مين باقي علي حاله كل الاوقات؟!!!

**ReRe** · 16-02-2008 07:34 PM

صدقت كوكب الشرق نانسي عجرم
مين باقي على حاله كل الأوقات ..؟؟؟

طيب ...
محتاج أفضفض من جديد ...
أعمل ايه يعني .... الموضوع الصراحة شاغلني جداً في الفترة اللي فاتت ...

خلينا نعترف أن الواحد مش بيقدر يعيش من غير أصدقاء على الإطلاق ... سيبنا بقى من الزميل اللي بيدخل بدالي أمتحان الشفوي و لا زميلي اللي بيذاكرلي ... و لا اللي بيسلفني – الشر بره و بعيد – سجارة لما فلوسي تخلص على الترمس...

طبعاً الواحد بيحاول يكسب صديق جديد كل شوية ... يعني نفسي أحوّل – طبعا دي غير ألوووو حوّل حوّل هل تسمعنى ॥ لا اسمعك بوضوح – كل زملاتي كلهم كلهم يبقوا أصدقاء ليا ... و مش كده بس, لكن يبقوا أصدقاء قوي قوي يعني ... من اللي بيقولوا عليهم في كي جي تو "الصديق عند الديق " ... و اللي درسنا نماذج ليهم في كتاب الوزارة بتاع ابتدائي

...

بلاقي الحمد لله أشخاص بأعتقد في البداية أنهم ممكن في يوم من الأيام يبقوا أصدقاء بجد وحقيقي... صديق من اللي بيديني الفرصة كاملة علشان أدلق عليه جردل همومي و أطرطش عليه من طشط مشاكلي – ايه الاسلوب المتدني ده !!! قولوا في صوت واحد "ياي" ...

المهم بقى أن الصداقة مع الشخص ده بتبقى زي المنخال الجديد ليه شده, أو شبه الباروكة بتاعة مريام فارس - ربنا يخليها للشعب الصومالي - اللي شاريها من المعلم كبشو بتاع الخرفان و الجديان من ذوات القرنان... أما صدقت أنها أشترتها و ما بتخلعهاش أبداً فرحانة بيها بقى حقها ... أهو أنا برضوا – اعتقد كلنا – ببقى علي نفس النظام كده ... طبعاً مش بلبس زميلي الجديد كبروكة لا سمح الله لكن ببقى فرحان بيه قوي و بنبقى أوقات كتير قوي شغالين لوك لوك لوك لوك .... سواء بقى المعرفة دي كانت واقعية أو كانت المعرفة إلكترونية - طبعاً ببركات الحكومة البروتونية اللي وفرت لينا وصلة نت لكل مواطن- ... فترة طويلة قوي بندنا نتكلم علشان نعرف بعض أكتر ... اتعرف على المخلوق المريخي الجديد اللي بيبدأ يتحول لصديق ... أعرف إن كان حزبجي طبقى بيروقراطي موالي أو إخوانجي متطرف أو كفايجي ثائر ...

أعرف بيحب يتكلم في إيه و إيه اللي ممكن يضايقه ... يعني أبذل قصارى جهدي علشان أعرف ما أضايقهوش – غالبا زي كل الناس بفشل

- بنحاول مع بعض نوصل لنقاط اتفاق ...

خلاص بقينا أصدقاء و زي السمن البلدي على العسل النحل اللي نسبة الـHydroxy Methyl Furfural فيه مش كبيرة على الإطلاق .... بقينا زي الفل و الورد و الياسمين بالنسبة للي ما عندوش حساسية منهم ॥ بنعرف نفضفض مع بعض .. و نحكي مع بعض ... كل واحد يحل للتاني مشاكله المستعصية ... خلاص بقت صداقة حقيقية مصنفة علمياً و معملياً تحت " الحب في الله " ... مفيش أي مصالح بينا خالص في الوقت الحالي ... و مش سبب الصداقة أمل – غير أمل حجازي بالطبع يعني - في مصلحة في المستقبل البسيط السمبل فيوتشر أو حتى في المستقبل البعيد- ترجموها انتم بقى...

