مايك المنتدى

[| Silent Guardian ●]

الحب دح دح
الهجر كخ كخ

[| Silent Guardian ●]

و يا حلوة يا بلحة يا مقمعة
شرفتي اخواتك الاربعة

[| Silent Guardian ●]

بما اني معايا مايك المنتدى
فو انا راجع النهاردة من الجامعة
فكرت هتكلم في ايه
عامة انا فكرت في موضوع
يعني
انا مصدع بيه الناس بما فيه الكفاية
و انتوا طالبة معاكم صداع
فانا هتكلم فيه
الموضوع ده هو .....
نشوفكم بعد فاصل الاعلانات

[| Silent Guardian ●]

رجعنا بعد الفاصل
و بما اني معايا المايك
فهنتكلم في موضوع حلو قوي
اللي انا مصدع بيه الناس كلها

The Dark Knight
الموضوع ده كبير و مش خاص ببات مان و بس
انا اعرف The Dark Knight من قبل بات مان بكتير
بس متشديش قوي ليه الا لما شوفت الفيلم الاخير
The Dark Knight ده وراه حكاية كويسة الى حد ما تشدك ليه

اولا ترجمة The Dark Knight مش فارس الظلام
ترجمتها الفارس الاسمر
و الفرق بين لفظ الاسمر و الاسود , ان اللون الاسمر بيعتبر اكثر شدة في السواد من الاسود نفسه
فده مش مجرد فارس اسود , لا ده اسود من الاسود نفسه

طيب ايه الموضوع بقى؟
و يا ريت لو نركز شوية
اول ما اخينا ده ظهر , ظهر في انجلترا
في العصور الوسطى , اللي كانت انجلترا فيها متقسمة مقاطعات و ممالك صغيرة , كل امير ماسكله منطقة و بيحكمها و كانت الممالك دي منفصلة لدرجة ان ممكن امير يغزو امارة جنبها و يضمها ليه

المهم ان كان في عرف في الايام دي , ان لازم بيكون مع الملك فارس ابيض , الفارس ده بيبقى زي الحرس الجمهوري عندنا دلوقتي , لازق للملك زي خياله , و بيحميه في اي وقت و في اي مكان , هو العائلة و المالكة كلها
و هو اللي بيتولى كافة العمليات الحربية , و بيبقى معروف الشخصية للكل , يعني الناس كلها عارفة اسمه الحقيقي , و محبوب جدا داخل امارته و كل الناس تتمنه تخدمه من الاخر
و كان اهم صفة فيه , ان لبسه كله ابيض , و حصانه كله ابيض , و وشه مكشوف

في امارة من الامارات , حصلت حرب و مات الملك بتاعها , و تولت الملكة الحكم بعد جوزها , و كان بيعاونها الفارس الابيض
اخو جوزها , كان عايز ياخد امارة اخوه , فادعى ان الملكة زوجة اخوه خاينة و انها اتعاونت مع الاعداء , و انها كانت بتخون جوزها مع ملك الاعداء

اوبااااااااااااااا كده الحوار كبر

في الحالة دي , برده العرف في الوقت ساعتها بيقول , ان لو حد طعن الملكة في شرفها , بيبارز الفارس الابيض الخاص بالملكة , و لو الملكة مظلومة الاله مش هيخلي الفارس الابيض يتهزم و المدعي الكاذب بيموت
يعني من الاخر , اما قاتل او مقتول

نزل الفارس الابيض لساحة المعركة , هو و اخو الملك المتوفى , اللي اصلا معروف انه عمره ما اتهزم في مبارزة

و على الرغم من ان الملكة كانت مظلومة الا انه اتقتل و ثبتت التهمة على الملكة

طبعا كارثة
في الحالة دي برده العرف ان الملكة نفسها ممكن تنزل لساحة المعركة و تدافع عن شرفها , او انها تعيين فارس ابيض تاني ( و مين هينزل يبارز اخينا اللي عمره ما اتهزم في مبارزة ) او ان الملك نفسه ينزل يدافع عنها ( بس هو اتكل على ربنا خلاص من بدري )

كده العملية باظت

و قبل ما اخو الملك يحط ايده على المملكة
دخل ساحة المعركة فارس , لبسه كله اسود , و راكب حصان اسود , و مغطي وشه بخوذة سودا
و طلب انه يدافع عن شرف الملكة

الناس اتصدمت من منظره , و بعض الناس قالت عليه انه اكيد مش بشر , و سموه بالفارس الاسمر بسبب لونه

دخل الفارس الاسمر المبارزة و كسب و قتل اخو الملك و بكده يكون اثبت شرف الملكة ( طبقا للعرف السائد في الوقت ده )

