت كتر في خطوه قليله
مليش صحاب كتير تقريبا the magician بس وعلى قد مهو مش فيه الصفات اللي انا عايزها تكون في صحبي بس انا حسيت ان في كميا بنا
كنت مره من مرات كتير متضايق ولوحدي وكانت الساعه 3 بالليل وكنت محتاج حد ضروري اتكلم معاه الاقي كأنه سمع اللي جوايه والاقيه بيتصل الكلام ده من سنتين دلوقت ربنا يكون في عونه بس مازال هو الافضل في حياتي واحسن حاجه حصلتلي
اتهبلت وحبيت مره واحده وكان حب للفضول بس انفصلت بعدها بشهرين تلاته لاني حسيت ان مش هي دي اللي عايزها وبقيت مقتنع ان احسن جواز هو الوسيط يعني واحدة اعجبت بيها تتقدملها على طريقة الصالونات الاول تتخطبوا حبيتوا بعض كان بها محبتوش يبقى قسمه ونصيب
وده معاه لازم فرق سن سنتين تلاته على الاقل عشان مش هتروح تتجوز وانت بتاخد مصروف من بابا زي م اغلبنا لسه بيعمل هي دي الحقيقه بلاش وهم
بحب الرسول لدرجة لا تخطر على بال حد واتدايق قوي لو حد هزر في الاسلام يعني ملتزم دينيا بنسبة 80%
عشان مكدبش ونفسي انا ومراتي نشد بعض للاسلام
اه اه اه اه
ربنا يجازيكي يا bugs
قلبتي علينا الحياة بس كويس موضوعك عرف الواحد هو واقف فين
بحب المنتدى ده اوي وحبيت النت عشانوا وعرفت من عليه ناس حلوين بس مش احلى من شومان طبعا
واخيرا نفسي اكون حاجه كويسه اخدم ربنا والناس كلها تحبني ونفسي اسمي اول بنت ليه لجين(الفضة السائله)
بس خلاص

**| Bugs Bunny ●** · 15-03-2008 05:02 PM

شكرا يا تفاتيفى على المشاركه و الرد
و يا ريت باقى الاعضاء يحاولو انهم يبحثو عن نفسهم
و يشفوها ازاى ؟؟
يمكن يعرفو بعد كده يغيروها للاحسن

**Messi** · 16-03-2008 01:30 AM

انا بقى شايف نفسى انى واد غبى شويه او تقدروا تقولوا اى حد ممكن يضحك عليا
انا بطبعى عاطفى "مش بتاع حب علشان محدش يفهم غلط"عاطفى دى يعنى بتاثر بسرعه من اى حاجه يعنى لو شوفت واحد ميت فى التلفزيون ممكن اعيط بس من غير ما حد ياخد باله .لو اتفرجت عن اى فيلم فيه حاجه عن النكسه او ايام زمان عموما او مثلا لو الاهلى لاقدر الله خسر ماتش مهم وللا حاجه او مصر كسبت مثلا وقاموا جايبن صوره فرحه الناس فى الشوراع تلاقينى ادمع على طول بس برضه من غير ما حد ياخد باله علشان مبحبش ابان ضعيف
كمان شايف نفسى خجول بطريقه بشعه بالذات لو الناس اللى قدامى معرفهاش .انا بتكلم اه بس بكون خايف اعمل اى حركه او اقول اى كلمه غلط.
كمان فيا حاجه وحشه اوى هى انى مبحبش اروح لحد واتعرف عليه يعنى انا مروحش للاى حد واقوله ازيك عامل ايه بالذات لو رايح مع حد صاحبى .اللى عاوز يتعرف عليا ماشى انما انا مروحش لحد علشان اتعرف عليه .علشان كده يقال عنى ان انا تينك شويتين بس انا مش كده واللهى .
عندكم كمان انا احب اساعد اى حد ومحبش اخيب ظن حد فيا .وكمان بأجى على نفسى كتير ازاى يعنى دلوقتى لو حد طلب منى اى حاجه على الرغم من انها ممكن تكون مقرفه ومتعبه وانا مفهمش فيها لازم اعملها للواحد ده م الاخر محبش حد يقصدنى فى حاجه واخيب ظنه فيا .
ايه تانى؟ايه تانى؟..........
مش فاكر حاجه تانى
بس اوعدكم لو افتكرت حاجه هقولكم
وفى نهايه الموضوع لايسعنى اللا ان اشكر الاخت بيجزبانى على موضوعها الرائع
والى اللقاء فى مواضيع اخرى ان شاء الله
والسلامو عليكم ورحمه الله وبركاته