خارطة التهييس لايان التدريس

**Muslim.Girl** · 27-11-2009 01:51 AM

الموضوع دة منقول حبيت انزله عشان كل الطلبةاللي معانا يستفيدوا وربنا معاكم:

والله وانا اول الناس هتستفيد وبالذات طلاب الثانوية العامة اهئ اهئ
اسيبكم بقى مع الموضوع:

دخلت أيام الامتحانات وبدأت معها أعراض متلازمة الامتحانات الأزلية المستعصية..حضور محاضرات..مذاكرة بانتظام..رايح تصور ورق وراجع تصور ورق....لا للنوم..لا للانترنت..لا للفضائيات.. الصلاة في البيت جنب المكتب..هالات سوداء حول العين..زيادة في الوزن..تناقص حاد في اللب والسوداني والشاي والقهوة من السوق..مقاطعة لمعظم الأصدقاء..
هذا ما يطلق عليه باختصار الغباء الدراسي حيث سيؤدي في النهاية لكل شئ غير النجاح..

خارطة التهييس لأيام التدبيس

طبعاً كلنا عارفين إن فترة الامتحانات كلها تدبيس..تدبيس ورق علشان المذاكرة وتدبيس ورق علشان البرشام وتدبيس في الكرسي بتاع المكتب وتدبيس الكر تونة عالكمبيوتر والتليفزيون...المهم..احنا دلوقتي هنقدملك الحل في مواجهة التدبيس على طريقة سيمبا في الأسد الملك : " انا بضحك في وش المخاطر " أو الحكمة الجهنمية " هاكونا ماتاتا "...باختصار متسمحش للامتحانات بتدبيسك لأن فترة الامتحانات بتبقى محتاجة صفاء ذهني بس للأسف التدبيس ده بيخليك عندك اكتئاب وزعلان من مفيش حاجة وزهقان من قبل ما تمسك كتاب ولو لا قدر الله وصلت للحالة دي لازم تتبع خريطة التهييس القادمة وممكن برضه بيها تحمي نفسك انك توصل لكدة أصلا وطبعا الكلام ده على فترات مش علطوول علشان متقولش إني عايز أضيع مستقبلك وانجح أنا !!!!

أول حاجة ممكن تعملها انك تنزل الصلوات كلها في الجامع ومتصليش في البيت ويا حبذا - ( حلوة يا حبذا دي...صح؟!! ) – لو كان جنبكم جامع مكيف يبقى ميت فل وعشرة...

ممكن تمسك كتاب مسلي لو أنت من النوع المعقد اللي بيتسلى بالقراءة..والدكتور ابرهيم الفقي بيقوللك إن قراءة حرة لمدة تلت ساعة يوميا بتفرق معاك في المزاج..
سواء كنت معقد او مش معقد مش هتلاقي أحسن من صفحة في المصحف تعدل مزاجك..
ممكن برضه تعمل بقاعدة البدن السليم في العقل السليم وتسمع كلام الدكاترة وأمرك لله وتنزل في التراوة تتمشى شوية وممكن تتمشى لوحدك أو مع حد من حبايبك وتقزقز حبة لب وفول سوداني على حسابه لأن الدكاترة بيقولوا إن المشي بيحرك كل عضلات الجسم فبيساعد على النشاط والتخلص من الاكتئاب..بس متمشيش كتير بحيث تتعب ومتقدرش تكمل مذاكرة...

ممكن برضه تقوم تقعد نص ساعة وللا حاجة ع النت تشوف موقعين تلاتة حلوين
ممكن تقضيها شات ع الماسنجر مع حد من اصحابك وطبعا لو واحد جاب سيرة المذاكرة او الامتحانات اعمله بلوك علطول..

ممكن تطفي النور وتقفل عليك الباب – متفهمنيش غلط – وتقعد تدندن مع نفسك ذكر وتسبيح.....تسمع حاجة هادية..بس متقعدش ساكت لأنك مجرد ما تعطل الحواس كلها الامتحانات هتكبس على نفسك وتقعد تفكر فيها غصب عنك..

ممكن تنظم وقتك بحيث تقوم تتفرج على ماتش أو فيلم حلو بس خد بالك أنت محتاج ربنا يوفقك في الفترة دي جامد علشان كدة حاسب ع اللي بتشوفه سواء في التليفزيون أو ع النت لأن ممكن المعصية هي اللي تعكر مزاجك..

