حصريا علي فكك : موسوعه الاسئله الغبيه واجاباتها النموذجيه

[MeEeGoOoO(•'.'•)]

هاى على احلى شباب وبنات


انا جايب النهارده توبيك غريب شويه بس

ان شاء الله التوبيك يعجبكم ومستنى رايكم





نبتدي بالصعايده(مع احترامنا طبعا لكل الصعايد)احسن ناس يا بوووووووي
===================================
ليه الصعيدى بينزل الميه فى الشمس؟
عشان مش مشترك فى الأهلى

لية بلديتنا بيلبس تي شيرت علية قطة ؟
عشان الفار ميلعبش في عبة


ليه الصعيدي بيحط جنبه منبهين ؟؟
عشان واحد يضرب والتاني يحوش

طب ليه الصعيدي بيحط جمبه كوباية شاي؟
عشان منبه

طب ليه بيحط كوباية قهوه؟
عشان لو الشاي مرنش

طب ليه الصعيدي وهو بيتغدى بيحط جمبه كوباية ميه فاضية وكوباية ميه مليانه؟
عشان ممكن يشرب وممكن ميشربش

و ليه بيحط ملح على راسه ؟
علشان يبقى حدق

و ليه بيحط سكر على الكرسى قبل ما يقعد ؟
علشان تبقى قعدته حلوة

ليه الصعيدى لما بيشوف البرق بيضحك؟
عشان الصوره تطلع حلوه

ليه الصعيدى بيلبس شرابات خضراء ؟
عشان خضرا لابسة شراباته

طب ليه بيلبش شرابات زرقاء؟
عشان شربات خضرا مغسوله

صعيدى واقف فى الشمس و معاه دودة ليه؟
عشان الدكتور قالله اقف فى الشمس دقائق معدودة

لية الصعيدى بيحط خيارة تحت المخدة؟
عشان لو حط طماطماية هتتفعص

طب ليه الصعايده بيصنعوا الاتوبيسات بالعرض؟
عشان يركبوا كلهم قدام

خمس صعايدة فى غواصة غرقوا ليه؟
سمكة خبطت عليهم

ليه الصعيدى الصغير اذكى من الصعيدى الكبير؟
عشان ما بقالوش كتير صعيدى

ازاى تعرف البواب الصعيدى ؟
بينضف الاسانسير كل دور

صعيدى لغى معاده مع الدكتور ليه ؟
عشان عيان

حاجتين سود بينهم حاجة بيضة ايه ؟
عثمان احمد عثمان

ليه الست الصعيدية مابتشربش ميه طول فترة الحمل؟
عشان القفل اللى فى بطنها ما يصديش

ليه الصعيدى بيشرب الدوا قبل معاده؟
عشان يفاجىء الجراثيم

ليه الصعيدي بيدهن شقته باللبن؟
عشان تبقي شقه ملك(milk)

ليه الصعيدي بيلبس عمه؟
عشان يعرف راسه من رجليه

ليه بياخد معاه شومه و هو طالع الجبل؟
عشان لو الشمس ضربته يضربها

ليه الصعيدي لما بيتفرج على التليفيزيون بيحط جردلين مية جنبه ؟
عشان يجيب قناة (البحرين)

