مصر فى الاصل اشتغاله؟؟

[MeEeGoOoO(•'.'•)]

زي اي كلمة طلعت في حياتنا ومنعرفش طلعت منين ولا امتى ولا ازاي ولا ليه اصلا ....


طلعت كلمة "اشتغالة" , بس الاكيد انها كلمة جديدة مع العلم ان جديدة دي كلمة نسبية ,


المهم اديناعندنا كلمة بتقضي الغرض وخلاص .. كلمة بيستشهد بيها الجيل القديم (اللي سلموا نمر يعني)



وبيعتبروها دليل على انحطاط الذوق العام مع قليل من مصمصة الشفايف والتحسر على "الزمن الجميل"


اللي راح ومش راجع تاني , بس اللي محيرني بقى .. هما كانوا زمان بيسموا


الاشتغالات ايه , "الاعيب" .. جايز برده


واحب اوضح ان مصر بلد اشتغالات ده نسبة للمصريين مش لمصر , لان مصر ملهاش ذنب ,


المشكلة فينا احنا كمصريين .. لان التجارب اثبتت ان الشعب المصري عنده روح الاشتغالة بصورة فظيعة ..


شعب اشتغالاتي يعني (وانا منهم عشان اقطع الطريق على الخبثاء) . يمكن تكون


الاشتغالات مرتبطة بالوجدان الجمعي عند الشعب المصري من زمان , بس الملاحظ مؤخرا ان


الاشتغالات في حياتنا زادت اوي .. لدرجة اننا ممكن نعتبر الحاجة الوحيدة اللي مش اشتغالة في حياتنا :


هي اننا شعب اشتغالاتي (حقيقة مؤكدة) .... واليكم بعضا من هذه الاشتغالات





لو لم اكن مصريا .. لودت ان اكون مصريا



يا سلام .. اطلق هذه الاشتغالة الزعيم الوطني مصطفى كامل


في بداية القرن العشرين في احدى خطبه الحماسية , صحيح هوا كان بيناضل ضد الاحتلا الانجليزي ..


بس ده مش سبب كافي انه يقنعني بان واحد هندي قاعد يشرب جوزة على اي قهوة في الهند


وعمال يقول ياريتني كنت مصري , ساعتها لو حد سمعه ممكن يتحاكم بتهمة الخيانة العظمى لوطنه الام


(الهند يعني) وممكن ياخدله اعدام كمان , وابقى خللي بقى مصطفى كامل ينفعه



يا عم مصطفى .. يا زعيم يا وطني .. نحب مصر براحتنا .. بس مش مطلوب من غير المصريين انهم


يفضلوا مصر على بلادهم يعني , والا يبقوا خونة .. بيتهيألي وسعت شوية من مصطفى كامل ,


مش اوي كده يعني






حار جاف صيفا .. دافيء ممطر شتاء



اشتغالة راسخة في كل كتب الجغرافيا خلال منظومة التعليم


المصرية الغرض منها وصف مناخ مصر , سواء كان تعليم عالي او -لامؤاخذة- تعليم واطي ,


وزي ماعرفت من ناس كبار ان الجملة دي كانت على ايامهم برده , ويمكن زمان كان مناخ مصر كده فعلا ,


بس دلوقتي المناخ في العالم كله اتغير , ودي ارادة ربنا ولا اعتراض , وفيه تفسيرات بقى زي


التلوث والتصحر والاشعاع وخلافه .. بس ده كله مش مبرر ان الجملة العبثية دي تفضل موجودة في


كتب الجغرافيا لحد دلوقتي , خصوصا ان الجو في مصر فيه خاصية غريبة جدا .. وهي انك بتشوف


فصول السنة الاربعة في اليوم الواحد .... اشي خيال يا ناس







أول طلعة جوية .. فتحت باب الحرية



اشتغالة اعلامية دعائية رنانة .. تحسسك ان باب الحرية كان


معصلج لحد ما جت اول طلعة جوية وخلصت الموضوع كله , وكله عشان عيون الريس اللي كان قائد


القوات الجوية ساعتها , بس نسوا يقولولنا ان الريس كان قائد ع الارض بس .. لا طار ولا طلع نص


طلعة حتى من اللي فتحت باب الحرية , همال فين بقى المشاة والمدرعات والدفاع الجوي


والبحرية والصاعقة وبقية الجيش


الا صحيح , هوا باب الحرية لما اتفتح ايه اللي حصل بعد كده .... اكيد الهوا قفله تاني






مدرستي جميلة .. نظيفة .. متطورة



ياه .. كل ده , يعني مدرستي مش جميلة بس لأ ..