و بعدها هرب و محدش عرف هو مين
و ده كان او دخلة للفارس الاسود في الموضوع
بعدها بفترة قليلة , كل الممالك اللي حواليهم طمعانين في المملكة اللي من غير ملك , و من غير فارس ابيض
و قامت الحرب , و مفيش ملك و مفيش فارس ابيض
و لما الناس احتاست كده
خصوصا ان حرب يعني خراب بيوت , يعني اطفال هتتيتم , يعني نساء هيبقى عبيد , يعني من الاخر ....
و قبل ما الناس تفقد الامل ظهر تاني الفارس الاسمر , و لم الجيش و دافع عن المدينة , و محدش برده عارف هو مين , و محدش عارف هو بيعمل كده ليه

كان بيعمل كل اللي يقدر عليه عشان الناس و لراحة الناس , حتى و ان كان ده ضد سعادته و راحته هو

و بعد ما الحرب انتهت اتبدلت نظرات الناس للفارس الاسمر
و اطلقوا عليه اشاعات انه بيتعامل مع السحر الاسود , لا اللي اكتر من كده انهم قالوا عليه ان هو اللي كان بيخون الملك مع الملكة و انهم كانوا مرتبين الموضوع سوا

رغم انه مش واخد حقه كفارس ابيض
رغم انه دافع عن المدينة و هي مفيهاش ملك و مفيهاش فارس يرتب الجيش
رغم انه مطالبش باي وضع في الحكم
رغم انه متعالاش على الناس و اخفى شخصيته
رغم رغم رغم رغم , و برده الناس افترت عليه و ظلمته

كان الفارس الاسمر بيختفى و بيظهر لما المدينة تحتاجه و تهتف باسمه خاصة في اوقات الحروب
و كان يظهر يحل المشكلة و يدافع عنهم
و بعد ما تخلص يفتروا عليه تاني
و رغم كده برده عمره ما قصر في حقهم

كان الافضل , لكنه كان منبوذ

و فضله كده , لحد ما في يوم قامت حرب , و مظهرش الفارس الاسمر
كان مات
و محدش عرف هو مين

دي الحكاية مع الفارس الاسمر اللي انا اعرفه بكل بساطة , حتى قبل ما يتعمل الفيلم بتاع بات مان

كنت عارف القصة , بس مكنتش في بالي
الا لما شوفت الفيلم الاخير لبات مان The Dark Knight
و استرجعت القصة الاصلية
اللي هوسني في الموضوع ان كان في حاجة مشتركة بيني و بين The Dark Knight الفارس الاسمر
و الله مش غرور و اي شكر في نفسي , اللي عارفني كويس عارفين اني اكتر واحد بغلط نفسه و مش بسامحها خالص على اي غلط بتعمله
الحاجة اللي كانت مشتركة بيني و بين الفارس الاسمر , اكيد مش سوبر هيرو , و اكيد طبعا مش العضلات

للاسف هي ..
هشوفكم بعد الفاصل

[| Silent Guardian ●]

انا حبيت الفارس الاسمر لسبب واحد
انه كان بيعمل كل اللي يقدر عليه عشان الناس
و مع ذلك الناس كانت بتفتري عليه
و مع ذلك , برده مش بيتاخر عنهم
غباء و الله
الا انه غباء مينفعش حد يحسابك عليه
و انا الحوار ده حصل معايا مرتين
وفي المرتين ماخدتش الفرصة اني ادافع عن نفسي
الاولانية انسحبت بكل هدوء لان مكنش في اوبشن تاني في وقتها غير كده
و التاني معرفتش الا بعدها بفترة و كان الحوار اصلا خلصان و انا في الطراوة و مش عارف اي حاجة

انا محبتش الشخصية دي عشان انا زييها
انا مجيش ربعها , و لا حتى تمنها
انا حبيتها بس عشان فكرتني بالحاجتين دول
بس
و مات الكلام على كده
و اي تعليقات على الفقرة دي مش هرد عليها
و ان شاء الله اشوفكم بكرة
في حلقة جديدة
خصوصا ان بكرة اخر يوم ليا على المايك
سلاموعليكم

[| Mannora ●]

حلوه القصه دى يا شومان

انا اول مره اعرفها...

بس بجد اللى عجبنى فى الفيلم اووووووووووى

انه منكر لذاته لطريقه كبيره اوى

لدرجه انه اخذ هو اللوم على نفسه فى كل حاجه فى الاخر


ونستناك فى حلقه بكره بقى

[| John cena ●]

جميله اوى الفكره ده

[| please smile ●]

يانهار دا انت مصدعاتى اخر حاجة
هههههههههههههههههه
حلو اوووى الكلام اللى انت بتقولة دة ههههههه

[Spider GirL(•'.'•)]

ليك دى يا مصطفى
وانت عندنا اجمل وافضل من اى فارس ( هو فى زيك يا كوكى )

[..●●آه...لو●●..]

وفي المرتين ماخدتش الفرصة اني ادافع عن نفسي
الاولانية انسحبت بكل هدوء لان مكنش في اوبشن تاني في وقتها غير كده
و التاني معرفتش الا بعدها بفترة و كان الحوار اصلا خلصان و انا في الطراوة و مش عارف اي حاجة
.
.
.
هــــــتنهيدهـــــه