واحد صعيدي ماشي تحت الكوبري و رافع ايده ليه ؟
عشان الكوربري مسلح

واحد صعيدي بعت رساله فاضيه لأهله في الهند ليه؟؟
زعلان ما بيكلمهمش


ليه بيلبس نضارة و هو نايم؟
عشان يشوف مين اللي بيحطله العماص في عنيه

ليه بياخد معاه شمسيه و هو بيعوم؟
عشان لو الدنيا مطرت

طيب ليه بيخلي اخوة ينام تحت الشباك؟
عشان يخض الناموس و هو خارج

ليه قتل ابوة؟
عشان يطلع رحله الايتام

طيب ليه قتل عمه؟
عشان ابن عمه يطلع معاه

طيب ليه قتل خاله؟
عشان الاجرام بقي في دمه

طيب ليه انتحر بعد كده؟
عشان رحله الايتام اتلغت

طيب ليه بقي بيقعد في حفرة؟
عشان يفكر بعمق

طب ليه بيدرس فوق السطح؟
عشان يعمل دراسات عليا

طيب ليه بيذاكر مع الشيطان؟
عشان الشيطان شاطر

ليه مش بيشتري صابون؟
عشان اخوه بيعمله سندوتشات

ليه مش بيشتري رابسو؟
عشان اخوة بيعمله فوار

طب ليه مبيشتريش بمب؟
عشان اخوة بيقزقزة

واحد بلديتنا واقف قدام المرايا و مغمض عنيه ليه ؟؟
بيشوف شكله و هو نايم

ليه الصعيدي لما يتعور يطلع فوق السطوح؟
عشان الجرح يكون سطحي

ليه الصعيدي لما يجي يستحمى باخد عائلته كلها معاه؟
يستخدم شامبو العائله
==================================
ندخل بقى على الفراعنه
==================================
ليه الاهرمات تلاته بس مش اربعه او خمسه؟
عشان على قد الشلن

ليه الصعيدى بيحب يتصور عند الهرم ؟؟؟
عشان يطلع على الشلن

طيب وليه مبطلعش على الشلن؟؟
عشان بيقف ورا الاهرامات

ليه الأهرامات منتعشة ؟
عشان قدامها ابو الهولز

ليه الهرم الكبير اصفر؟
عشان خوفو

ليه الفراعنة حاطين فى الهرم حديدة من فوق؟
عشان يرفعوه منها و ينضفوا تحتيه

الفراعنه كانوا لما بيقعدوا على القهوه كانوا بيشربوا ايه؟
امون(لمون يعنى)

طب بعد الصلاه كانوا بيقولوا لبعض ايه؟
هرما

طب ليه الفراعنه بنوا الاهرامات فى سنين كتيييييير؟
عشان كل اما يرصوا حجرين البوكس يجى وياخدهم

لما الفراعنة بيعملوا حادثة بيقولوا ايه؟
يا ساتر يا رع (على اسم الاله رع)

ليه الفراعنه ماكنش عندهم سكوتش منت؟
عشان كان عندهم ابو الهولز

===================================
الصيدلي (احنا يعنى)
===================================
ليه الصيدلى بيبنى عماره؟
عشان يسكن الالم

طب ليه خد مخالفه؟
عشان بنى دور اكسترا

ليه القطر بيقف قدام الصيدليه؟
عشان يعاكس القطره

دكتور صيدلي اتجوز دكتوره صيدليه خلفوا ولد حيسموه ايه؟
احمد على اسم جده

طب لو الولد انحرف حيبقى اسمه ايه؟
سرنجه
===================================
القمم
===================================
ما هى قمة الحيره؟
اجلس فى ركن غرفة مستديره

ما هى قمة الذكاء؟
هو ان تجد ركن الغرفة

ما هي قمة الالم؟
التزحلق ع زحلاقة مغطاه بشفرات حلاقة وشظايا الزجاج

ما هى قمة العذاب؟
تقع فى حوض به كولونيا

ايه قمةالهدوء؟
.انك تسمع شريط فاضي

ايه قمة الهبل؟
.انك تقلب الشريط

ايه قمةالغتاتة؟
.انك تعيد مقطع اعجبك

ما هى قمة الادب؟
انك تخبط على باب الثلاجة قبل ما تفتحها

ما هى قمة الذهول؟
ان حد يفتحلك الباب
===================================
الافيال
===================================
عايزين نركب اربع افيال فى عربيه مرسيدس نعمل ايه؟
2قدام و2 ورا

طب مين اللى حيسوق؟
اللى معاه رخصه

طب عاوزين نركب 8 افيال فى عربيه جيب نعمل ايه؟
نبيع الجيب ونجيب اتنين مرسيدس ونركب الافيال 4 فى كل عربيه

