البلد دى ارضى

[قلب صادق]

البلد دى ارضى


البلد دى ارضى وارض جدى وارض ابويه
البلد دى ارض كل مصرى ماهم اهلى وحبايبى
وكل مصرى ابويه وامى وصاحبى وابنى وبنتى واخويه

البلد دى طاهره وعظيمه ارض العزه والشرف والناس والكريمه
البلد مصرى وارض كل مصرى
البلد هى الامن والامان اللى كل الدنيا بتلاقى بين شعبها حب وامان

البلد دى مصر يا عالم فوق واسمع
عاشت وكانت وهتفضل دره ملكه فوق الجميع
البلد دى نحميها ونفديها بروحنا

واللى يفكر يمس حبه واحده من رملها اقسم بربى ما يطلع عليه صباحها

البلد دى ياشعب غالى و كريم فوق واسمع
مش مصر اللى يقدر حد ابدا يخليها تدمع
البلد دى قادر شعبها يرفعها فوق

وهتفضل مصر غاليه عاليه وحول رقابنا امانه لابسينها طوق
البلد مش بس كلمه بيقولها كل مصرى

البلد دى امن وامان من غير حكومه
ماهو شعبها ايد واحده وروح واحده جدع من يومه
البلد دى اصل شعبها بيظهر وقت الشدايد والمحن
ماهو ربنا الكريم وصا عليها من زمن

البلد دى موجوده فى قلبى وقلب وكيان كل مصرى
فيها خير جنود الارض بكل فخر

يسلمك ربى يا مصر من كل شر
غنى فقير مهندس دكتور عامل وزير

كل مصرى بيحبها وبيتمنالها كل خير
اتفرج يا عالم على الشهامه والرجوله اللى هنا
كلمه بقولها بأعلى صوت واسمعوها منى انا

صوتى هيوصل وحقى هاخدو بكل عقل وكل ادب
ولا تصدقو ان ممكن مصرى يكون واحد من اللى سرق واللى نهب

البلد دى ارض طاهره وكريمه بأهلها
وهنفضل دايما عايشين بقلب واحد فى الله على ارضها
البلد دى ارضى البلد مصرى البلد دى هى امى



لاجمل بلد واحسن شعب فى الدنيا

تحياتى للجميع

قلب صادق
3 / 2 / 2011

[| Mannora ●]

مشاعر جميله وكلام جميل منك مصر غاليه اوووووووووووووووى ولا اى كلام يكفيها

[قلب صادق]

فعلا يا منار ولا اى كلام يكفى يوصف حبنا ليها

وصدقينى عاوزه تشوفى بجد شوفى ميدان التحرير

انا بروح البيت وبرجع تانى مع الشباب هناك فى التنظيم وفى

المشاركه فى كل شئ وشباب وبنات بجد الكل ايد واحده

واد ايه الناس البسيطه بتدخل علينا الميدان تفرح بينا وتدعى لينا وللمصر

ده لوحدو يثبت اد ايه كلنا بمنوووووت فى مصر واد ايه الناس فاهمه وعارفه ان

التغيير والحريه مش هييجى الا بالصبر وبالشباب انا وانتى وغيرنا ان شاء الله

ان شاء الله هنكون احنا اصحاب القرار

نورتينى يا منار جدا واتمنى الكل يدعى لمصر وللشبابها

[!..!]

حضرتك كنت من بتوع كنتاكي واليورو ؟؟

الثورة الجاية مش هنتنازل عن بيتزا هت

ربنا يحمي كل المصريين والمسلمين يارب

وبجد مصر تستحق إننا نضحي بنفسناعلشانها

شكراً على كلماتك الصادقة .

[قلب صادق]

مـــــــــــــــــــصــــــــــــــــــــــــــر

[قلب صادق]

على فكره بقى يا ‏

احنا اكلنا كنتاكى بس ايه تحفه

شويه قرص كنتاكى وبقسماط كنتاكى وفول وجبنه كنتاكى انما ايه كنتاكى كنتاكى يعنى

ولا النوم كان اييييييييه مش قادر اقولك بجد بطاطين ايه وحرير ايه

اما اليورو بقى فبصراحه ضحكو علينا وادونا بالجنيه الموزمبيقى اهو حاجه تمشى الحال

حسبى الله ونعم الوكيل فى اللى قالو علينا كده والله وقالو عيال احنا عيال

والشعب كلو اللى طلع يقول لاء عيال . والمحافظات كلها عيال . واللى ماتو عيال

مش هقول غير اللهم لك الحمد والشكر

وما النصر الا من عند الله

نورتينى جدا وعلى فكره بقى

المره جايه بيتزا وبيبسى وجنيه استرلينى وين صومالى ودولار سودانى وليره صينى علشان الكل يهيص بقى

[| Amino2 ●]

هو احنا مالنا فجاه اكتشفنا اننا بنحب البلد اوى كدهه ليه
يمكن كنا محتاجين حد يحركنا بس او يحسنا بقميتها
ربنا يستر انشاء الله على المرحله اللى جايه لان دى اهم حاجه لانها لتبقى حلوه وكله ياخد حقه لتتقلب كلها
بس انا متفائل انشاء الله
بالنسبه لكنتاكى كانت موجوده فعلا بس مش لاى حد كانت ناس معينه الكلام ده بجد على فكره

[قلب صادق]

عندك حق يا امينو بس احنا بنحبها اوى طول عمرنا بس

الشرطه والحكومه كانو مخليين الشعب فى وادى تانى خااااااااااالص

يعنى المشاكل والمشاغل والشغل واللى عندو مذاكره واللى عندو اولاد

والكل بيسعى لجلب الرزق ونمشى جانب الحيط من الزل والقهر اللى كنا فيه

لاكن لما جت الفرصه الكل انتفض بجد

اللهم لك الحمد

اما كنتاكى ده كان للاحزاب يا باشا

رجال كل حزب للاسف اللى معملوش حاجه غير انهم

اتفرجو علينا وبس وعاوزين السلطه وبس