كل حاجة عن المذاكرة والأمتحانات .. مواقف ونصائح وكل ما يخص الطلاب

**● **TiTaNiC LoVeR** ●** · 10-10-2007 12:13 PM

وفجأة النور قطع!

شوفولنا شمعة يا جماعة.. طيب لمبة الجاز حتى..

الامتحان بكرة ياناااااااااااااااااااس!
***
وعلى ضوء الشمعة المرتعش.. وعلى ريحة الجاز المنعشة.. تبدأ في المذاكرة..
"قفا نبك من ذكرى حبيب ومنزل بسقط اللوى بين الدخول فحومل"

فاهم طبعا إنت كل حاجة!
عموما لطلبة اللغة العربية نغششهم- على الماشي كده- "سقط اللوى" و"الدخول" و"حومل" دي كلها أماكن زي "أرض اللوا" و"إمبابة" و"بولاق"!
والباقي اتصرف فيه بقى بطريقتك الخاصة!

وبذكر الطريقة الخاصة..

إنت بتذاكر إزاي قبل الامتحانات..
اللي احنا على أبوابها أو يمكن جواها دلوقت؟!

يعني فيه ناس.. من بتوع "الشمعة والجاز" ومن هواة المذاكرة "في اللحظات الأخيرة"
وفيه ناس.. من بتوع المذاكرة 24 ساعة في الـ24 ساعة!
وفيه ناس.. غاوية "تنشين".. "أنا هاذاكر الفصل الأول والثالث والخامس..ما هو أكيد هتيجي منهم أسئلة!"
وفيه جيل جديد.. طالع مالوش علاقة بالكتب أصلا.. ويرفع شعار "الملازم والملخصات هي أساس كل الحركات!"..

ده بخصوص طريقة المذاكرة..
والأمر بيختلف برضه بخصوص "المؤثرات الصوتية" المرتبطة بالمذاكرة..

يعني تلاقي واحد.. مش بيفهم الدروس والمحاضرات إلا وصوت "نانسي عجرم" بيلعلع جنبه!
وفيه اللي.. بيحب يسمع موسيقى هادية..
وفيه اللي.. بيشغل شريط تسجيل فاضي عشان بيحب يذاكر في صمت!

فيه حد.. بيتجنن لو سمع صوت التليفزيون بتاع جيرانهم اللي ساكنين على بعد 7 شوارع ومش بيعرف يركز في كلمة واحدة من اللي بيذاكرها!

فيه اللي.. لازم يشرب 23 فنجان قهوة في اليوم عشان يعرف يذاكر ويصحصح..
وفيه اللي.. لو شم ريحة القهوة بيفقد تركيزه على طول لأنه مش بيحب أي حاجة تقطع المذاكرة حتى ولو كانت شفطة قهوة!

طبيعي جدا.. الناس ألوان.. وكل واحد مختلف عن التاني..
ولولا اختلاف الأذواق لبارت السلع.. ولفضلت البنات من غير جواز ولفضل الأولاد عزاب!

حقك يعني أن يكون ليك طريقة خاصة في المذاكرة..
ولا حتى مايكونش ليك أي طريقة..
بسٍ المهم تكون بتذاكر..
وماتكونش من الناس إياهم اللي فجأة بيكتشفوا إن بكرة الامتحان.. وفجأة يدوروا على الكتب.. وفجأة يسألوا عن المحاضرات.. وفجأة يتصلوا بأصحابهم يسألوا "هو الدكتور حذف إيه وقرر إيه؟".. وفجأة النور يقطع عليهم ليلة الامتحان.. وفجأة.. يدوروا على كبريت عشان يولعوا الشمع مايلاقوش.. وفجأة يخلص الجاز في بيتهم.. ومن غير أي مفاجأة.. يروحوا تاني يوم مايكتبوش حرف واحد في الامتحان!