طيب كيف نضع فيل ف الثلاجة ع 3مراحل؟
نفتح الثلاجة
ندخل فيها الفيل
نقفل الثلاجة

ازاى نصطاد الفيل الاحمر؟
نصطاده ببندقيه الفيل الاحمر

ازاى نصطاد الفيل الاخضر؟
نستناه لما يستوى ويحمر ونصطاده ببندئيه الفيل الاحمر

ازاى نصطاد الفيل الازرق؟
نكسفه يحمر نصطاده ببندقيه الفيل الاحمر

ازاي تعرف ان 8افيال موجودين ف شيراتون من غير ما تدخل؟
اذا وجدت 2مرسيدس ف باركينج الفندق

طيب عندنا طياره شحن بضايع عليها حموله تقيله وعاوزين نرمي منها حاجه يا ترى نرمي ايه؟
التلاجه عشان فيها الفيل

طيب واحد ماشي ف الصحرا ومات ليه؟
التلاجه وقعت عليه

طب ليه الفيل بينزل البحر بالشورت الخضر؟
عشان الشورت الازرق مغسول

ازاى نحط فيل فى ازازة؟
نزقه و هو بيشرب

و ازاى نحط فيلين فى ازازة من غير ما يلمسوا بعض ؟
نحط بينهم فيل تالت

طب ازاي تركب 4 فيلة على بسكلته؟
واحد يسوق ويمسك الازازة

عندنا 100 فيل وعاوزين نركبهم فى عربية نعمل ايه؟؟
نجيب عربيه ميتسوبيشي ونركب كل فيل في سوبيشي
===================================
شبكات الموبايل
===================================
ليه بتوع موبينيل حيدخلوا الجنه؟؟؟
عشان احسن ناس

طيب ليه السمك بيخاف من فودا فون؟
عشان اقوى شبكه

طب ليه عملاء فودافون ما بيبردوش؟
علشان فودافون أقوى تغطية

ليه مصر مش محتاجه بطاطين ؟؟
عشان اتصالات غطت مصر كلها

طيب ليه اتصالات دايما بتضحك كدا :-)؟
عشان اتصالات اهلا

===================================
افلام
===================================
لو حلاق عايز يعمل فيلم يسميه أيه ؟
سوالف النينجا

لو مهندس عايز يعمل فيلم يسميه أيه ؟
حين مسطره

لو دكتور عايز يعمل فيلم يسميه أيه ؟
بلستر فى المعسكر

لو حلاق عايز يعمل فيلم تانى يسميه أيه ؟
على سبايكى

لو عيل عايز يعمل فيلم يسميه أيه ؟
المصاصه لا تزال فى جيبى

لو راعى عايز يعمل فيلم يسميه أيه ؟
بئر الخرفان

لو مهندس كمبيوتر عايز يعمل فيلم يسميه أيه ؟
أيام الرامات

===================================
لعيبة الكوره
===================================
ليه ابوتريكه بيلبس 22؟
عشان 21 ضيقه عليه

طيب ليه مابيلبش 23؟
عشان فلافيو لابسها

طيب ليه الاطفال بيحبوا ابو تريكه؟
عشان صانع العاب

طيب ايه اللعيب اللي فاضي على طول؟
وائل جمعه عشان الجمعه اجازه

ليه مدرب تشيلسى مش بيلعب بالاك؟
عشان تامر حسني بيقول ريح بالاك

ليه بتوع مانشيستر يونايتد بيصحوا م النوم بدري؟
عشان عندهم سكولز

واحد مانشستراوي جدا دخل محل ياترى هيشترى ايه؟
جبنه روني


===================================
تشكليه بقا كلو على كلو
===================================
لو واحد صيني طلع القمر ايه اللى يحصل؟؟
الصينيين حيقلوا واحد

طب لو واحد ياباني طلع القمر ايه اللى يحصل؟؟
حيقابل الصيني فوق

ليه السودانيين ايديهم بيضا من جوا ؟؟
عشان كانوا ساندين على الحيطة و هما بيرشوهم

ليه الخشب يتيم؟
علشان مقطوع من شجرة

ليه بنحط اللبن على الشاي؟
عشان التفل يرضع

ليه عمرو دياب وهو بيغي راجعين ما خبطش فى اللى وراه؟
عشان طلعت زين كان بيقوله تعالى تعالى تعالى