كدة الخريطة خلصت..واختار بقى الطريق اللي يناسبك علشان...

بعيونك تشوف النجاح.... وأنت مرتااااح !!!

لو عايز تحسن ذاكرتك فيه شوية حاجات قالتها مجلة (Good Living-issue 11) ممكن تساعدك:

الأكل:

لازم تهتم بالأكلات اللي ممكن تحسن أداء الذاكرة.. مثل:
التمر- اللوز- الحليب- التفاح– العنب الغامق- وكل مشروبات الصويا..

وكمان العسل وشاي الجنزبيل وعصير الجزر محفزات رائعة للذاكرة...
وتجنب الكحول طبعا لأنه بيضيع الذاكرة!!

النوم
فيه بعض الأبحاث بتقول إن النوم هو مرحلة بيقوم فيها العقل بتثبيت المعلومات اللي خدناها طول اليوم.. يعني يفضل سيادتك تنام بعد المذاكرة شوية بدل ما تفضل سهران الليل بطوله وإنت مش مركز وقاعد تذاكر برضه!
الراحة مهمة ولازم تذاكر وإنت مركز, وتنال قسطا مناسبا من النوم.. بس إياك يبقى النوم هي وسيلتك المفضلة للهرب من المذاكرة... أنا باقول نام لك شوية بعد ما تذاكر مذاكرة كتيرة..

الألحان :

لو فيه معلومة معصلجة مع سيادتك ومش عارف تحفظها, غنيها!

أيوه.. لو حاولت تفتكر كلمات أغنية.. مش هتعرف تفتكرها إلا لو افتكرت اللحن, ساعتها هيبقى سهل تفتكر الكلام..

الألحان بتخلي الحفظ أسهل.. مش ملاحظ إن بتوع الإعلانات بيحطوا اسم المنتج في أغنية؟
عرفت ليه؟
عشان الناس تحفظها!!

مثال: إعلانات أرقام الإنترنت.. أكمل الأغنية: 0777(وبعدين؟)

الإيمان بالنفس:

سبب رئيسي بيخلينا مش عارفين نحفظ, وهو اعتقادنا الداخلي إن ذاكرتنا ضعيفة!
لو آمنت إن ذاكرتك قوية وقلت كده لنفسك, هتترسخ جواك الفكرة دي.

بلاش لخبطة:

أي عمل غير منتهٍ في حياتك, ممكن يخلي بالك مشغول..
فضي نفسك للمذاكرة وبلاش تخلي بالك مشغول في 5638 حاجة!

الضحك:

الحاجات المضحكة عمرها ما بتتنسي..

لو فيه معلومة معصلجة معاك حطها في نكتة أو بص لها كأن دمها خفيف..

اخترع النكت واسخر من المنهج اللي بتحفظة هتلاقي نفسك بتحبه وعارف تذاكره..(مجرباها)

انتبه:

حط دماغك في الموضوع.. قرر إنك هتحفظ المنهج بنسبة 100% مهما كلفك الأمر, وذاكر بهذه العقلية وأنت مصمم إن: يا أنا يا الامتحان بقى!

خليك إيجابي:

حط خطوط تحت الكلام المهم, لخص النقاط المهمة, سمع لنفسك,..... اعمل حاجات ملموسة تحس منها إنك ماشي في الطريق الصحيح ومش سلبي.

ركز في التفاصيل:

اعتبر كل معلومة صغيرة مهمة.. واعتبر إنك هتحكي كل التفاصيل دي لواحد صاحبك بكرة وإنتم خارجين مع بعض.. اعتبر إن فيه ناس أصحابك عايزين يعرفوا التفاصيل دي وانك هتحكيها ليهم بكرة..

وخلي بالك..
ادي نفسك فرصة إنك تنسى شوية.. كل ما تذاكر كتير, هتنسى حاجات مش مؤثرة قوي..

لكن لو مذاكر قليل, لو نسيت معلومة واحدة هتروح في أبو نكلة!

اتكلم بصوت عالي:

بكده حواس كتير هتشتغل على المعلومة دي.. اشرح المعلومة دي لحد, أو اكتبها واقرأها تاني.. ماتبقاش بس مستقبل سلبي للمعلومة, طلعها من جواك برضه عشان ترسخ المعلومة أكتر.