قوم ايه بأه ... إذ فجأة كده يعني و من غير مقدمات يحصل اختلاف في وجهات النظر ... إيه المشكلة يعني؟؟ ... دي مصر و إسرائيل ساعات– مش كتير يعني - و الله بيحصل بيناتهم اختلاف في وجهات النظر و بيرجعوا تاني بسرعة زي السمن البلدي على العسل النحل اللي نسبة الـHydroxy Methyl Furfural فيه مش كبيرة على الإطلاق... هوب بقى الخلاف ده و السوء في الفهم ده يقلب بزعل صغير يتكاثر ذاتيا ويبقى زعل كبير .... الزعل بيكبر و يكبر... ببقى نفسي أعصر على نفسي برتقانة بلدي مش بسرة و أكسر الحاجز النفسي ده بقنبلة نووية صنع في إيران ... و أعتقد ... لأ أنا متأكد هو بيبقى بيحاول يعمل نفس الشيء ... بس ممكن الحاجز النفسي ده يكون طخين قوي و ما يعرفش عن النظام الغذائي المتاكمل ... هو مش قادر يرجع زي الأول ... أو أنا أستلفت جينات صعيدية زي ما كتير بعمل , و راسي كده تقلب و تبقى حجر ...

خلاص دي إرادة ربنا॥ و إحنا عملنا اللي علينا و الباقي على ربنا ... و نعم بالله ... إضطرينا نضحي بالجنيــ أوووبس ... قصدي بالصداقة علشان الاحترام المتبادل يعيش ....

خلاص كده المفروض نخرج إحنا الاتنين زي ما يعملوا في مظاهرات الاتحاد الاشتراكي زمان و نقول بأعلى صوت "نموت نموت و يحيا الاحترام"... مظاهرة معنوية نكون مقتنعين بيها ... لكن للأسف اللي بيحصل في بعض الأوقات أن تلاقيه بيطبق قول الرسول عليه الصلاة و أفضل السلام في وصف المنافق ... " إذا خاصم فجر" .... ألاقيه مرة واحدة قلب 371।5 درجة شمال خط العقلاء ... و مرة واحدة ألاقيه بيشتم فيا ... و مش بيجيب سيرتي إلا بكل شر ربنا يبارك فيه يعني ... طيب أنا دلوقتي المفروض مش أشك في نفسي بعد كده ؟؟؟!!!

فين أيام زمان لما كنا أصدقاء بجد ... سيبنا من الشعارات الكذابة ... بجد مش كنا زمان بنحترم بعض و لا ايه؟... هل الواحد مرة واحدة يتقلب شمال بدل اليمين و بدل ما يحترمك تلاقيه بيشتمك حتى و أنت مش موجود...

الواحد ممكن يقتنع لو المعرفة معرفة يوم و لا يومين أو معرفة خمس ست سبع تمن ساعات مستنيين ندخل نمتحن شفوي الـفايتو و لا العقاقير ... الصداقة دي ما أقدرش أحكم عليها و أقول ده صديق ليا بـ "ارتاح معاه" زي ما بيقول عمرو مصطفى غير لما تعدي سنة و لا اتنين ... يعني 365يوم مضروبة بالراحة في 2 و لا اتنين و نص حتى ...

طيب هو عمل كده ليه ؟؟؟

إيه غيرّه فجأة كده ؟؟؟

طب برضوا علشان ندي حقنة جلوكوز تصحصح الاحترام المتبادل من غيبوبته مش كان الأولى أنه يقول أني غلطت فيه في كذا أو كذا أو حتى كذلك؟؟؟؟

بلاش يقولي ...نستعين بصديق ككبري مزدوج الاتجاه علشان نوصل بيه المعلومة ؟؟

طيب انا المفروض أثق في أي حد تاني ممكن أعرفه ؟؟

مين باقي على حاله كل الأوقات ... زي ما بتقول كوكب الشرق نانسي عجرم

دي عباره عن فضفضه علي لسان احد الزملا اللي معانا في صيدله
وبصراحه وجهة نظره عجبتني قوي فقولت انقلهلكم
انا مش عايزه ردود ولا شكرا ولا هايل
انا عايزه كل اللي يقراه يفكر في الكلام ده ويوصل لقرار واجابه لنفسه هو وبس مش لحد تاني

**● **همسة** ●** · 17-02-2008 02:05 AM

فعلا محدش باقى على حاله
وبجد لازم نستحمل بعض
فعلا فكره تستحق انك تنقليها لينا يا ريرى
ويارب الناس ترجع تحب بعضها زى زمااااااااااااااااااااااا ن اوى
اول لما انا اتولدت
بجد انتى طرحتى مشكله مهمه جدا جدا

