قصيدة عشان انت مصرى جامده جدا

**| Amino2 ●** · 25-06-2010 11:50 PM

عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى

عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك

ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله

بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق

هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت

عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ جتك القرف

**| Tears Of The Moon ●** · 26-06-2010 06:13 AM

بلا نيلة
تسلم يا ابو مين

**| Mannora ●** · 05-07-2010 12:35 PM

على رأيك مش انت مصرى جاتك القرف

بجد الواحد بيجى ليه احباط واكتئاب

يلا

**..●●**آه...لو**●●..** · 05-07-2010 03:34 PM

مش حلوه خالص يا امينو
كلامها من الاخر بس مش حلوه للاخر
بجد كلامها لاذع بس شديد
وفيه حاجات كتير غلط
انا مصري
بس مش زي اللي في القصيده دي

**| Amino2 ●** · 06-07-2010 01:20 AM

طبعا شكرا لمروركم جميعا ياجماعه

بالنسبه لرايك يحترم ياتيفا بس فى مصريين كتير كده وبيندموا انهم مصريين
ولكن العيب فى النظام كله مش فى شخص بعينه
يالا ربنا يهدينا كلنا ونحاول نفيد البلدى بشىء كويس

معلومات الموضوع

قصيدة عشان انت مصرى جامده جدا

الموضوع: قصيدة عشان انت مصرى جامده جدا

أدوات الموضوع