ادخل وقول على حلمك

[Spider GirL(•'.'•)]

ادخل قول على حلمك حتى لو شايف ان هو صعب ان هو يتحقق
( على أد لحافك مد رجليك! )

( اللي يبص لفوق يتعب !)

(احلم على قدك !)



دايما نسمع الأمثال دي في حياتنا .. لكن حد مننا فكر فيها قبل كده ؟؟

هل كل حاجه بنسمعها تبقى صح ؟؟ هل كل حاجه اتعودنا على سماعها , لازم نصدقها ؟

طيب .. عايزين نتكلم في الموضوع ده شوية و ندردش مع بعض...



إستراتيجية تحقيق الأهداف



عشان تحقق هدفك لازم يكون ليك حلم.. لازم الحلم ده بيكون هو الوقود اللي بيحركك و بيديك الدوافع انك ماتيأسش..



ايه مواصفات الحلم ده ؟

القاعدة المهمة هنا هي :

ماتحطش سقف لأحلامك !!

احلم براحتك... خليك طموح.. خليك متطلع.. لو حلمك صغير هاتفضل صغير.. لو حلمك كبير و مؤمن بيه ..يبقى لازم هاتحققه و تكون كبير...

- كان فيه شاب معوق اسمه خالد حسان ..فقد ساقه اليسرى في حادث سيارة في العاشرة من عمره... الشاب ده كان حلمه إنه يعدي المانش..!!!

تخيل ؟؟ شايف الحلم ده ؟؟

سباحين عالميين حاولوا يعملوها عشان عبور المانش مش سهل.. التيارات البحرية و درجة الحرارة و المسافة المرهقة اللي كانت عقبة أمام أي سباح محترف... لكن خالد كان مؤمن بحلمه.. كان عارف إنه ممكن يعملها .. أكيد سمع ناس بتقول له : انت بتحلم.. أكيد ناس قالوا له : أكيد مش هاتنجح.. أكيد فيه ناس حاولوا يقنعوه بسخافة حلمه و إنه استحالة يقدر يحققه بسبب إعاقته...لأن مفيش معوق قدر يعدي المانش على مدى التاريخ ....

أقول لكم حاجة؟ خالد حسان هو أول معوق في العالم استطاع يعبر المانش سنه 1982 و حقق حلمه و حلم مصر اللي بنفخر بيه حتى الآن... إيه رأيك ؟

-
- هي إيه الحكاية ؟؟ عايز تقول إيه ؟

الحكاية يا سيدي كالتالي :



الحكاية إن الباحثين درسوا سلوك الناجحين في جميع المجالات .. اكتشفوا إن كل واحد فيهم كان له حلم إيجابي كبير و كان مؤمن بيه جدا لدرجة إنه مالتفتش لكلام الناس إللي حاولوا يحبطوه...

الحلم ده لازم يكون إيجابي و هدفه نبيل.. رسالة بيحملها الشخص ده و بيحاول يحققها...

( لو استطاع أي شخص أن يحقق شيء ما.. ففي إمكانك أن تحققه!)... كلمة لريتشارد باندلر.

يبقى إياك تحط سقف لحلمك .. إياك تيأس .. خلي إيمانك بحلمك الإيجابي هو القوة اللي بتخليك تتخطى أي عقبة..

خلي إيمانك بحلمك قوي لدرجة إنك تقف و تتخطى أي صدمة.. لأنك مؤمن تماما إنك هاتوصل لهدفك في النهاية...

( كل الناس لديهم من الخبرات التي تؤهلهم لتحقيق تغيير إيجابي في حياتهم )... كلمة لريتشارد باندلر.

الأمثال القديمة اللي قلناها في أول الموضوع إياك تعمل بيها .. لو كانت تنفع زمان يبقى أكيد ماتنفعش في العصر اللي احنا فيه ده .. كل شيء ممكن طالما عندك هدف نبيل و حلم عايز تحققه..

خلي الأمثال للي فوق كالتالي :



( على أد لحافك مد رجليك! )

حوله إلى :

( جيب لحاف على أد رجليك !!)

و المثل الخاطئ اللي بيقول :

( اللي يبص لفوق يتعب !)

حوله إلى :

( إللي يبص لفوق , هايوصل فوق !!)

و الجملة اللي بتقول :

(احلم على قدك !)

خليها :

( ماتحطش سقف لأحلامك !!)


الحلم الكبير هو اللي بيصنع نجاحك.. احلم براحتك و تخطى كل الظروف و لازم تؤمن انك هاتحقق حلمك ده.. لو حلم إيجابي و يمكن تحقيقه , يبقى أكيد أكيد هاتعرف تحققه .. مفيهاش كلام...

بتحلم بإيه دلوقتي ؟؟؟
يلا كل واحد يقول حلمه حتى لو شايف ان هو صعب؟؟؟
مستنية احلامكم تقولوها وتبدؤا تحققوها ...

[Messi]

شكراااااااااااااااااااااا اااا يا اسبايدر جيرل على الموضوع
بجد فى ناس كتير محتاجه تبطل تفكر بالعقليه اللى تبخليهم دايما فى مكانهم
اما بالنسبه لحلمى فى الحياه هو ان احقق اللى انا عايزه ان شاء الله
شكراااااااااااا مرة تانيه على الموضوع ومنتظرين المزيد

[● Snow White ●]

بجد موضوعك ده جه فى وقته بالنسبالى انا فعلا كنت محطمه وده بسبب الناس إللى حواليه وحلمى هوا :
أنى أبقى مخرجه لبرامج الأطفال عشان نفسى أرفع من درجت تفكير الطفل نفسى أشوف طفل مصرى بعقل كبييير مليان معلومات و فنفس الوقت نفسى أعمل فلم كرتون فيه تكنولوجيا عليا و جرفيك و معلومات تهم كل طفل عربى و يترجم بكل اللغات ويبقى أحلى من أى فيلم كرتون اجنبى تانى
شكرا على الموضوع المهم

[LovelyGirl55]

حلو الموضوع يا سبيدورة وانت عارفه حلمى ياقمر
انى ابقى عميده الكليه وساعتها هلغى كل المناهج
واوزع على الطلبه لبان

[Spider GirL(•'.'•)]

شكرا messi على مرورك

[Spider GirL(•'.'•)]

ربنا يحقق لك حلمك وانت اعملى على تحقيقه وان شاء الله هتوصلى وشكرا على مرورك

[Spider GirL(•'.'•)]

والله انتى بتتعبى يا بنتى وكلية صيدلة مش هتنسى لك اللى بتعمليه فيها ربنا يوفقك شكرا على ردك

[● TiTaNiC LoVeR ●]

هههههههههههههه
ايه الحلم الجامده ده
******
انا بقى حلمى انى اخش كليه شرطه بس ده فى فى الاحلام

[Spider GirL(•'.'•)]

انا بقى حلمى انى اخش كليه شرطه بس ده فى فى الاحلام
قول ان شاء الله وبلاش يأس واحلم واجتهد وحاول تحقق حلمك ومفيش مستحيل،،،.. شكرا titanic على ردك ومرورك