مكنش يعرف إنه هيفطر فى الجنة !!!

**| سندباد ●** · 23-08-2009 06:27 AM

مكنش يعرف إنه هيفطر فى الجنة !!!

القصة دى على فكرة حصلت امبارح وحقيقية وليا كمان

الراجل مفتكرش اسمه ،، وبلده برده معرفهاش
أصل الموقف مكنش يحتمل انى أسأل فى الحاجات دى

أبتدى أحسن
البداية كان الموبايل رقم غريب بيرن وانا نايم ومش حاسس بحاجة
وطبعا أصحى على زعيق أمى اللى بتزعق دايما فى الدراسة
وللأسف بتكررها كتير فى الأجازة
بقت عادة ومبقتش تفرق كتير ...

قومت ولقيت واحد صاحبى بيكلمنى بيقولى : انا فى الاستقبال فى المستشفى مش كنا متفقين نروح سوا بعد السفر ولا ايه ؟؟
قلتله : حاضر طيب هستنى هصلى الظهر وآجى

صليت وروحت
وقعدت مع صاحبى شوية فى الاستقبال والجو شاعرى
واحد بيصوت بيشيلوا له ضوافره
وتانى جاى فى خناقة وبيتخيط فى دماغه
وعيل واقع من فوق الدولاب وبرده بيتخيط
وناس كانت جاية فى حوادث وكدة

المهم

واحنا وسط دا كله
لقينا ناس بتشتم بيقولوا فين البهايم اللى هنا ....والله جد
كانوا عايزين تقريبا العمال اللى بيشيلوا المرضى
بس المرة دى كانوا هيجيبوه من بره باب المستشفى

ولقينا واحد هو كان مليان شوية ومعاه ناس وولد صغير كدة صورة من ابوه بس على 10 سنين
والراجل فاقد وعيه ومفيش اى حركة

والولد الصغير قاعد يعيط ويقول : ابويا
وقعدنا نهديه
نقوله : اهدى بس والدكتور هيشوفه
والولد يقول : ابويا حبيبى انا عايزه بس يكلمنى
هو حلو صح
قلنا : ان شاء الله هيكون كويس ،، بس اهدى كدة
الولد قال : بس انا عايزه يكلمنى ..دا احنا كنا ماشيين مع بعض من شوية ووقع جمبى

قلنا : متخافش ان شاء الله هيكون كويس

الراجل مغمى عليه ومفيش اى حركة
قلنا جايز تكون غيبوبة كبد او سكر او اى حاجة

سألنا الولد : هو عنده سكر ، كبد ، ضغط
قال : معرفش

جه دكتور بيبص لقى مفيش نبض ولا حتى اى حركة تنفس
راح نقله علطول ع أوضة بتاعة رسم القلب
وحطوه على أجهزة
وكان وقت اننا نعمل انعاش لعضلة القلب بالضغط على صدره

فضلنا تقريبا ساعة الا تلت بالحالة دى ونبدل عليه تلاتة

لحد ما تعبنا وسيبناه
كان مفيش اى تحسن ولا تنشيط لعضلة القلب وجسمه برد
وكانت المفاجأة لما مراته قالت دا عنده القلب

طيب وبعدين
الدكاترة حاولوا يعملوله صدمات كهربية ومساج لقلبه لكن بدون اى نتيجة

وكنت خرجت أصلى العصر ورجعت أسألهم الراجل فين
قالوا : روح
قلت : هو ؟؟
قالوا : مات

قلت : سبحان الله
وملحقش ياكل الأكل اللى كان معاه
واضح انه معزوم فى حته مكنتش على باله

وانا لله وانا اليه راجعون

بس المشكلة انى متهزتش ... معرفش ليه
رغم انى كنت جمبه ومسكت ايده وحسيت برودتها وحاولت اشوف نبضها ..بس مفيش ...

بس بصراحة كل مفتكره .. وأقول ممكن الموت يخطف الواحد فجأة

ربنا يعافينا شر موت الفجأة

وربنا يرحمه ،،ويغفر له ويثبت أهله ويصبرهم على بلاءهم

نحسبه من أهل الجنة ،،لأنه مات وهو صايم

**********************************

**| Tears Of The Moon ●** · 23-08-2009 06:58 AM

سبحان اله
لا اله الا الله
ربنا يرحمه
شكرا محمود

**| لولا ●** · 23-08-2009 03:15 PM

ربنا يرحمه ويغفر له ويثبته عند السؤال وهو فعلا من اهل الجنه لانه مات وهو صائم
شكرا ليك محمود

**Jasper** · 23-08-2009 03:56 PM

لا اله الا الله ربنا يرحمه شكرا محمود

**Spider GirL**(•'.'•) · 24-08-2009 02:41 AM

وربنا يرحمه ،،ويغفر له

شكرا سندباد

**| سندباد ●** · 24-08-2009 02:46 AM

نورت يا احمد

نحسبه من أهل الجنة
وربنا يغفرله ويرحمه

نورتى يا لولا

يارب يا جاسر يارب

ويخفف عن أهله

--------------------------

اللى بيأثر فيا أكتر
لما بفتكر الولد الصغير وهو بيبكى على ابوه
لو أبوه شافه كده
عمره ما يقسى عليه أبدا ....

ماهو مش هيقسى عليه خلاص بالكلام
بس هيقسى عليه بالفراق

ربنا يرحم موتى المسلمين
---------------------------