وده منطقي جدا لأن كل اللي حصل ده مالوش غير اسم واحد..
مذاكرة في الوقت الضايع
وبجملة الامتحانات والأسئلة.. طيب ماتجاوب لنا على الكام سؤال دول.. اعتبرهم مراجعة نهائية ليلة الامتحان.. وبدل ما تدفع خمسين جنيه عشان تاخد حصة المراجعة دي عند الأستاذ "سيد وزة".. أدينا يا سيدي بنعطيها لك ببلاش..

بس الأسئلة كلها إجباري..

س1: لماذا تفضل المذاكرة من الملازم والملخصات عن الكتب وعن كل ما هو حكومي بالذات؟!

س2: هل جربت مرة أن تذاكر قبل الامتحانات بفترة طويلة؟ وليه؟ وماذا كانت النتيجة؟

س3: هل جربت أن تذاكر ليلة الامتحان-أيوه على لمبة الجاز!-؟ ليه؟ وماذا كانت النتيجة؟

س4: هي بتفرق معاك يكون المدرس أو الأستاذ الجامعي حلو ولطيف وبيشرح كويس لأن ده بيشجعك على إنك تذاكر؟ ولا أحمد زي الحاج أحمد.. وكده كده مافيش مذاكرة؟

س5: ما هي الطقوس التي تمارس ليلة الامتحان؟ وكيف يمكن أن تقضي على التوتر اللي بييجي لك ليلتها؟ فيه ناس بتنزل تلعب ماتش كورة قبل الامتحان بيوم عشان تبقى فريش...أنت منهم؟!

لسه ماجاوبتش؟!

بسرعة يا عم وقت الامتحان قرب يخلص
ولا يعني لازم تذاكر وتجاوب على لمبة الجاز يعني!

**مواطن مصرى** · 11-10-2007 01:44 AM

موضوعك جميل جدا ياتيتانيك
شكرا ياريس على الموضوع ده
وده ردى على الاسئلة

دا طبعا علشان الملخصات والملازم وخصوصا بتاعة ليلة الامتحان بتبقى جايبة المفيد كله اللى بييجى فى الامتحان واحنا طبعا بنذاكر بس علشان ننجح فبننجز ونذاكر طبعا من الالوظة بتاعة المادة

أه كانت مرة واحدة بس علشان كانت مادة مبادئ علوم سياسية وانا فى سنة اولى فكنت حابب انى اذاكر المادة واعرف عنها وخلصتها قبل الدكتور مايخلص محاضراتها ونجحت فيها الحمد الله

لا الحقيقة لا بس افتكر ان النور قبل كدة قطع وانا بذاكر السنادى وكنت قرفان من المذاكرة وكان ليلة الامتحان فأنتهزتها فرصة وخرجت بس الحمد الله نجحت برضه فى المادة

لا هى بتفرق طبعا الدكتور التمام بتبقى داخل الامتحان بتاعه وانت مستريح نفسيا على الاقل
هو التوتر بيفضل موجود على كل حال يعنى ومفيش بالنسبالى طقوس معينة ليليلة الامتحان غير ان الواحد برضه لازم يذاكر شوية يعنى ويخلص المادة قبل الامتحان بس لازم برضه الواحد فى اليوم ده يروح يقعد على الكافيتريا شويه وينام برضه بتاع ساعتين على الاقل قبل اللجنة

ربنا يوفقنا جميعا
خالص تقديرى

**..●●**آه...لو**●●..** · 11-10-2007 02:11 AM

تقريبا اختصارا للوقت لو جبت لمبه جاز ولا ولعت في البيت ولا حتى جبتلي كريب (كلوب)
مش مزاكر ليلة الامتحان ولا قبله ولا حتى طول السنه ربنا بيسهلها كل سنه

**● **Moataz FoKak Meny Shoman** ●** · 11-10-2007 03:10 PM

الله يخرب بيت المذاكرة حتى المذاكرة كمان فى المنتدى
شكراااااااااااا يا شرشر على الموضوع