ليه التعبان بيحط عدسات لاصقة؟
عشان مالوش ودان يحط عليها النضارة

حاجة طايرة فى السما و بتقول نياو اية هى ؟
قطة بيضاء مضروبة بالشلوت

طب حاجة سودة طايرة فى السما و بتقول نياو اية هى ؟
غراب بيستهبل

طب حاجة بنى طايرة فى السما و مبتقولش اى حاجة اية هى ؟
فردة الجزمة بتاعة الراجل اللى ضرب القطة البيضاء

طب حاجة سودة طايرة فى السما و مبتقولش حاجة اية هى ؟
غراب عاقل و مبيحبش الاستهبال

حاجة زرقاء طايرة فى السما اية هى ؟
ذبابة لابسة بنطلون جينز أزرق

طب حاجة سودة و فيها خط أحمر و طايرة فى السما من الشرق للغرب
اية هى ؟
ذبابة لابسة فستان سواريه و حاطة روج و رايحة فرح واحدة صاحبتها

طب حاجة سودة و فيها خط أحمر و طايرة فى السما من الغرب للشرق
اية هى ؟
نفس الذبابة نسيت حاجة فى البيت فرجعت تجيبها

حاجة سودة ماشية فى الصحراء اية هى ؟
سرب نمل رايح يعزى

نقطة سودة على الحيطة اية هى ؟
ذبابة

طيب نقطتين سود عالحيطة ؟
فيشة .

طب 3 نقط سود على الحيطة تبقى اية ؟
ذبابة و فيشة

طب 54 نقطة سودة على الحيطة تبقى اية ؟
يبقى الدهان بيقشر

بيضه وقعت ومتكسرتش ليه؟
علشان ربنا ستر او عشان مدهونه بمعجون سيجنال تو

ليه الطماطم حمره ومدوره؟
عشان لو كانت طويله وخضرا كانت هتبقى خيار

ليه شجرة الدر اسرع من البقره؟
عشان شجرة الدر م الجواري ... اما البقره م المواشي

فرخه وقعت م الدور ال 13 لما وصلت الارض وصلت من غير ريش يا ترى ليييييه؟
عشان وهى نازله عماله تنتف فى ريشها وتقول ح موت .. مش ح موت...ح موت مش ح موت


نمله بتجرى وبيجروا وراها تسع نملات ليه؟
عشان جابت جون

مره 1 2 3 دخلوا الحمام طلعوا 3 2 1 ياترى ليه؟
عشان دخول الحمام مش زى خروجه

طيب مره 1 2 3 طلعوا الجبل نزلوا 3 2 1 ليه؟
عشان فى حمام فوق الجبل

ليه عسكرى المرور بيلبس حزام اصفر؟
عشان البنطلون ما يقعش

إيه اللى بيطير فى السماء وبينور ويطفى؟؟
عصفورة لابسه أميجو بينور

ما هو التشابه بين الكمبيوتر والاستريتش؟؟
الآثنين بيجيبوا أدق التفاصيل

صعيدي حاطين صورته على اشاره ليه؟
احذر مفاجآت الطريق

هل تعرف من هو اوفي مخلوق؟
نملة مات زوجها الفيل وقعدت طول حياتها تدفن فيه

لية السمك بيخاف من الجنية.؟؟
علشان الجنية فية 100 قرش

ايه اللى يعدي البحر وما يتبلش؟
الطياره

ايه الفرق بين امريكا والفلاشه؟
USB والفلاشه USA امريكا

لو واحد مات ايه اللى يحصل ؟
نبتدى العد من 2

ليه الميكانيكيه بيحبوا الكمبيوتر؟
عشان بيقعدوا ع الفتيس بوك

واحد ميكانيكى ياترى هيعمل ايه فى فرحه؟
اوبل بوفيه

ليه اللى بيلعبوا طاوله بتبقى ريحتهم مش حلوه؟
عشان بيشوفوا الدش كل فين وفين

واحد رجع م السفر يا ترى مامته قالتله ايه؟
قالتله بيضتين

ماهو الشئ اللي ننام عليه ونجلس فوقه ونغسل اسناننا بيه؟
السرير والكرسي وفرشاةالاسنان

طب ايه الحيوان اللي بياكل ويشرب بديله؟
كل الحيوانات بتاكل وتشرب بدلها .. عمرك شفت حيوان ساب ديلو وراح ياكل...!!

