هيا بتغرق...وانا بتفرج

**..●●**آه...لو**●●..** · 28-12-2009 04:23 PM

هيا بتغرق...
وانا بتفرج...
خايف اقرب

وهيا بتغرق...
وماده اديها...
والناس بتصوت...
واللي يزعق واللي بيصرخ واللي يحسبن
واللي يقولي
يا ابني حرام
يا ابني هتغرق...

وهيا بتغرق...
وانا بتفرج...
وبعرف اعوم...ومش عاوز انقذها
خايف اقرب اكتر منها
او امسك ايدها
معرفش اسيبها

وهيا بتغرق...
وانا
انا بتفرج

ده بحر غريب...وموجو شديد
بيشد ف ثانيه
و ملوش ف الرحمه
لا يعرف ام ولا له اب
ده ملوهش قرار
وكمان جبااار

وهيا بتغرق..
وانا خايف اقرب..
بدل مسحبها
البحر ياخدني
وساعتها هنغرق...
مع بعض هنغرق
هيتمكن منا

وموجه تجيبنا وموجه ترمينا
وياابعد عنها غصبن عني
يا البحر يسيبنا ويهرب منا
والموج يتبخر
وساعتها هنندم
ع
جرح قلوبنا ودمع عيونا

لا مش هضعف
هدوس ع قلبي لو دق في مره
وحسب حسبه في كل مره
مش غلط تاني مش هجرح تاني
واشوف الدنيا من حواليا
هشوف الشمس واشوف الريح والموج والبحر
هيسمح
ولا انا هغرق اكتر منها

وانا بتفرج...
والناس بتصوت يا ابني انقذها
يا ابني الحقها
يا ابني هتغرق

تتفلق الناس على نظراتهم
تتفلق الناس على كلماتهم
وعلى عباراتهم
قاعدين بيلومو
قال يعني اتجرا حد يقرب ويمسك ايدها
ولا
قرب خفف عنها

وانا مش اسيبها
مقدرش اسيبها
بس
انا برضو
مقدرش اجيبها
مش هينفع اقرب اكتر منها

انا هرميلها
ايوه
ارميلها

طوق تتعلق بيه
وتمسك جامد
تكلبش فيه

ومين راح يعرف بعد
يومين ايه ممكن يحصل

مش ممكن اقرب والشمس اهي تطلع
والموج راح يهدى والريح راح تبعد
وانا امسك ايدها واشد اجيبها
ونبقى اتنين ع بر امان

ومش ممكن برضو انا قبل مقرب

واحد يجي و يمسك ايدها
اوام يخطفها..ويطلع بيها
والناس هتسقف واللي يصفر
واللي يبارك واللي يهلل
واللي يقول
ملهوش في الطيب

ساعتها
انا ههرب وابعد عنها
ع قد مهقدر مش هقرب منها..
وهقف اتفرج.
...............................
TaFaTeFe
28/12
2009
هه
السنه خلصت
كانت اسوا سنه عشتها في حياتي
صحيح كلهم ميفرقوش عن بعض
هيا او 2007
بس برضو
حطمت الارقام القياسيه في الجرح
دراسيا وعاطفيا وذهنيا ودينيا واسريا
وع مستوى الصداقه
عملت شرخ
حاسس اني متحركتش فيها
لا انا حبيت ولا انا عديت ولا اتغيرت
يلا
غوري في داهيه
وانا برضو هفضل
وانا راح اكمل
وابدا تاني بدايه جديده
بدايه سعيده
من غير تنهيده
هـــــــــــــــــتنهيدهـ ــــــــــــــــــه

**| Amino2 ●** · 28-12-2009 05:08 PM

على فكره يامصطفى والله بجد عجبانى اوى
انا بصراحه مش عارف اقول ايه
بس حاسس ان كلها احساس
المهم انت واضح انك بتحبها اوى يعنى
على فكره انت جامد اوى
اصلى اول مره بصراحه حد يوضح الغرض من القصيده
تسلم ياكبير

**قلب صادق** · 28-12-2009 05:29 PM

جميله اوى كلماتك واحساسك

وصدقنى كلنا بنعانى الفراق

وقسوته والوحده والالم وزى ما انت بتقول

بتيجى ايد تانيه تاخدها من عالمنا لعالم تانى

بس هنعمل ايه صدقنى هيه دى الحياه

ربنا يسعد الجميع وتكون سنه جديده

عليكو يارب وعلى الدنيا كلها

تقبل مرورى

**Candy Girl** · 28-12-2009 06:30 PM

ماتقول يابنى انته عاوز ايه؟؟؟؟؟

**!..!** · 28-12-2009 06:53 PM

محجوزة للرد

**مااقدراكون غيرانا** · 28-12-2009 08:12 PM

عبرت عن اللى بداخلك باسلوب مميز وانك خايف تقرب وتنقذها والافضل تشوفها بتغرق

طرح رااااقى لابعد الحدود

وبأذن الله السنة الجاية تكون افضل وتحقق حاجات حلوة غير السنين اللى فاتت وتفاءل خير وعام سعيد بأذن الله.

**BASIM THE BOSS** · 28-12-2009 08:21 PM

كلام روعـــــه
نوووو كومينت

**اسيرة الزكريات** · 28-12-2009 09:04 PM

جميلة جدا

**| Tears Of The Moon ●** · 28-12-2009 10:23 PM

مش عارف أقولك ايه
انا كنت رديت على التوبيك قبل كدا
ولما دخلت أقراها تانى مالقيتش ردى

بس بجد
ربنا يحميك
تحفـة تحفـة
احساس ايه
وكلام ايـه
فى حاجات نقراها من أول مرة نعرف الل كاتبها عاوز ايه
بتنقل اللى بيقرى جوة القصيدة وبيعيشها
تسلم ايدك

**!..!** · 28-12-2009 10:34 PM

حد يقدر يلعب الكلمات زيي

لأ طبعاً يا تفاتيفي .. إنت بطل قومي (مش في سيرك يعني)

بالنسبة للكلمات وزنها جميل جداً

دي بحر إيه دي ؟

وممكن ألحنها كمان بس إديني أد تناشر سباعاشر سنة كدا ..

عقبال ما أنفّض الجيتار من التراب !!

ـــــــــــــــ

يمكن محتاجين نصاحب نفسنا واللي حوالينا أكتر من كدا ؟

ويمكن اللي بيتألم أو بيتجرح .. بيحس بجرحه أوي ..

يمكن هتحس إن مافيش حد فاهمك .. أو حاسس بيك ..

بس أكيد في حد حاسس وبيتألم علشانك وإنت مش حاسس

(بقول لنفسي كدا برضه ولا حياة لمن تُنادي ) ..

بس في حاجات لما تضييع مننا .. مينفعش تيجي غيرها !!

كل حاجة هتعدي على خير .. إن شاء الله ..

واللي جاي هيكون أحسن

وربنا هيعوضك ويعوضنا خير بإذن الله

ومش هتبئا في تنهيدة تاني !

.

معلومات الموضوع

هيا بتغرق...وانا بتفرج

الموضوع: هيا بتغرق...وانا بتفرج

أدوات الموضوع