الحلقه الخامسه من يوميات مشرف منحوس فى منتدى

[I'm Alive]

الحلقه الخامســه

ميزو مخاطبا سيد : متنساش تجيب الديجيتال كاميرا العهدة بتاعة المنتدى اللى بنصور بيها الأعضاء الجداد وش وقفا وهما بيسجلوا عندنا هنا أول مرة يوم الزيارة علشان تاخدولى كام صورة مع العيلة المالكة

سيد : أمرك يابوص....نتكلم دلوقتى عن التنظيم ... أقترح إننا كلنا نلبس بدل اسموكن سودا وبابيون أحمر

أحمد : بس شكلنا كده حنبقى زى السفرجية ياكنج .... أنا بقول يعنى بلاش نلتزم كلنا بنفس اللبس ... يعنى اللى عايز ييجى ببدلة ييجى... اللى عايز ييجى بجينز وتى شيرت ييجى... وكده يعنى

اسباى : فكرة حلوة يابو حميد التى شيرت دى....إحنا نلبس كلنا تى شيرت واحد عليه صورة ميزو كرمز للمنتدى وبنطلونات شورت زى بتاعة الكشافة وجزم اديدز وشرابات طويلة لغاية الركبة ونشغل فى الخلفية أغنية شادية دى اللى بتقول (غاب القمر يابن عمى يلا روحنى...دى النسمة أخر الليل بتفوت وتجرحنى) علشان الناس يعنى تعرف إن أنا وميزو ولاد عم

سمسم : ياعم شورتات إيه بس وغاب القمر إيه .... أهم حاجة نلبس كلنا نضارات سودا ونحط سماعات فى ودانا ونقعد نتلفت حوالينا وورانا ونبص لبعض كل شوية نظرات قبيحة ومريبة فى نفس الوقت... زى ما الحرس الخصوصى بتوع الريس بيعملوا ...ولازم نبقى على إتصال مع بعض باللاسلكى أثناء الزيارة.....مهم جدا اللاسلكى ده علشان ننبه بعض لو عضو من إياهم حاول التسلل أثناء الزيارة

سيد : لازم نحبس الأعضاء أثناء الزيارة اللى إحنا متأكدين من عدم ولائهم للريس ... المشكلة إننا لو عملنا كده مش حيتبقى غير تلاته أربعة ومش حنعرف نجيب أعضاء نوقفهم قدام أبواب المنتدى علشان يهتفوا ويرحبوا بالموكب

شيماء : مش مشكلة ... نجيب كومبرس على إنهم الأعضاء... كمان هيلزمنا حتتين سلاح.....لازم أوصل البلد عندنا أشترى كام فردة واجيب أنفار

تاليا : واجب برضه نشترى شوية بالونات وبمب والعاب هوا .... نسينا كمان نعمل قسم جديد فى المنتدى نسميه ( المستقبل) علشان جمال مبارك يفتتحه.....ولازم كمان نحط شريط سوليفان على كل باب من أبواب المنتدى علشان مبارك وسوزان وجمال يقصوهم....لازم ياجماعة كل واحد يقص له شريط على الأقل....ولو إتبقت شرايط بعد كده أقصهم أنا

تعالت أصوات المشرفين إحتجاجا على رغبة تاليا بأن تقص ما تبقى من شرائط

اسباى : وليه مقصهمش أنا

أحمد : محدش حيقص غيرى

اسباى : طب يمين على يمينك محد هيقص إلا أنا....ثم تنتابه نوبة من البكاء الشديد وتدور الدنيا به وتظهر أمام عينيه دوامات كأنه يتذكر أيام الطفولة والماضى المنيل بنيله ....يتمدد اسباى على الأرض ويتجمع المشرفين من حوله...

تقوم ضـى بعمل تدليك سريع للقلب لحد مافاق وبدأ يروى لهم قصته مع الإشراف

اسباى : زمان وانا عمرى 7 سنين كنت بروح مع أبويا الدكان كل يوم جمعة بعد الصلاة ...كان عندنا محل أقمشة فى الدرب الأحمر ..... كانت متعتى إنى أشوف العامل اللى فى المحل وهوه بيقص القماش للزباين....كان عنده مقص كبير قوى طوله يجى نص متر ... مره سهيته وخدت المقص وخبيته فى جيب القميص بتاعى لكن أبويا شافه ونزل فيا ضرب بالإقلام والشلاليت وإنضم له كل العمال فى الدكان لحد ما سخسخت.....من ساعتها وأنا أى حاجة بشوفها ببقى عايز أقص منها

أحمد : أمال لو حكيتلكم حكايتى حتقول إيه

ميزو : طيب .. ندخل فى البند اللى بعده والخاص بالمأكولات والمشروبات التي ينبغي ان نوفرها للسيد الرئيس واللى جايين معاه ، ممكن أسمع أرائكم ؟

اسباى : بـــس أنا جتلي فكرة جهنمية ، منها نعمل حاجة تشرفنا قدام الناس دي ومنها نوفر

سيد : قول يا أخ اسباى إحنا سامعين

اسباى : أنا انزل السوق أشترى كرومباية على 2 ك بتنجان أبيض وحزمة ملوخية خضرا و 4 ك لحمة ضاني ونخلى المشرفات يعملوا حلتين محشي و ملوخية وناكل كلنا ونهيص والريس برضه ياكل ويهيص ... والله الأكلة دي أنا فكرت فيها وتوصلت ليها من شكل أحمد نظيف