دي كمان نظيفة وقال ايه .. متطورة , يللا بقى .. هوا يعني الكلام بفلوس , اهو كله ضحك ع الدقون ,


ومن غير ماندخل في وصف مهازل مدارسنا اللي كلكم عارفينها .. اسألوا اي طالب في اي مدرسة


في اي حتة في مصر


س- ايه رايك في مدرستك يا حبيبي


ج- مدرستي وحشة .. ومعفنة .... ومتطورة:نسبة للطور يعني







مصر تعيش أزهى عصور الديمقراطية



وشك للحيط وقفاك ليا .. ماتتقالش غير كده ,


مش عارف ليه كل ما اسمع الجملة الاشتغالية دي بتسيب في وداني نفس الرنين اللي بتسيبه كلمة الملوخية ,


وده لأننا فعلا بنعيش في ازهى عصور الملوخية والكوسة وخلافه .. مش الديمقراطية بقى


بس لو كان قصدهم بالديمقراطية انهم يسيبونا نتكلم زي ما احنا عايزين و في الآخر يعملوا اللي


هما عايزينه برده , يبقي ايه هوا تعريف الديكتاتورية بقى ان شاء الله .... أليس فيكم رجل رشيد





مصر أم الدنيا



اشتغالة قديمة اوي .. اتثبتنا بيها كتير من غير ما نفكر في معناها ,


مصر بلدنا وحبيبتنا وعلى عيننا وراسنا , بس قصدهم ايه يعني بمصر ام الدنيا , طيب دلوقتي لما هوا مفيش


اب للدنيا ..


قصدهم يعني ان الدنيا ابن غير شرعي لمصر .. كفاية تخبيط في مصر بقى يا جدعان


وعموما عشان نعرف مين ابو الدنيا وحفاظا على سمعة مصر اللي هيا ام الدنيا برده ..


انا باقترح نعمل تحليل دي.ان.ايه.


وكان الله حليم ستار










بيتهيألي كفاية عليكم اشتغالات كده عشان مايجيلكمش حول ,


لأننا لو فتحنا في الاشتغالات اللي عندنا في مصر مش هنخلص :


ابتداء بمجانية التعليم .. مرورا بالريادة والتفوق الاعلامي ..


وليس انتهاء بزيادة فرص الاستثمار والشفافية و .... و .... و .... و هلم جرا


مـــــنـــــقـــــــــــو ل

[TOYOTA]

مشكور على التوبيك الجميل ده
بس انت نسيت اشتغالات نفسينا
ههههههه
تقبل تحياتى

[| Tears Of The Moon ●]

مات الكلام بعد كدا
وهى الدنيا ايه غير انها اشتغالات؟؟
وادينا ماشيين
بس عارف أحسن حاجة إيــه؟
اننا بننفض وبنعمل نفسنا عبده الأهبل
واهى ماشية
تماام
حاسب على نفســك بقــى من أمن الدولـة

[!..!]

إيه الموضوع الإشتغالة ده ؟؟

يمكن أجي تاني أعلّق على الإشتغالات

شكراً مؤقتاً

.

[MeEeGoOoO(•'.'•)]

هههههههههههههههههههههههه

ماشى ياحوده

نورت يامحمود

[MeEeGoOoO(•'.'•)]

هههههههههههههههههه لا متخافش منا مامن على نفسى وقولت منقول

[MeEeGoOoO(•'.'•)]

نورتى ياوهم

وعلى فكره كله بيشتغل كله

ومستنى تعليقك

[جوليت]

دا اكبر اشتغالة على العموم مقبولة

[..●●آه...لو●●..]

عالبركه

[| Mannora ●]

اشتغالات اشتغالات.....