هتعمل ايه في العيد السنة دي؟

[| Silent Guardian ●]

السلام عليكم
كل سنة و أنتو طيبين
كل واحد ليه اسلوب معين في الاحتفال بالعيد
يعني في ناس بتحب تخرج , ناس بتحب ترقص , ناس بتقضيها اكل و خلاص
عايز نشارك بعض و نعرف كل واحد فينا هيعمل ايه في العيد
يمكن يقترح حاجة كويسة

عايز كل واحد يقول
1- هيعمل ايه بالظبط في العيد السنة دي؟
2- امتى كان احسن عيد عدى عليه و ليه؟
3- احساسكو ايه بالعيد؟

[| Silent Guardian ●]

و زي ما دايما بقول , اي حد ينزل مواضيع مناقشات
لازم يكون هو أول واحد كاتب رد على موضوعه

1- هيعمل ايه بالظبط في العيد السنة دي؟

بالنسبة ليا العيد متقسم على تلات مراحل
الاولانية : اول يوم العيد , ده زماااااااااان في الايام الحلوة كان احلى يوم
دلوقتي بقى عبارة عن نوم فقط
الثانية : تاني يوم العيد , و دي بتبقى العيلة كلها متجمعة عندنا في البيت فمش بروح حتة , الحتت هي اللي بتجيلي
التالتة : ما بعد تاني يوم العيد , و دي احتمال تبقى نوم , او خروج
بس السنة دي تالت و رابع يوم انا خارج ان شاء الله

2- امتى كان احسن عيد عدى عليه و ليه؟

سنة كام بالظبط مش فاكر
بس ايام زمان
ايام زمان كانت حلوة قوي
كان العيد فرحة كبيرة كبيرة , و رمضان فرحة اكبر و اكبر
و الله اطفال السنة دي محرومين من حاجات كتير احنا استمتعنا بيها و احنا صغيرين
بس ايام زمان , ايام اللبس الجديد , و المسدس ابو طلق خرز , و الصورايخ الصفراء ام بريزة , و حديقة الطفل
دي كانت احلى ايام

3- احساسكو ايه بالعيد؟

حاليا ملوش طعم اطلاقا
اطلاقااااااااااااا
و دي قلة بركة في الايام
و علامة من علامات القيامة , هي قلة البركة

[| لولا ●]

- هيعمل ايه بالظبط في العيد السنة دي؟
زى كل عيد بروح اعيد على خالتى واختى هما اللى فاضلين بعد امى وستى ما توفوا وبنتغدى مع بعض وبروح بيتى تانى وخلاص
2- امتى كان احسن عيد عدى عليه و ليه؟
طبعا وانا صغيرة كان احلى ايام ايام العيد كنت بخرج انا وصحابى وبنبقى مبسوطين بالعيد اوى وخصوصا يوم الوقفة بيبقى ليه زهوة كده وبنضف الشقة ونقعد طول الليل يوم الوقفة بنفرش فيها عشان تبقى حلوة اول يوم العيد يااااااااااااااااه عمر الايام دى ما هتتعوض ومن ساعة ما امى اتوفت صدقنى العيد عندى ملوش اى لزوم
3- احساسكو ايه بالعيد؟

زى ما انت قولت يا تيفا مفيش اى احساس الاحساس بالعيد كان زمان ساعة اللمة والناس الحلوة اللى اساسا مش موجودين دلوقتى البركة بجد بجد قلت من كل حاجة وربنا يرحمنا
بشكرك جدا يا تيفا وكل سنة وانت طيب يا جميل

[| Silent Guardian ●]

بجد منورة التوبيك يا لولا
و عيد سعيد عليكي ان شاء الله

[Wezooo(•'.'•)]

بكره هقولكم بقى

[بلا هوية]

هعمل اية فى العيد السنة دى.. زى ماعملت خلال اخر خمس سنين وهقضيها نوووووووووووووووووووووم
احسن عيد مر عليا .. ولا فاكر يمكن زمان وانا صغيرة بقا
احساسنا بالعيد ..احساس ......غير لطيف بالمرة ويمكن المرة دى أسوأ عيد يمر علينا

[● TiTaNiC LoVeR ●]

كل سنه وانت طيب
يا عمنا العيد بتاع السنتين دول عيد فكسان جدا جدا مبقاش زى زماااااااااااان خالص
زمان كان ليه فرحه واحساس وشعور تانى خالص