المراجعة:
بعد كل ده.. راجع يا باشا!
وابقى قابلني لو سؤال وقف قدام سيادتك.
إن شاء الله يعني

أنا مش قصير وأوزعة..أنا طويل وأهبل!

كثير من الطلبة الفاشلين يردد بعض العبارات التي يستخدمونها كشماعة يعلقون عليها فشلهم ، فتجده يردد مثلاً:

أعمل إيه يعني ما أنا فاشل فاشل..
.أنا مش ممكن انجح في المادة دي أبدا..
مش ممكن أراجع الكمية دي كلها..
.محدش أسسني في المادة دي...
المادة دي بتسد نفسي..

وتسمى هذه العبارات الإيحاءات النفسية الانهزامية أو السلبية...كلام كبير..صح؟!!!

علشان متقعش في المطب ده اسمع حبيبك بيقول إيه بس بعد ما تصلي عليه، قال صلى الله عليه وسلم : " تفاءلوا بالخير تجدوه " ودي دعوة للتفاؤل والتفكير الايجابي وده محتاج شوية تعود أو بمعنى تاني إعادة برمجة للسوفت وير بتاع دماغك..حبة تخيل...

جرب كدة الليلة دي قبل ما تنام اقفل على نفسك الأوضة علشان محدش يسمعك وأنت بتكلم نفسك ولو إن دي حاجة متوقعة الأيام دي...كرر بينك وبين نفسك جملة حلوة.. طبعا مش هتقول أنا مش قصير واوزعة أنا طويل وأهبل !!! لا قول...

أنا واثق من مذاكرتي
المعلومات اللي هقراها بكرة هفهمها بسهولة
بكرة في الامتحان أعصابي هتبقى مرتاااااااااااااااااااااا حة جداً
على فكرة المادة دي هايفة واللي يقول غير كدة مبيفهمش حاجة
المادة دي هجيب فيها امتياز

وحاجات من كدة يعني، ودي علماء النفس بيقولوا عليها الرسالة العقلية الايجابية، يعني هتقعد تكرر جملة منهم لحد ما تصدق نفسك وفي الحالة دي هتعمل اللي كنت متخيل انه سابع المستحيلات..محدش يقول عليا لسعت من الامتحانات...الكلام ده والله كلام علمي بحت ومثبت بالتجربة.

اسمع اللي أكتر من كدة...الجملة اللي اخترتها علشان تكررها...اكتبها ع الكمبيوتر أو بخط كبير وحلو أو تعالى وأنا أكتبهالك ، وصورها وعلق نسخة منها في كل حتة ممكن تبص فيها...تحت زجاج المكتب..ع الحيطة أدامك..أدام السرير..اعملها خلفية للديسك توب او سكرسن سيفر..جنب باب الحمام..أي حتة بتتردد عليها باستمرار علشان تخلي المخ يصدق بجد وبسرعة.

يا ريت الجملة اللي اخترتها متكونش طويلة ويكون فيها معنى واحد، مش موضوع تعبير يعني وميكونش فيها كلمات تتعبك زي كلمة صعب وفشل لأنها هتطبع في المخ ويا سلام بقى لو تكون بالألوان الفاتحة الرومانسية وفوقها منظر طبيعي حلو زيك كدة أو منظر حاجة بتحبها أو مرتبطة معاك بذكرى سعيدة..الصورة اللي مرتبطة معاك مش حد تاني..

في الآخر أنا شخصياً أنصحك بإن تكون الكلمة اللي هتكتبها..

بعيوني هشوف النجاح..وأنا مرتاح

الامتحانات على الابوب ماذا افعل؟؟؟؟؟؟؟؟؟؟؟؟؟

من الجميل أن يحدد الإنسان هدفه بوضوح، ويسعى لتحقيقه بكل طاقاته، وبكل السبل، ولكنه لا بد وأن يستعد لبعض العقبات وأحيانا فإن الفشل مرة لا يعني أن الحياة قد انتهت وقديما قالوا: إن خسارة معركة لا تعني نهاية الحرب، وقالوا: علينا أن نسعى وعلى الله النجاح.

