"يامنه"....عبد الرحمن الابنودي..كلاكيت تاني مره لما اشوف لما تشوفوها هتفرق ولا لا

[..●●آه...لو●●..]

اذا لم يعمل مع هذا الفيديو فانت تحتاج الى Adobe Flash Player
حمل أحدث نسخة من هنا
http://get.adobe.com/flashplayer/

يامنه
للقراءه حاولو تقروها باللهجه الصعيديه
والله وشبت يا عبد الرُّحمان .
عجّزت يا واد .؟
مُسْرَعْ؟
ميتى وكيف؟
عاد اللي يعجّز في بلاده
غير اللي يعجز ضيف.!!
هلكوك النسوان؟
شفتك مرة في التلفزيون
ومرة .. وروني صورتك في الجورنان
قلت : كبر عبد الرحمان.!!
أمال انا على كده مت بقالي ميت حول.!!
والله خايفة يا ولدي القعدة لتطول.
مات الشيخ محمود
وماتت فاطنة ابْ قنديل
واتباع كرم ابْ غبّان
وانا لسة حية..
وباين لسه حاحيا كمان وكمان.
عشت كتير.
عشت لحد ماشفتك عجّزت يا عبد الرحمان.
وقالولي قال خَلَّفت
وانت عجوز خلَّفت يا اخوي؟؟
وبنات..!!؟
أمال كنت بتعمل إيه
طيلة العمر اللي فات؟
دلوقت مافقت؟
وجايبهم دِلْوكْ تعمل بيهم إيه؟
على كلٍّ..
أهي ريحة من ريحتك ع الأرض
يونسُّوا بعض.
ماشي يا عبد الرحمان.
أهو عشنا وطلنا منك بصة وشمة.
دلوك بس ما فكرت ف يامنة وقلت: يا عمة؟؟
حبيبي انت يا عبد الرحمان
والله حبيبي .. وتتحب.
على قد م سرقاك الغربة
لكن ليك قلب.
مش زي ولاد الكلب
اللي نسيونا زمان
حلوة مرتك وعويْلاتك
والاّ شبهنا..؟
سميتهم إيه؟
قالولي : آية ونور.
ماعارفشي تجيب لك حتة واد؟
والاّ أقولك :
يعني اللي جبناهم..
نفعونا في الدنيا بإيه؟
غيرشي الانسان مغرور.!!
ولسه يامنة حاتعيش وحاتلبس
لمّا جايب لي قطيفة وكستور؟
كنت اديتهمني فلوس
اشتري للركبه دهان.
آ..با..ي ما مجلّع قوي يا عبد الرحمان.

طب ده انا ليّا ستّ سنين
مزروعة في ظهر الباب
لم طلّوا علينا أحبة ولا أغراب.
خليهم..
ينفعوا
أعملهم أكفان.!!

كرمش وشي
فاكر يامنة وفاكر الوش؟
إوعى تصدقها الدنيا..
غش ف غش.!!
إذا جاك الموت يا وليدي
موت على طول.

اللي اتخطفوا فضلوا أحباب
صاحيين في القلب
كإن ماحدش غاب.
واللي ماتوا حتة حتة
ونشفوا وهم حيين..
حتى سلامو عليكم مش بتعدي
من بره الأعتاب

أول مايجيك الموت .. افتح.
أو ماينادي عليك .. إجلح.
إنت الكسبان.
إوعى تحسبها حساب.!!
بلا واد .. بلا بت..
ده زمن يوم مايصدق .. كداب.!!
سيبها لهم بالحال والمال وانفد
إوعى تبص وراك.

الورث تراب
وحيطان الأيام طين
وعيالك بيك مش بيك عايشين..!!
يو.....ه يا عبد الرحمان..
مشوار طولان
واللي يطوِّله يوم عن يومه يا حبيبي .. حمار
الدوا عاوزاه لوجيعة الركبة
مش لطوالة العمر.
إوعى تصدق ألوانها صفر وحمر.

مش كنت جميلة يا واد؟
مش كنت وكنت
وجَدَعَة تخاف مني الرجال ..؟
لكن فين شفتوني ..؟
كنتوا عيال.!!

بناتي رضية ونجية ماتوا وراحوا
وأنا اللي قعدت.
طيِّب يا زمان..!!
إوعى تعيش يوم واحد بعد عيالك
إوعى يا عبد الرحمان.

في الدنيا أوجاع وهموم أشكال والوان.
الناس مابتعرفهاش.
أوعرهم لو حتعيش
بعد عيالك ماتموت.

ساعتها بس ..
حاتعرف إيه هوّه الموت.!!
أول مايجي لك .. نط
لسه بتحكي لهم بحرى حكاية
فاطنة وحراجي القط..؟
آ.. باي ماكنت شقي وعفريت
من دون كل الولدات.
كنت مخالف..
برّاوي..
وكنت مخبي في عينيك السحراوي
تمللي حاجات.
زي الحداية ..
تخوي ع الحاجة .. وتطير .
من صغرك بضوافر واعرة .. ومناقير.
بس ماكنتش كداب.
وآديني استنيت في الدنيا
لما شعرك شاب..!!
قِدِم البيت.
اتهدت قبله بيوت وبيوت.
وأصيل هوه..
مستنيني لما أموت..!!

حاتيجي العيد الجاي؟
واذا جيت
حاتجيني لجاي؟
وحتشرب مع يامنة الشاي .؟؟
حاجي ياعمة وجيت..

لالقيت يامنة ولا حتى البيت ..!!

[| Mannora ●]

الكتابه باللهجه الصعيدى مش واصله هاحاول اشوفه كده

[Spider GirL(•'.'•)]

هى ما تتقريش
صعبة اوى فى القراية
لكن جميلة اوى لما تسمعها

[| Mannora ●]

طبعا اختلاف جامد عن المره اللى فاتت
حلوه اوى بجد بصوته تسلم يا مصطفى بجد

[..●●آه...لو●●..]

شكرا
سبايدر
ومنورا
بس مين قال ان الكتابه باللهجه الصعيديه
انا بقول اقراوها باللهجه الصعيديه
عالعموم شكرا كتير لمروركم وردكم

[Beauty]

انا مش عرفت اقراها بالصعيدى خاااااالص
بس سمعته وبداء اقراها معاه
فعلا حلوه اوووووووووى وعلى قد ماهى حلوه
فيها كلام كتير وجع قلبى اوووووووووووووووووووى
ياااااااااااااه بجد جميله وتوجع القلب وبصوت الابنودى حلوه اوى اوى
ميرسى يا مصطفى

[| Amino2 ●]

انا بعمل حاجه حلوه لما بلاقى موضوع زى كده
ببدات اقراها انا الاول لوحدى وبعد كده بشغل الفيديو بتاعه بشوف نفسى كنت بقراه صح وباديه صح ولا لا
وبعدين ببدا اقراها معاه تانى
بس بجد دى جامده جدا
الابنودى ده خالنا كلنا وبجد صعب يتكرر
تسلم ايدك يادرش
ويارب تستمر فى الحاجات دى
وفعلا الكلام فيها ان الدنيا مش فارقه وكلها وجع وهموم

[..●●آه...لو●●..]

شكرا ليكي بيوتي وشكرا امينو
والله انتو مش عارفين
مجرد بس دخولكم الموضوع والاستماع ولو من غير االرد حتى بيخليني مبسوط قد ايه
وبجد انتو ناس زي العثل وانا بحبكم كلكم