في نمله نايمه على بطنها ليه؟؟
بتحل الواجب

ليه الكدب دايما بيركب عربية؟
علشان مالوش رجلين يمشي عليها.

واحد شرب بنزين و راح المستشفى جرى و على الباب وقع ليه ؟
البنزين خلص

واحد قتل ابوة وأمة وخالة وبعدين قطع رجلة ...ليه؟
عشان رجله ما تجيش في القضية

البدو فى الصحراء بيركبوا ايه ؟
بيركبوا إبل فيكترا

ليه القطنة مش حتدخل النار ؟
علشان مدام نظيفة قالت القطنة مابتكدبش

إيه أسرع حاجة بتيجي من أي مكان في الدنيا؟
الجون بييجي في ثانية

إيه آخرة كل شيء؟
الهمزة اللي على السطر.

ليه العربيه الجامبو سموها عربيه جامبو؟
عشان فيها مكان لاتنين بيركبوا "جمب"بعض

ليه الكيبورد حتتدخل الجنه؟
عشان عندها زرار تاب

ليه الكيبورد مش بتنام؟
عشان عندها شفتين(shift)

ليه القطر مهم؟؟
عشان تحتيه خطين

طب لو تحتيه خط واحد؟
نعربه

ليه القطر بيقف فى المحطة؟
علشان ما بيعرفش يقعد

طيب وليه القطر بيمشى بعد كدة؟
علشان زهق من الوقفة

له جنحان لكن لا يطير له أعين لكن لا يرى له منقار لكن لا يأكل يبقى ايه؟
عصفور ميّـت

ليه سندوتشات الكفته والبطاطس بتجري؟؟
عشان وجبات سريعه

حاجة ماشية على الارض و بتعمل زززززززز ايه هى ؟
صرصار راكب موتوسيكل

طب ناس دخلوا شقة فعرفوا ان فيها صراصير عرفوا ازاى ؟
لقوا الموتوسيكلات راكنة جنب البلاعة

صخره وقعت من فوق عماره ولوح الازازه اللى تحتها ماتكسرش ليه؟
علشان موقعتش عليه

طب فرخه بتعدى الشارع وماتت فجأءه ليه؟
الصخره وقعت عليها

ليه اليابان معندهاش حنان ؟؟
عشان هي في قاره ( آسيا )

حاجه بتجري وعندها راسين و 8 ارجل؟؟
كلبين بيجروا جنب بعض

ليه القرد سريع ؟؟
عشان القرد في عين امه غزال

ليه الكلب بيهوهو ؟؟
عشان القطه بتنونو

ما هو اقدم حيوان؟؟
الحمار الوحشي عشان لونه ابيض واسود

طب ايه هو اجدد حيوان؟
القنفد عشان بشوكه او الكنجر عشان بكيسه

طب ايه هو اطخن حيوان فى الغابه؟
التعلب عشان فات فات fat fat

طب ايه هو الحيوان اللى مشغول على طول؟
الخرتيت تيت تيت تيت تيت

عكس مدير عام؟
مدير غرق

يه النملة بتقعد جنب البحر وهى بتقرا؟
علشان تبل صباعها قبل ما تيجى تقلب الصفحة

ليه النملة ما بتاخدش الفيل قصادها على العجلة؟
علشان بيقعد يلعب فى الجرس

ليه النملة و الفيل ما بينزلوش البحر مع بعض؟
علشان مفيش غير مايوه واحد

ليه النملة ما بتتجوزشى عمود النور؟
علشان شوارعى

فرخه معلقه سلسله فيها صوره بيضه ليه ؟؟
صورتها و هي صغيره

فرخه معلقه سلسله وفيها صوره بيض اومليت ليه ؟؟
صوره اخوها الشهيد

عاوزين نطير كلب نعمل ايه؟
نضرب فى واحد على كلب الكلب يطير مع الكلب

ليه النمر بيجري ورا العربية؟
.عشان يشوف النمرة

ليه الأرنب مبيعديش من قدام القهوة ؟؟
بيخاف من السحلب المكار

دكتور أسنان ارتكب جريمة يسجنوه فين ؟؟
في سجنال تو

ليه في الأرجنتين مش بيزرعوا تين ؟
لأنها من الدول اللا تينية

ما اللذى لة 2رأس و8اقدام؟
قطتان

لو عاوزين نطلع الدور السابع من غير سلم او اسانسير او اى حاجه نعمل ايه؟
نشرب سفن اب