سيد : ممكن يا اخ اسباى تطلع بره شويه وهانندهلك لما نخلص

اسباى : حاضر .. بس ليه يا كنج ؟

ميزو : يا اخ اسباى بنقولك ريس ووزرا ومرات الريس وولاد الريس ... تقولنا محشي ، يا اخي عيب كده .. ده كان إستهلال لابد منه .. هـــــا يا سادة انا عايز مشاركين لا متفرجين

سمسم : بس وجدتها ... إحنا نعمل علب وجبات وكل وجبة فيها سندوتشن جبنة رومي وحتت جاتوة

ضــى : إيه نظام الأفراح البلدي ده ؟ عايزين أفكار محترمة يا أخوانا

شيمــاء : انا بأقترح المنيو الآتية : المين كورس يبقى بيكاتا بالشامبينيون مع كريب جورجيت وتشكين آلاموند والحلو يبقى باقيا بالمسطردة

سيد : يا شيمــاء الناس اللي جايه دول مصريين ولازم نعمل لهم حاجة يفهموها عشان ياكلوها ... خلص الكلام

ضـــى : ميزو .. ميزو .. ممكن أقول رأيي ؟

ميزو : أيوه وماله من حقك

ضـى : زي مانتوا عارفين أنا عندي مزرعة في الكيلو 36 وانا مربيه هناك كام دكر بط على فرختين عتاقي ، فأنا بأقترح إننا ندبح البط ده جنب الفراخ مع شوية برتقان بصرة من بتوع المزرعة ونمشي الليلة

span styleسمسم : والله شكلكوا هاتكسفونا مع المحشي والبط والكلام ده والريس هايجيب هايغلق المنتدى بسببكم ، يا جماعة الناس اللي جايه فيهم ناس كبيرة في السن يعني بالتأكيد عندهم السكر والضغط والكوليسترول والكلام ده .. عايزين حاجات خفيفة وصحية وعلى رأي المثل " صحي ومفيد "

سيد : شكرا يا سادة .. بعد ما أستمعنا إلى جميع الآراء بشكل ديمقراطي ديماجوجي .. احب أقوللكم إن انا وميزو إتفقنا من الاول إننا نتصل بمطعم مكسيم عشان يبعت لنا وجبات جاهزة وتبقى حاجة محترمة قدام الريس ...

اسباى : يحيا العدل هي دي الديمقراطية ... الله ينور عليك بس عدم اللامؤخذه إنتوا كنتوا جايبنا ليه وسمعتوا أرئنا ليه ؟

سيد : ممكن تسكت ؟

اسباى : حاضر ياعم .. حاضر ياخويا .. مكسيم مكسيم .. أهو برضه أحسن من مطعم أخر ساعة اللي جنب الجامعة العمالية

شيماء: بس يا سيد ماتنساش تزيد الوجبات عشان الاعضاء

سيد : اعضاء مين يا شيماء اللي هايكلوا من مكسيم ؟ يا ست الكل دول هانجيب لهم ساندوتشات فول وطعميه وحتتين طرشي وأقلب .. قال نأكلهم من مكسيم قال .. والله عال .. ناقص تقولي كمان ييجوا يسلموا على الريس ويتصوروا معاه

ميزو : ننتقل للبند اللي بعده ... المشروبات ... ولو سمحتوا اللي هاشاور عليه هو بس اللي يتكلم مش عايزين فضايح ... أيوه أتفضل يا اخ أحمد مع إنك مش مسموحلك بالكلام إلا بعد ما تقضي 6 شهور إشراف شاق مع الشغل .. لكن زي بعضه إنطلاقا من تعميق تجربة الديمقراطية وكــنفحة من عطفي ونبذة من حبي وشلحة من حناني هاسيبك تتكلم ......بس إوعى تعك

أحمد : ربنا يخليك لنا يا بوص ده أحنا من غيرك ولا حاجة وناقصنا كام مليون حاجة

اسباى : هايشتغل بقى في الاغاني الحمضانة بتاعت شادية ومصر اليوم في عيد وهاينكش لنا القصة بتاعته .. الشغل ده أنا عارفه

ميزو : مش انا قولت ماحدش يتكلم إلا اللي أشاور عليه .. قول يا أحمد قول يا حبيبي

أحمد : إحنا نجيب قزازتين نبيذ احمر يا كينج وكل واحد ياخد له بؤ عشان يفتح نفسه وياكل بمزاج

ميزو : خيبك الله !!!!!! خسئت وخسئت أفكارك ... خمر ؟.. منكر ؟ إنت عايز الناس تسكر وتقوم تدور الضرب في بعض .. وبعدين إحنا مستمحلينهم وهما فايقين لما نستحملهم وهما سكرانين ... بلاش كلام فارغ .. إتقى الله يا اخي .. ده أنا لسه راجع من العمره ... اعوذ بالله .. اعوذ بالله

أحمد : إيه يا ميزو منكر إيه وخمر إيه ؟ بالراحة علينا شوية .. انا قصدي عصير عنب وأنا اللي هاعصره بإيدي كمان

سيد : خلاص خلاص .. انا قررت انا وميزو أساسا إننا نقدملهم يانسون

تاليا : برافو عليك .. أنا بحب جدا الحاجات النيتشورال اللي زي دي

اسباى : ممكن اتكلم بقى ولا أروح ؟ أنا معاك يا كينج في فكرة اليانسون والمهدئات دي .. ربنا يهدهم يارب

[| Mysterious man ●]

تسلم اديك

[I'm Alive]

شكرا لمرورك روحيم

[Jasper]

على فكره صاحب المنتدى دزمه وابن دزمه ويستحق ضرب الدزمه هو بيعاملهم كأنهم عبيد عنده كده ليه

[I'm Alive]

والله ما ارف يامان
روح أسأله