هل توافق علي بقاء عصام الحضري حارس للمنتخب المصري ؟

[● TiTaNiC LoVeR ●]

ازيكم يا شباب ..


طبعا فوجئنا من يومين بالصدمة الشديدة اللي جت من السد الواطي ...
(اقصد العالي سابقا) عصام الحضري

لما ترك النادي الاهلي في بطريقة مفاجأه وفي عز الموسم سعيا وراء الاحتراف والمال ..

واللي فعلا خلاه سقط من نظر كل المصريين ...
وكل الانجازات وكل اللي عمله في 10 سنين ضاع في يوم واحد !!


لكن ما ننساش انه حارس ممتاز جدا ورهيب فعلا ..
وكان فعلا احد اسباب رئيسي في فوز الاهلي والمنتخب المصري بكل البطولات اللي فاتت واخرها بطوليتن افريقيا مع الاهلي ...
وبطوليتن امم افريقيا 2006 و 2008

غير انه الوحيد اللي حصل علي افضل حارس في افريقيا مرتين ..
وتم اختياره الحارس الاساسي لمنتخب افريقيا ..
غير طبعا اشاده كل الخبراء به ..

حتي بالنسبة لاخطاءه في كأس الامم الاخيرة ...
كان في جونين يتسائل عنهم :
هدف زامبيا ... وهدف انجولا ..

لكن نيجي مثلا نشوف الاحصائيات العامة ...
نلاقيه انه صد كور خطيرة اكتر من الاهداف اللي دخلت ..
وكان فعلا سد منيع في مرماه ..


طبعا بالنسبة للنادي الاهلي :
النادي الاهلي طول عمره كبير ... ومش حيقف علي لاعب ابدا ..
والاهلي ممكن يعمل الف حارس مرمي زي الحضري ..


لكن المشكلة الكبيرة هنا هو المنتخب المصري :
لان المنتخب المصري داخل علي اهم 3 بطولات ..

تصفيات كأس العالم - كاس العالم للقارات
تصفيات امم افريقيا 2010


وخصوصا انه المنتخب دلوقتي ملك افريقيا بلا منازع ... وحديث كل الصحافة المصرية ..
غير طبعا انه محط انظار العالم ...
ولازم نظهر بشكل يليق بحامل اللقب وصاحب الارقام القياسية ..


وللأسف لا يوجد حارس بديل في نفس كفاءة الحضري
( مع احترامي الشديد لكل الحراس المرمي المصريين )

*******

الحراس البدلاء في المنتخب : محمد عبد المنصف - محمد صبحي


عبد المنصف :

حارس فعلا ممتاز ... لكن للاسف اخطاءه جسيمة جدا
وكتير بيكون السبب في خسارة الزمالك في بعض ماتشاته ..
وكمان فيه عيب خطير وهو انه مش مكافح .. يعني يصد الكورة مرة واحدة بس ..
وما يخدش باله من المتابعه ..
غير انه في الفترة الاخيرة بقي سلوكه سيء تجاه زملائه ..


محمد صبحي :

( رغم اني اسمعلاوي ) بس ان شايف انه ما يقلش عن عبد المنصف في اخطاءه الفظيعة ..
خصوصا اننا لاقينا الكور احيانا بقع من ايده ..!!

وما عندوش لياقه كافيه في الكورة العالية وفي الالتحامات ..


****

الحراس المرشحين :



شريف اكرامي :

ما بيلعبش بشكل اساسي مع نادي فينورد ..
وللاسف ما عندوش خبرة دوليه كافية ..

نادر السيد :

اولا قعد مع الاهلي سنتين من غير لعب ..
وحساسية المباريات قلت عنده جدا ..
وجت له اصابات كتير في الفترة الاخيرة
غير ان سنه بقي كبير ..


عبد الواحد السيد :

ممتاز جدا في صد التصويبات ...
لكن للاسف في التمريرات العرضيه اسوء ما يكون !!

بقاله فترة طويلة ما لعبش سواء في الزمالك او دوليا ..
غير انه كمان اصاباته كتيره ممكن تخليه يصاب في اي مباراة للمنتخب ..

امير عبد الحميد :

ظهر بمستوي متميز جدا في " الكام " مباراة اللي لعبها مع الاهلي ..
لذلك ما نقدر نحكم علي مستواه بشكل سليم ..
غير طبعا انه 6 سنوات مع الاهلي .. ما لعبش الا مباريات تتعد علي الصوابع !!
وما سبقش له اللعب دوليا ..
اعتقد انه قدامه فتره طويله عشان يقدر يتولي حراسه مرمي بحجم المنتخب المصري ..


بقية حراس الاندية المصرية ...

لا تعليق





طبعا الموضوع مش عايز اي انحياز ..
ولا ده اهلاوي ولا زمالكاوي ولا حتي من بترول اسيوط !!

احنا بنتكلم عن حارس مرمي المنتخب المصري ..