طيب حاجه بيضه وطويله ورفيعه؟
فتله بيضه

طب حاجه سودا وطويله ورفيعه؟
خيال الفتله البيضه

ما هو عكس كلمة كونكريت؟
لا تكن كريت

ما هو عكس تلميذات؟
Don't tell me that
ما هو عكس نجوم؟
نجعد

ابره وقعت ومرنتش ليييييه؟
عشان ممعهاش رصيد

ايه هو الحيوان التعيس؟
القطة

ليه؟
عشان ديما تخربش ومتكسبش

ليه الهوت دوج مش راجل؟
علشان سوو-سيس

عكس نجيب محفوظ ؟
.نودي محفوظ

لما الطماطم بتعطس بتقول ايه؟
.... كا كا كاتشبب


طب ليه التلاجة غبية؟
عشان بتحفظ الاكل .. مبتفهموش


واحد تايه في الصحرا ومعاه مسطره حرف تي ..يعمل ايه ؟؟
1- يسمك المسطره ويقيس مسافه
2- يكاملها تبقى سرعه
3-يكاملها تاني تبقى عجله
4-يركب العجله

امتى السما بتشتي بدنجان؟
لما الدنيا تبقى مسقعه

طيب وامتى بتشتي برتقال؟
لما تبقى ساقعه تانج

واحد ميكانيكي فتح مصنع شيكولاتة يسميه ايه؟؟
كالاكسى

طيب ميكانيى بيعاقب الصبي بتاعه ليه؟
حاطله كومنت وحش على الفتيس بوك

ليه القطه بتدخل عن الحلاق؟
عشان الباب مفتوح

طب ليه الأقرع بيدخل عند الحلاق؟
. عشان ياخد القطه

عكس بالونه ايه ؟
نشفونا

خمسه صعايده قاعدين في اوضه كل يوم يخرج واحد ليه؟
بيلعبوا ستار ميكر

واحد ماشي في الشارع و لابس كوتشي ابيض ليه ؟
عشان ماشي مع الطقم


قطه بنت عم قطه تانيه ... وقطه تالته بنت عم التانيه ... و قطه رابعه تبقى بنت اخت التالته ...... و قطه خامسه تبقى عمه الرابعه ... وقطه سادسه تبقى بنت خاله مراة عمه الخامسه
تبقى القطه الاولى تقول القطه السادسه يا ..... ايه ؟
تقولها ناو ناو

ايه الحاجة اللى تطفوا على المياه واول حرف منها ح؟
حتة خشبة

ايه الحاجة اللى تطفوا على المياه واول حرف منها ب؟
برده حتة خشبة

ايه الحاجة اللى تطفوا على المياه واول حرف منها ن؟
نفس حتة الخشبة

ايه الحاجة اللى تطفوا على المياه واول حرف منها ه؟
هى هى حتة الخشبة

ايه الحاجة اللى بتطفوا على سطح الميه و أول حرف منها ألف ؟
انت مابتتعلمش ما قلت لك حتة الخشبة

ما هو الحيوان الذي يعيش تحت الماء ويأكل الزلط؟
هو:الحيوان الذي يعيش تحت الماء ويأكل الزلط

ليه مفيش لعب كوره يوم الجمعه؟
عشان الكوره مع دريم

طب ليه فى لعب كوره يوم السبت؟
عشان الكوره فى الملعب

طب دى محتاجه سنة تفكير.....
عندنا حمام سباحه عمقه عشرة متر وعندنا فوق الحمام دا منط على ارتفاع اربعين متر ورمينا زلطه...حتوصل للقاع فى اد ايه؟
مش حتوصل عشان الحيوان الذي يعيش تحت الماء وياكل الزلط حياكلها قبل ما توصل

