شعر فى حب الريس

**● **TiTaNiC LoVeR** ●** · 19-09-2007 11:11 PM

رسالة فى حب الريس

أنا مبخافشى وحفضل أقول

كلمـة حــق عليها مسئـول

إن الريس راجــل طيــب

وبشعبه دايما مشغـــــول

مشغول انه يلم فلوسنا

بره سويسرا يحوشهالنا

وف حسابات سريه يشيلها

نفسه يأمن مستقبلنا

شفتو ازاى بقى قلبه رحيم

عنده ايمان وضميره سليم

بيجوعكوا لجل تخسوا

آه ياشعب يا محتاج لرجيم

من جهلكوا بتقولوا بطاله

وان الاحوال مش شغّاله

دا الراجل نفسه يريحكم

هى الراحه تبقى عواله؟

أما حكاية المنتجعات

ليه تسموها المعتقلات؟

ليه الظن

وسوء النيّه

نفسه يفسحكوا يا بهوات

أما الكرسى واللى اتقال

دا كلام مش محتاج لسؤال

الغلطه دى غلطتنا يا عالم

إن مجبناش كرسى تيفال

والله انتم ظالمين الراجل

ضيّع عمره ومين يستاهل

حتى الاكل بياكله بدالنا

طالع واكل نازل واكل

بعد دا كلّه........ماله الريس؟؟؟؟؟

منقول

**Messi** · 20-09-2007 12:28 AM

شكرا يا تايتنك علي الموضوع
بس على فكره الريس بتاعنا احنا ظالمينه واللهى

**Emz009** · 20-09-2007 04:31 AM

يا راجل حرام عليك
هى دى أشكال تتظلم
اللى زى دة لو اتظلم يبقى احنا بنعمل فيه خير لان احنا بندّيله حسنات
والله يا جدع حتى الظلم خسارة فيه

**Messi** · 20-09-2007 11:23 AM

وجهه نظر برضه يا نجم
وكل سنه وانت طيب

**| **Silent Guardian** ●** · 20-09-2007 04:20 PM

بيعجبني في ميسي الهدوء
على الرغم اني مش من انصار الحزب الوطني و كمان مش اخوان
و تقريبا مليش اي اتجاهات سياسية
بس ساعات بقول لنفسي .. يا ترى لو انا مكان الريس هعمل ايه؟
بجد بلاقي نفسي محتاس
هفتح عينيا لامريكا و اسرائيل و اللاه هدور على الضرب اللي جوه البلد؟
اعمل اكتفاء ذاتي واعادي امريكا؟ و اللاه افضل دلوقتي باخد منهم اكل و كسبان ودهم عشان مش اودي شعبي في ستين داهية .. واللاه عاجبك ان يتاخد منك ابوك او امك او اختك منك في عز الظهر و يتقتلوا و انت مش قادر تتكلم زي مبيحصل في العراق
و في نفس الوقت انا شايف انه مش ملاك ..
يعني حقق مكاسب مادية ليه هو و اولاده بالمليارات .. دي متقدرش يا ميسي تقول عليها حاجة
و الحل فين؟ الله اعلم
عامة شكرا يا تايتنيك على الموضوع
و شكرا يا emz على المشاركة
و شكرا يا ميسي على المرور
و انا بقى هروح من غير ما حد يقولي كلمة حلوة.. صح؟

سلام و على الله كلامي ميزعلش حد