اعمل اللى انت عايزه بس صلى

**Hegazy** · 20-02-2008 09:38 AM

ليس شرب السجاير ينهى عن الصلاة

المعروف الايام دى ان الشباب كتير اوى منهم مش بيصلوا وده طبعا شىء غلط
واسمه استهبال لان مش فى ايه قرأنية او حديث شريف بيقول الى بيشرب سجاير مش يصلى يبقى دى بقى حجج فارغه من الشباب او شماعه بيعلقو عليها اخطائهم ويقلك ازاى اروح اصلى وانا بشرب سجاير ازاى اصلى وانا بعمل حاجه والاسطوانة الى الكل عارفها
هنقول لا طبعا غلط غلط غلط انا عاوزك تروح تشرب سجاير وتروح تلصى اول لما تسمع الاذان يعنى يا برنس لو فى ايديك سجاره والاذان اذن عليك مش تطفيها كمان خلصها واول لما تسمع اقامة الجماعه لو مش كانت خلصت بعد اذنك اطفيها ورح صلى ولما تطلع من الصلاة وتكون تمام كده ابقى ولع غيرها مش فيها حاجه عادى والمفاجأه الى هقولها ان الاغانى كمان مش ليها دعوه بالصلاة عادى جدا لو بتسمع اغانى صلى برضه هيه فعلا (مزمار الشيطان ) بس احنا مش لينا دعوه احنا برضه هنصلى ولما نخلص روح اسمع اغانى براحتك انتا كده كده بتوقف الاغانى لما بتسمع الاذان فى الفترة دى قوم صلى وابقى ارجع كمل الاغنية
طبعا فى ناس هتقول ايه الهبل الى بتقوله ده
هقولهم انا اهبل وهبقى عبيط فى نظركم لو قلتلكم كمان
ان المخدرات مش بتمنع عن الصلاة
و عادى جدا لو بتشرب مخدرات روح صلى بس ومش وانتا غايب عن الوعى طبعا مش تبقى مجرم اوى كده يا عم لما تكون فى حالتك الطبيعية ابقى صلى ولو فاتك الفرض ابقى صليه لما تفوق وتبقى فى وعيك
مهو اصللا الى يمنع عن الصلاة ان تكون
1- غايب عن الوعى ( سكران مع العلم ان الخمرة بالذات لا ترفع صلاتك 40 يوم ) علشان مش حد يقول انتا قولت المخدرات انا بحدد اهوه
2- غايب عن الوعى مؤقتا ( يعنى شارب مخدرات من المعروفه للشباب ماعدا الى قولت عليه فى اول نقطة )
3- لو اتجرت بقى والى اخره
يعنى لا غناء ولا سجاير ولا مخدرات
اقولكم انا بتكلم صح ليه بقى لان لما واحد يكون بيصلى الخمس فروض جماعه فى المسجد وبيشرب سجاير او بشرب مخدرات او بيسمع اغانى
اسمه عمل حاجه وساب حاجه
يعنى سمع الكلام هنا
وهنا مش سمع الكلام
بس مره فى مره لما تبقى خلاص بتصلى ومش بتسيب فرض من نفسك كده هتقول لروحك انا يعنى بقيت بصلى انا هسمع شوية اغانى صغيرة خالص
ومره فى مره تقل الاغانى لحد لما يبقى عندك اغنية واحده بس عزيزة عليك اوى وهتسبها شوية وبعدين تمسحها واول لما تعمل كده هقولك
تمام ياباشا خلاص انتا مش هترجع غلط وعمرك مهتسمع اغنية تانى ولو كنت مع اصحابك هتحاول مش تسمع
والى بيشرب مخدرات هيبطل مره فى مره لانه هيلاى المخدرات ساعات بتمنعه عن الصلاة وهوه هيبقى اتعود انه بيصلى الفرض فى معاده هيبطل من نفسه وبرضه مع اقتناع ويبقى الحياة سهله خالص يعنى بلاش نعقدها وعلى فكرة الصلاة والالتزام مش جلبية طقية وبنطلون قصير
لا عادى جدا لما تكون احدث موضه وطبعا مش منتقده يعنى برض البس موضه بس زى الناس
وابقى بصلى
ومش لازم دقنك تبقى مترين
يا عم خليها خفيفه خالص مش تربيها اصلا مش الدقن يعنى هيه الدين
واصحابك الى هيسبوك دول يا اما انتا تحاول تصلحهم او تسبهم لان الصاحب الى يضر صاحبه يبقى مش صاحب وتسيبه احسن
وصحبك انصحه من (الظهر الى العصر مش اتنصح ظله من المغرب للعشاء )
انا مش هقولك ظله لا سيبه خالص
وعلى فكره يا جماعه انا سالت كتير قبل مقول الموضوع ده علشان مش حد يقول بيخترع من دماغه واكدت من شيوخ
يبقى نسبنا بقى من العبط
ونصلى سواء بنشرب سجاير او مخدرات او بنسمع اغانى بلاش بقى نقول حرام
انتا مطلوب منك 3 حاجات مثلا اعمل 2 وسيب واحده مش تسيب الكل يعنى
ويارب يكون كلامى مش تقيل عليكم
ويسلام لو الموضوع اتثبت يبقى احسن حاجه علشان الكل يعرف ان الصلاة هيه اجمل حاجه فى الوجود
اللهم اغفر لى وافتح لى ابواب رحمتك
رجىء من الاعضاء وضع تقييم الموضوع بعد اذنكم لانه يهمنى اوى