عايزكم مثلا تتخيلوا معانا مباراة زي كوت ديفوار لو كان وقف فيها حارس مرمي عادي ؟؟

تخيلوا حارس مرمي بيواجه مثلا ايتو وكانوتيه و دروجبا و كونيه واجوجو في تصفيات كأس العالم ؟؟


تخيلوا حارس مرمي حيقابل نجوم منتخب البرازيل او ايطاليا او بطل اوربا في كأس القارات ؟؟

تخيلوا انه يكون هناك حارس مرمي بلغة الكورة مطلوب منه ( ينضف منتطقته) من الكور العرضية والركنيات والضربات الثابته .. ويتصدي للانفرادات ... وتبقي عينه دايما علي الكورة ؟؟

تخيلوا حارس مرمي مطلوب منه انه لازم يضبط الحائط البشري كويس ..
لان اي خطأ ممكن يتسبب في هدف زي ما شوفنا غباء حراس المرمي في كاس الامم الاخيرة ؟؟




صحيح الموضوع يحير ..
وانا فعلا محتار اكتر

بس رأيكم طبعا مهم

[Spider GirL(•'.'•)]

والله يا شريف الموضوع محير شويا
لو بصينا للموضوع من زاوية العواطف ( وطبعا المصريين عاطفيين جدا) يبقى ما يلعبش مع المنتخب كنوع من العقاب ليه
اما العقل بيقول ان هو يلعب مع المنتخب عشان هو افضل حارس ممكن يمثل المنتخب
واعتقد اننا فى النهاية كلنا بنتمنى اداء مشرف لمصر والفوز والكل مقتنع ان الحضري افضل حارس يبقى يلعب ومشكلة الحضرى مع الاهلى مش مع المنتخب

[Wezooo(•'.'•)]

بس يا عم شريف موضوع الحضرى لازم نبصله باكتر من زويه
اول انا اى حاجه فى الحياه بتحصل لا اى حد مش لازم نخلى عوطفنا تحركها لازم نشوف ايه
الصح ونعمله يعنى نحكم على الموضوع بالعقل والعقل بيقول بعد ما ضيعنا رامى شعبان لازم نقبل
انا الحضرى يكون هوه حارس منتخب مصر مش لانه احسن حارس بس لانه هوه اكتر واحد لعب
مبارات دوليه يعنى عنده خبره اكتر من اى حارس تانى
اما وجود الحضرى من عدمه فى البطوله مكنش هيجبه لكن اللى جاب البطوله هوه التوفيق من عند ربنا
مش الحضرى يعنى اصابه حارس المرمى كوت ديفوار وتغييره كان يعنى التوفيق من عند ربنا
اما الحضرى او غيره امام البرازيل مش هيعمل حاجه لان كل ده بيبئى توفيق من عند ربنا
واعتقد اننا فى النهاية كلنا بنتمنى اداء مشرف لمصر

[| Bugs Bunny ●]

بالطبع اوافق على بقاء الحضرى حارس مرمى المنتخب المصرى . فأنا اؤيد تصرفه بشده و معه فى كل خطوه , فهو لم يسقط من نظر كل المصريين و لا حاجه , فلكل شخص ظروفه , فلا يجب ان نقسو عليه , اى حد مكانه و فى سنه كان ممكن يعمل كده خاصه انه لم يحترف بعد , و سنه بقا 35 سنه و كمان كام سنه و الاهلى هيستغنى عنه و يشوف بديل غيره و هو اصلا هيعتزل فى 2010 , و هو كمان مهضوم حقه جدا فى النادى , فى حكايه شاره كابتن الفريق و فى حكايه المرتب فهو ياخد 18 الف جنيه سنويا و فى غيره بياخد اكتر بكتير و بيكون اقل منه كفاءه , هو فى الحقيقه غلط فى حكايه السفر المفاجأ فكان لازم الاول انه يعلم جماهيره , بس فى تلك الحالتين هو عمل حاجه تحق له , بصراحه انا بضايق جدا من اللى بيشتم عليه و يقول عنه كلام وحش بعد ما كان بيشيد به. هو اكيد لازم يعاقب , بس تكون عقوبه ماليه فقط ليس الا ........

[● TiTaNiC LoVeR ●]

شكرا يا جماعه على ردكم واهتمامكم بالموضوع
هو موضوع محير

[Messi]

بص يا عم شرشر
انا مايفرقش معايا يقف لمصر وللا لاء
انا اللى يهمنى هو الاهلى واللى انا شايفه ان يغور من الاهلى علشان مش الاهلى يكبره وينضفه ويعمل منه حارس نضيف وفى الاخر يهرب زى اللى عامل عامله
يعنى مش ده رد الجميل حتى لو الاهلى عمل فيه ايه.
اطن ان الاهلى هو صبر عليه كتير
الحضرى ده دخل فى مرماه فى موسم واحد اد اللى دخل فى ثابت البطل فى تاريخه مع الاهلى والاهلى صبر عليه
الحضرى ده كان بيدخل فى اجوان متدخلش فى اوسه وكان بيضيع مننا بطولات
المفروض يبقى فى انتماء وولاء للناس اللى ربتنى وعلمتنى
وبعدين احنا عندنا امير وان شاء الله يبقى احسن من الحضرى
وزى ما الجماهير قالت بنينا سد وانهد وامير اشد واشد

[سحر العيون]

والله انا احترت انا هستنى القرار النهائىبس انا بحب الحضرى

[Criss Angel]

الحضري غلطه كان مع الأهلى و أنا أهلاوي و إتضايقت جدا من اللي حصل
و بالتالي اللي يعاقبه الأهلى و ميلعبش مع النادي اللي عمله و كبره و عمله إسم
خسر كل محبيه و جماهيره و دي لوحدها كفايه
بس المنتخب محتاج الحضري
و الحضري لازم يلعب مع المنتخب
بس كده