وقال المتنبي:
ما كل ما يتمنى المرء يدركه تأتي الرياح بما لا تشتهي السفن

وبما ان الامتحانات على الابواب فانى انصحك بالاتى: -

عليك أولا الاستعانة بالله والتوكل عليه ثم تقوم بتقييم قدراتك بوضوح، فقد تكون محبًا للمذاكرة والدراسة ولكن قدرتك على التحصيل ضعيفة؛ فيحتاج الأمر منك لجهد أكبر لتحقق نجاحًا في دراستك، ولتحسين أسلوبك في التحصيل والمذاكرة، إليك بعض الإرشادات التي وضعها المختصون للمذاكرة بطريقة جيدة:

1- قراءة ملخصات المواد والمضمون والفهرس للكتاب. ( طبعا احنا عدينا المرحلة دى )

2- قراءة سريعة للكتاب وتصفح سريع له. (عشان تاخد فكرة عامة)

3- أن تعرف الأشياء المألوفة لديك والأشياء الصعبة. ( في حاجات هتلاقى نفسك عارفها او مش هتاخد مجهود ذاكرتها لا سمح الله قبل كدا وحاجات معقداك )

4- أن تقرأ الجديد جيدًا وتستوعبه. ( عشان تبقى كدا عندك فكرة مبدئية عن المنهج كله )

5- أن تختبر نفسك كل فترة وتقيم ما درسته سابقًا. ( عشان ميبقاش اللى راح راح واتنسي)

6- أن تترك المادة الدراسية، وتعود لدراستها بعد فترة للتأكد من إجادتها. ( دا لو بتذاكر من اول السنة )

7- يفضل أن تحدد وقتًا ومكانًا ثابتين للمذاكرة بحيث تكون المذاكرة عادة باستمرار. ( ودا مش شرط اساسى لان في ناس زى مبتعرفش تعمل كدا )

8- قسم مذاكرتك على فترات فمثلًا خذ بعد كل ساعتين فترة راحة. ( ميبقاش كله ضرب نار يعنى)

9- تجنب أوقات التعب الجسدي مثل وقت العصر والعشاء ولا تسهر كثيرًا. ( دا مهم جدا ...........)

10- أنسب الأوقات للمذاكرة هو الوقت المبكر. ( اللهم بارك لامتى في بكورها ......)

11- ضع جدولا للدراسة والمذاكرة ولا تؤجل أوقات المذاكرة؛ فيصبح الإلمام بالمواد المتراكمة في وقت قصير فوق طاقتك. ( اول بأول وخلص .....واياكم من كلمة النهار لسه طويل)

وفي النهاية إن لم تحصل على التقدير المطلوب هذا العام فما زال في إمكانك المحاولة من بداية السنة الدراسية القادمة.

واعلم أننا يجب أن نرضى بما قسمه الله لنا فهناك الكثير من الأمور نتمناها ونسعى لها ولا ندركها، وبعد مرور الوقت نعلم أن من رحمة الله بنا ورأفته أن أكرمنا بالابتعاد عنها.

ولا تنسوا أن عدم حصولكم على تقدير هذا العام لا يعني نهاية لعالم وأن السعادة لا تنحصر في ان تصبح الاول على دفعتك ، فهناك الكثيرممن يحصلون على التقديرات الشعبية ويكونوا في سعادة لا توصف . واستعينوا بالله ولا تعجزوا

يعنى يا جماعة ربنا مش بينقص حد حقه ولا بياخد مننا الا اذا كان في خير لينا

يارب النقل يكون عجبكم
وبالتوفيق باذن الله
وادعوا لى ربنا يوفقنى السنه ده واللى جايه

**● **MiSs. NeRmOo** ●** · 27-11-2009 01:55 AM

ههههههههههههههههههههههه
نظرية انهم ينزلوو يصلوو كل وقت
وجامدة فعلا كلمة ياحبزة فريدة من نوعها حبتيين
وانا عن نفسى من متبعيين نظرية هاكونا ماتاتااا او لامونا ب شفاتة او زاتونة كلاماتاا
التلت نظريات دول لو اتبعتوهم
الحيااة طبعا هتختلف
وعلى رأى السندريلاا
الحياب بقا لونهاا بمبى
ههههههههههههههههههههههههه
اسفة ع الاطالة ياامورتى
مشكورة ع التوبيك الجاامد ياسكر