واحد اتنين حرجي مرجي انته حكيم ولا تمرجي......جمال بخيت

**..●●**آه...لو**●●..** · 15-07-2010 10:23 PM

السلامو عليكوم
ايه الاخبار يا حبايبنا
جايبلكم انهارده فيديو واحد
للرائع جمال بخيت كماا لم ترونه من قبل
الفيديو بيحتوي على قصيدتين في غايه الروعه والجمال

اذا لم يعمل مع هذا الفيديو فانت تحتاج الى Adobe Flash Player
حمل أحدث نسخة من هنا
http://get.adobe.com/flashplayer/

الاولى بعنوان
" واحد اتنين حرجي مرجي "

واحد اتنين حرجي مرجي
انته حكيم ولا تمرجي
انا حكيم غير الحكما
العيانه اديها لقمه
والمسكينه المسكينه
من احبابنا واهالينا
اديها عمري بحالو
طاهر من غير اوحالو
قلبي وربنا اوحى له

فين اشوفك يا نبي
ياللي بلادك بيعيده
فيها احمد وحميده
حميده جابت ولد
سمتو عبد الصمد
كان ترحيله وكان بنا
كان بين الآيات جنه
كان بين الزهور حنه
كان بين الايام عمري
كان بين الاقارايب ابي

فين اشوفك يا نبي
ياللي بلادك بيعيده
فيها احمد وحميده
حميده جابت انسان
ضحكتو كانت اوطان
والاوطان كانت صاحيه
بتغني داير الناحيه
بدوي وشامي ومغربي

فين اشوفك يا نبي
ياللي بلادك بيعيده
يا ليالي وفي ليله سواد
غشنا عبد الاسياد
واتمشى ع المشايه
خطفت راسو النجمايه
والنجمه لها ست انياب
مغروسه في عين الاحباب
حب الشايب بنوته
نقرت زورو الكتكوته
والكتكوته في بلدنا
زيها زي المدنى
صدقها ساعت متقول
الصبي خد عمر الغول
تسلم ايدين الصبي
وفين اشوفك يا نبي
ياللي بلادك بيعيده

..............................

الثانيه بعنوان

" نعي الجنيه "

مات الجنيه
والف رحمه ونور عليه
فقيد بنوك القاهره
اخو ريال والد دراهم
والبرايز والشيلن
وجد فلس
و نسيب لعائله الدينار
التحقيقات في المركزي
بتقول دي موتت ربنا
والشائعات بتقول غلط
ده انتحار
الامر جد مفيش هزار
مات الجنيه
والف رحمه ونور عليه
كان الفقيد راجل شديد
وكان زمان
بيجيب دهب
ويشيل حديد
وف آخر العمر المديد
سموووه
حمام
لانو كان بيطير قوام
لكن سقط
من غير وداع من غير كلام
مات الجنيه
والف رحمه ونور عليه
ننعيه اليكم بينما
نتمنى للسيد دولار
طول البقاء والانتشار
في جميع بوتيكات البلد
في جميع محلات اللعب
وف كل اسواق الخضار
ننعي الجنيه
لكل من يهفو اليه
من الجماعه المفلسين والمفلسات
والف رحمه ونور عليه
ولا عزاء للمليمات

...............................
اتمنى يكون عجبكم الموضوع

**| Mannora ●** · 16-07-2010 12:05 AM

عجبانى الاولى اوى خفيفه ولذيذه وحلوه كده

والتانيه فيها سخريه وتهكم وتحسر على امجاد الجنيه الزائله

متميز كالعاده تسلم ايديك يا مصطفى

**Beauty** · 16-07-2010 12:57 AM

الاتنين عجبونى اوى بس التانيه عجبتنى اكتر
لانى بيعجبنى النوع ده من وصف الاوضاع بطريقه ساخره
وجمال بخيت حقيقى مميز
وانت كمان يا مصطفى دايما مميز باختياراتك ميرسى كتير ليك

**..●●**آه...لو**●●..** · 21-07-2010 12:33 AM

اي خدعه يا منار
وشكرا بيوتي
مبسوط جدا جدا
ان اختياراتي بتعجبكم

**Wezooo**(•'.'•) · 21-07-2010 01:22 AM

ههههههههههههههههههههه
والله الراجل ده بجد جاب من اخر حلوا اووى الاولى والتانيه ايه ده
ربنا يستر على الجنيه
ولا ايه ما الجنيه غرق خلاص ربنا يسهل ونلاقى الجثه