لماذا نشرب الشاى؟
عشان مش بيتاكل

ما الشى اللذى نفعله قبل الخروج من المنزل؟
ان نكون داخل المنزل

ما هو الشىء اللذى يتكلم بكل لغات العالم؟
صدى الصوت

ليه الرجل الاخضر سموه الرجل الاخضر؟
عشان لما بيجي يركب الموتوسيكل بيعمل جرينننن جرينننن

===================================
الفـــروق
===================================
ايه الفرق بين الزير و القلة؟
فيه فوازير لكن مفيش فوقله

إيه وجه الشبه بين الحلاق وجورباتشوف ؟
الإتنين بيتعاملوا مع الروس

ايه الفرق بين الفيل و البرغوت ؟
الفيل ممكن يتملى براغيت لكن البرغوت مش ممكن يتملى فيلة

ايه الفرق بين المزرعة و البطاطس النصف مقلية ؟
دى فارم و التانية فارم فريتس

ما الفرق بين التليفزيون والغسالة ؟؟
مفيش فرق الاثنين بيستعملوا اريال

ايه الفرق بين القلة و الزير ؟
فيه فوازير و مفيش فواقلة

ايه الفرق بين عمرو دياب و إليسا ؟؟
إليسا بتعمل شريط كاسيت
و عمرو دياب بيعمل شريط كاراجل

ايه الفرق بين الخنفسه وفريق الكره؟
الخنفسه حشره
فريق الكره حداشر

إيه الفرق بين الليمون والزيتون ؟؟
الأولاني بيتعمل منه لاموناتة والتاني مابيتعملش منه زاتوناتة

ايه 5 فروق بين النملة و الفيل؟
1-رجل الفيل ممكن تنمل و رجل النملة مش ممكن تفيل
2-البيت ممكن يبقى فيه نمليه لكن ما فيهوش فيليه
3-تقدر تاكل سمك فيليه لكن ما تقدرش تاكل سمك نمليه
4-كل واحد له بروفيل لكن ما لهوش برونملة
5-You can feel but you can't namla

فروق بين البطة والوزة ؟
1- تقدر تحلق شعرك زلبطة لكن ماتقدرش تحلقة زلوزة
2- فية رحالة اسمة ابن بطوطة لكن مافيش رحالة اسمة ابن وزوزة
3- تقدر تبلبط في البحر لكن ماتقدرش تبلوز فية
4- كلنا بنتغطى في الشتاء ببطانية لكن مابنتغطاش بوزانية
5- الوزة كانت زمان بطة لكن الشيطان وزها


ازاي نفرق بين الارنب و الارنبة؟
لو جرى يبقى ارنب... لو جريت تبقى ارنبة

[Ahmed_Shosha]

هههههههههههههه
جاامده

[الهضبــــــــــــــــــه]

ههههههههه
تصدف ان اصعايده اذكياء واحنا اللي اغبياء

[MeEeGoOoO(•'.'•)]

نورت ياابو شوشه

هوا احنا مش اغبياء ولا هما كمان

بس خلاص النكت من يوم ماعرفناها وهيا عليهم

نصيبهم كده بقى

يمكن ده عقابهم من غبائهم فى حكايه الاخذ بالثأر والتقاليد الغبيه اللى كانوا ماشيين عليها واللى مازالو ماشيين عليها برده ومش هينفع تتذكر هنا

نورت ياحسام

[● TiTaNiC LoVeR ●]

ههههههههههههه
انا قريت نصهم
بس جامدين
هبقى اكملهم بعدين

[| لولا ●]

هههههههههههههههه حلوين جدا يا محمد تسلم ايدك

[Jasper]

انت فعلا جمعت الغباء كله فى التوبيك ده

[MeEeGoOoO(•'.'•)]

نورتوا ياجماعه التوبيك وكويس انه عجبكم

[CRASH]

هههههههههههههه

[● MiSs. NeRmOo ●]