**| Nadooosh ●** · 02-03-2008 09:12 PM

اولا شكرا يااحمد على الموضوع وهيا وجهة نظر فى الاول وفى الاخر
وانا بصراحة شديدة بتفق معاك فيها واكتر حاجة بعتقد ليها ان الصلاة بتنهى عن الفحشاء والمنكر بمعنى ان كل ماتنتظم فى صلاتك كل ماحالك يتعدل وكل حياتك تتضبط ودة مهما كنت بتعمل ومهما كانت سيئاتك
ومن الاخر كدة مفيش حد بيقول هبطل اسمع اغانى وبيبطل لازم يرجع يوم ويسمع تانى ودة لو كان مش ملتزم بموضوع الصلاة وطبعا الكلام دة كلة يخص المخدرات والحاجات الوحشة كلها
الموضوع حلو قوى وبجد ممكن كلنا نستفيد منة وانا بضم صوتى لصوت احمد وبقول ياجماعة الى فعلا مبيصليش يبدأ بقى بجد ويجرب واكيد مش هيخسر
وفعلا لو محسش انة بدأت حياتة ودة طبعا مستحيل يبقى بقى ساعتها يعمل الى هو عايزة
اللهم بلغنا اللهم فاشهد

**Hegazy** · 03-03-2008 09:43 AM

ميرسى على مرورك يا منتوسه و جزانا الله خيرا و جزاكى

**● **TiTaNiC LoVeR** ●** · 03-03-2008 02:48 PM

يعطيك العافيه ياغالى على هذا الموضوع الرائع والمميز وصراحه يجب اننا نحارب التدخين بانواعه ونطرح الحلول برضو لمحاربة الفساد بانواعه وانا من رائيي نهتم في هذا الموضوع شويه لانه مهم جدا جدا واتمنى ان ارى ارئكم وطرح الحلول ومعرفة كيف نتخلص من هذه العاده المنتشره بيننا

**Hegazy** · 07-03-2008 11:29 PM

يا باشا نورت و الله و بجد لازم ناخد بالنا من الحاجات دى و نفكر فيها كويس

**..●●**آه...لو**●●..** · 26-03-2008 03:15 AM

والله يا ابو حميد الموضوع باين زي الشمس
" الصلاة عماد الدين من اقامها اقام الدين ومن هدمها هدم الدين"

**● **Snow White** ●** · 26-03-2008 03:21 AM

الموضوع جميل و جديد بالنسبالى بصراحه انا اول مره أعرف إن إللى بيسمع اغناى يقول أنا مش هصلى عشان بعمل حاجه حرام يا سلام طيب مين فينا مبيعملش حاجه حرام لو الناس بتفكر كده يبقى مفيش حد هيصلى اصلا .....

وأنا بكرر ( الصلاة تنهى عن الفحشاء و المنكر) يعنى هيا دافع ليك ومقوى انك تبطل عمل الحرام

وبشكرك يا حجازى على المعلومة الجديدة و التوبك الجامد وأسلوبك المؤثر