**● **Snow White** ●** · 18-02-2008 01:28 PM

ربنا يسترها علينا
وهااااااااااااااااااااااا ايل يا رىرى
والله موضوع جامد

**Messi** · 18-02-2008 02:31 PM

ماشى يا ريري الموضوع زى الفل
بس انا مش شايف ان الموضوع غريب
ليه بقى ؟
دلوقتى زى مانا فهمت انك بتتكلمى عن الناس اللى بتكون محترمه او بيتقلب حالها او مثلا الناس اللى احنا بنكون واخدين عنها فكره وتطلع حاجه تانيه.
انا شايف ان دى مش مشكله فى الجيل اللى احنا عايشين فيه .دى موجوده من زمان اوى يعنى وده راجع لطبيعه البشر

عندك كمان دلوقتى انتى تقريبا بتتكلمى بتقولى اننا زمان كنا بنحترم بعض ودلوقتى لاء.طب يعنى احنا مثلا سنه 1919 كنا كويسين ودلوقتى خلاص بقينا حاجه تانيه.؟

اخر حاجه بقى دلوقتى انا شايف اننا لو حصل للواحد انه كان مصاحب واحد وللاقى انه كان مخدوع فيه او انه فهمه غلط فالغلط يقع على الواحد ده علشان هو اللى مقدرش يفهم البنى ادم ده او اخد فكره عنه غير اللى هو عليها .
وبيتهيالى اننا كبرنا بما فيه الكفايه علشان نقدر نميز بين البنى ادم الكويس والبنى ادم اللى مش كويس

وشكراااااااااااااااا ع التوبك

**ReRe** · 13-03-2008 08:05 PM

شكرا ليكي يا همسه
وفعلا دي بقت مشكله
الواحد مابقاش عارف يثق في مين
ومين معاه ومين عليه

وكتير بيثق في ناس وفي الاخر بياخد منهم علي دماغه

واللي النهارده حبيبك ماتستغربش لما ييجي بكره ومايقولكش حتي السلام

كله بقي بيضحك علي كله

**ReRe** · 13-03-2008 08:07 PM

نورتي يا دودو

وربنا يوقعك في ناس تحبيهم ويحبوكي ويخلصوا ليكي

اللهم اجمعنا في حبك

**Haneen** · 29-03-2008 03:29 AM

موضوع حيوي فعلا وكتير بنتخدع في بشر افتكرناهم صحاب بجد لكن خسااااااااااااااااااااااا اااااااارة فعلا ويارب يجمعنا بالصالحين

**ReRe** · 31-03-2008 03:20 PM

انا كده فهمت وهريحك بص يا ميسي انا نقلت التوبيك ده للناس الطيبه اللي لسه مشيه بحسن النيه
من غير لؤم ولا خداع
الناس اللي لسه بتعامل ربنا
وبتعمله حساب في كل فعل
الناس دي هي اللي مش قادره تتاقلم لسه مع الواقع المصلحنجي الغلاوي

الناس دي لسه فاشله في انها تشم ريحة المكر علشان الحب اللي في قلبها وريحة الطيبه مغطيه علي عقلها

شكرا ليك يامسي
ومعلش انا طبعا مابوجهش ليك اي كلام
انا بس بقولك
انك لوكنت قادر تحافظ علي نفسك من شر الناس واصدقاء ال..
وعندك القدره انك تحكم علي الناس من قبل ماتتاذي منهم
فده حاجه جميله جدا ونعمه من ربنا اساله ان يديمها عليك نعمه
وربنا يحفظك اخي العزيز

**ReRe** · 31-03-2008 03:33 PM

شكرا ليكي ياحنين وربنا يحفظنا

**Hot Ice** · 03-04-2008 04:27 AM

مين باقي علي حاله ؟؟؟

سؤال ازلي مؤلم ودائما ماتصاحبه علامات التعجب والحزن والندم

مش عارف ليه بنندم ؟ طب ماهو احنا اللي بنتغير !!

وتقريبا هنفضل كدا دايما اللي فات احلي من اللي جي !!

بس بصراحه استمتعت بطريقة عرضك يا ريري واسلوبك

اللي بعتبره بدون مجامله مميز فعلا

تسلم ايدك ودماغك كمان !