**I'm Alive** · 10-02-2009 11:56 PM

ياعم مذكرة ايه وحد الله بس ومتعملش فى نفسك كدا ياشريف أنا ضد كل ما هو حكومى على فكرة ويخربيت المذاكرة مش كفايا المشنقه الى متعلقالى فى البيت تسلم ياعم شيرى عل الموضوع برده

**| لولا ●** · 13-02-2009 01:49 AM

شكرا يا شريف على موضوعك بس الحمد لله انا بطلت مذاكرة من زمان الله يحرقها مطرح ما راحت

**| سندباد ●** · 19-02-2009 07:33 AM

وفجأة النور قطع!

***

"قفا نبك من ذكرى حبيب ومنزل بسقط اللوى بين الدخول فحومل"

بطّل هبل يا شريف

إنت بتذاكر إزاي قبل الامتحانات..

وفيه ناس.. غاوية "تنشين".. "أنا هاذاكر الفصل الأول والثالث والخامس..ما هو أكيد هتيجي منهم أسئلة!"

انا ممكن أكون ده لو اتزنقت ،،بختار البرانش اللى فية اكتر درجات

ده بخصوص طريقة المذاكرة..
والأمر بيختلف برضه بخصوص "المؤثرات الصوتية" المرتبطة بالمذاكرة..

انا بحب أذاكر فى دوشة الكمبيوتر ،،اى حاجة مش اركز فيها
،،،وبتعب من الهدوء التام

طبيعي جدا.. الناس ألوان.. وكل واحد مختلف عن التاني..
ولولا اختلاف الأذواق لبارت السلع.. ولفضلت البنات من غير جواز ولفضل الأولاد عزاب!

طمنتنى يا شريف

حقك يعني أن يكون ليك طريقة خاصة في المذاكرة..
ولا حتى مايكونش ليك أي طريقة..
بسٍ المهم تكون بتذاكر..

كلام يتاقل بدهب

بس الأسئلة كلها إجباري..

س1: لماذا تفضل المذاكرة من الملازم والملخصات عن الكتب وعن كل ما هو حكومي بالذات؟!

مش بتحصل معايا غالبا ،،عشان مينفعش
لكن ممكن أذاكر من مصدر تانى فيه نفس المعلومات لكن بتنظيم أنا شايفه كويس.....

س2: هل جربت مرة أن تذاكر قبل الامتحانات بفترة طويلة؟ وليه؟ وماذا كانت النتيجة؟

غصب عنى بذاكر قبل الامتحانات بفترة ،،،
وليه؟؟
عشان مينفعش غير كده
والنتيجة،،
انى بنجح عادى ،،،بس على فكرة مهم جدا التركيز فى الفترات الأخيرة .....من غيره

س3: هل جربت أن تذاكر ليلة الامتحان-أيوه على لمبة الجاز!-؟ ليه؟ وماذا كانت النتيجة؟

بستغلها فرصة ،،وأتنيل انام ....لأنى بكون قرفان أصلا
واللى يحصل يحصل وخلاص...

س4: هي بتفرق معاك يكون المدرس أو الأستاذ الجامعي حلو ولطيف وبيشرح كويس لأن ده بيشجعك على إنك تذاكر؟ ولا أحمد زي الحاج أحمد.. وكده كده مافيش مذاكرة؟

س5: ما هي الطقوس التي تمارس ليلة الامتحان؟ وكيف يمكن أن تقضي على التوتر اللي بييجي لك ليلتها؟ فيه ناس بتنزل تلعب ماتش كورة قبل الامتحان بيوم عشان تبقى فريش...أنت منهم؟!

البيت كله بيكون مرتبك ،، وبتبقى ليلة سودة ع الناس هنا

عشان كده ابعد عنى فى الليلة دى

لسه ماجاوبتش؟!

جاوبت

شكرا شريف
nice topic