عايز كل واحد يقول

هقولك يا عمنا


1-هيعمل ايه بالظبط فى العيد السنادى؟

العيد السنادى طبعا غير السنين اللى فاتت فقضيها خروجات انا واصحابى بننزل بنروح فى اى مكان رجلينا بتودينا
واحتمال انزل اسماعيليه زمايلى اتصلوا بيا عشان نخرج
وفى كام فرح كده هروحه
يعنى الاسبوع ده كله بره فى الشارع ان شاء الله

بس اول يوم طبعا بقالى خمس سنين بقضيه نوم
وتانى يوم العيله بقى بتتجمع وبتبقى هيصه وحاجه زى الفل
بس السنادى هتكون مختلفه مش لازم تعرفوا ليه


2- امتى كان احسن عيد عدى عليه وليه ؟

فتره الابتدائى والاعدادى كانت ليه فرحه معينه وايام الثانوى كانت ليه فرحه معينه والمعهد ليها فرحه معينه
لان كل فتره المرحله بتتغير والزمن بيتغير
فطبعا اياااااااام زمان احسن اياااااااااااااااااام
كان فى مسدسات وصواريخ ومعكسات وكنا ساعات بنلم العيال بتوع الحته ونتخانق مع اى حد ماشى اى حاجه فى نفسنا كنا بنعملها



3- احساسكو ايه بالعيد ؟

زى ما قولت فوووووووووووق العيد بتاع السنتين اللى فاتوا دول عيد فكسااااااااااان خالص مالص

[Messi]

- هيعمل ايه بالظبط في العيد السنة دي؟
هو انا عملت من امبارح بليل
نزلت القاهره وركبت خيل وروحنا بساطه وبعدين طلعنا على النيل اخدنا مركب وبعدين فطرت ورجعت صليت ودلوقتى انا بكتب اهوه والمفروض انى كنت هروح اسكندريه بكره بس شكلها اتفشكلت عشان المفروض انى اكون فى الشغل يوم الاتنين فمش هلحق اروح واجى
2- امتى كان احسن عيد عدى عليه و ليه؟
مش فاكر بس هو اى عيد من 10 سنين فاتوا كان احسن عيد
كنت فعلا بحس بالعيد وفرحته
3- احساسكو ايه بالعيد؟
مش حاسس بحاجه لسه الواحد الصبح

شكرا يا درش
وكل سنه وانت طيب
ومبروك الخطوبه

[| Amino2 ●]

- هيعمل ايه بالظبط في العيد السنة دي؟
هصحى بدرى اصلى العيد واكل لكل الناس كل سنه وهما طيبين واتصل بيهم او جرانا واقاربنا هروح اعيد عليهم وبعدين هرجع افطر ونفعد احنا واسرتنا كلنا سوا ونتلم ونتكلم ونهزر وبعدين نخرج نروح القاهره عند عمتى نعيد عليها وبعدين نيجى على بليل كده ننام وتانى يوم هقضيه مع اصحابى
اما تالت يوم انا اكيد خارج فيه مع الحته بقى (ملحوظه)
لما الحته تتوجد يعنى
2- امتى كان احسن عيد عدى عليه و ليه؟
احسن عيد بالنسبالى وانا فى ايام الابتدائى كانت فرحه حلوه بجد باعديه وان انت هتشترى اللى عاوزه من غير ماتطلب فلوس وبتلعب وبتخرج مع اصحابك ومفيش فى دماغك حاجه بس دايما كنت بفكر فى الدراسه اللى كمان يومين واضايق
3- احساسكو ايه بالعيد؟

حاليا اصبح احساس عادى بس انا عن نفسى بحاول اخليه لذيذ وحاجه مختلفه عشان محسش بالملل او ازهق نفسى على الفاضى لان العيد فرحه

[Wezooo(•'.'•)]

هيعمل ايه بالظبط في العيد السنة دي؟
ولا اى حاجه تقريبا زى كل سنه بروح اصلى وبعدين اجى
اقعد فى البيت لحد ما اى حد يجى يخرجنى او حد يتصل بيا لو مش حصل كده بفضل قاعد وتانى يوم بقى وتالت ممكن اخرج او اروح لى قريبى كده يعنى مافيش حاجه بعملها

2- امتى كان احسن عيد عدى عليه و ليه؟
من زمان اووى وانا صغير تقدر تقول من وانا عندى 10 سنين كان بيبقى ليه طعم تانى وكانت ايام جميله دلوقت العيد ما هوا الا زكرى بالنسبه ليه كل عيد افتكر وانا كنت صغير

3- احساسكو ايه بالعيد؟
عادى مش بس برده بفرح لما بشوف الاطفال مبسوطه فا بحس ان فى عيد