اسئلة واجابتها لكل مسلم فى رمضان

**| لولا ●** · 12-08-2009 05:28 AM

بسم الله الرحمن الرحيم

ملحوظه: أغلب الكلام اللي في الموضوع ده قايله الأستاذ عمرو خالد

س-إيه من الثواب الهائل ممكن تاخده في شهر رمضان الكريم ؟؟؟

ج- ست حاجات

1- مغفرة جميع الذنوب التي مضت ,

قال صلى الله عليه وسلم : " من صام رمضان إيمانا
واحتسابا غفر له ما تقدم من ذنبه "

وفي حديث تاني : " من قام رمضان إيمانا واحتسابا غفر له ما تقدم من ذنبه "

وفي حديث كمان : " من قام ليلة القدر إيمانا واحتسابا غفر له ما تقدم من ذنبه "

معناه إيه الكلام ده

يعني اللي عايز تتغفر ذنوبه اللي فاتت كلها حتى الكبائر يصوم شهر رمضان إيمانا واحتسابا

طب ولو مقدرش أو فاته يوم : يقوم شهر مضان .....

ولو فاته : يقوم ليلة القدر

كإن ربنا عايز يقول لنا : هغفرلك هغفرلك , مفيش تفسير غير كدا

وهيبقى كل اللي فات من ذنوب إتمسح حتى الكبائر - ده مش كلامي ولا كلام أستاذ عمرو خالد ده كلام

النبي صلى الله عليه وسلم

2-عتق الرقبة من النار : يعني اللي فات إتمسح والرقبة دي مش هتخش جهنم " ولله عتقاء من النار وذلك في كل ليلة"

في كل ليلة ....... ربنا بينظر لعباده
والصادق المخلص منهم بيعتق رقبته من النار واللي يعتقه ربنا إستحالة يأسره تاني , هتقول ولو عصيت بعد رمضان ؟

من عتقه ليك إن بعد رمضان خيرك يغلب شرك

وطاعتك تغلب معصيتك لحد ما تموت لأنه سبحانه وتعالى أعتقك

والجنة بتقول : اللهم اجعل لي في هذا الشهر من عبادك سكانا

ومش ضروري يكون اللي هيتعتق رقبته أو اللي هتتعتق رقبتها دول من العلماء - لأ - السباق في رمضان ملوش دعوة بكدا

صوم بجد , تسبق العالم واللي حافظ القرآن

مين اللي قلبه هيموت إنو يرضي ربنا ؟؟؟

حماسة , همة عالية , إخلاص كبير

يسبق ولو كان عمل ذنوب ومصايب قبل كدا

ولو حتى كبائر - اللي هيسبق هوا المخلص

يعني ربنا كل ليلة بيعتق طب ال10 الأواخر إيه الفرق بينهم وبين أي ليلة ؟؟ عتق زياده

طب وليلة القدر ؟؟ عتق أعلى وأعلى

طب واللي ملحقش ؟؟

" من فطّر فيه صائما كان عتقا لرقبته من النار "

يعني هتتعتقوا هتتعتقوا

ربنا هيغفرلكوا هيغفرلكوا

معقول تفوتكوا الفرصة دي ؟؟؟؟؟؟؟؟؟؟؟؟؟؟؟؟

3-يستجاب فيه الدعاء - شهر إجابة دعاء - يعني دعائك هيبقى مستجاب

قال صلى الله عليه وسلم : " وللصائم عند فطره دعوة لا ترد "

مصدق النبي ولا مش مصدق ؟؟!!

" وقال ربكم ادعوني أستجب لكم "

كإن المعنى صوموا بجد ودعواتكوا مستجابة !!

طب صلوا على النبي ( كله في ميزان حسناتك, وفي ميزان حسنات أي شخص هيبعت الموضوع ده)

4- كنوز من الحسنات : من أدى فيه نفلا كان كمن أدى 70 فريضة فيما سواه

واللي يأدي فريضة تبقى ب70 فريضة فيما سواه
والحسنة بعشر أمثالها

يعني الصلوات ال5 = 5×10×70

يعني مش كفاية مسح الذنوب لأ وحسنات كمان ومضاعفه !!

أوكازيون حسنات

تخيلو إن اللي بنقول عليه ده غير ثواب الصيام نفسه !!!

ده اللي جوا الصيام في وسطه !!

اومال الصيام نفسه !!!! يبقى ثوابه إيه ؟؟؟؟؟؟؟

لأ ده موضوع كبير

يا ترى إيه

" من صام يوما في سبيل الله باعد الله بينه وبين النار 70 خريفا"

وفي حديث آخر" ..... باعد الله بينه وبين النار 100 عام"

وفي حديث آخر" ............. كما بين السماوات والأرض " !!

على حسب إخلاصك

في حديث جميل جدا بيقول

" كل عمل ابن آدم له تضاعف الحسنة بعشر حسنات إلى سبعمائة ضعف إلا الصيام فإنه لي وأنا أجزي به "

معنى كدا إن الصيام مبدئيا ثوابه مضاعف أكتر من 700 ضعف

طب ليه ربنا مقالش على ثوابه؟؟!

عشان تبقى مفاجأة - جايزة " إن في الجنة بابا يقال له الريان يدخل منه الصائمون فإذا دخلوا منه أغلق فلا يدخل منه أحد سواهم "

باب الريان ده في الجنة

جوا الجنة

بعد ما دخلوها

طب ما كل اللي دخلوا الجنة أكيد كانوا بيصوموا !!!...

يبقى الحديث مقصود بيه اللي صاموا بجد

إسمو الريان

من الري

مش بمعنى الشرب بس

لأ

يروي العين اللي غضت بصرها ..............

ويروي القلب بصحبة أحباب كان مصاحبهم في الدنيا في رمضان بيطيعوا مع بعض..إلخ

5-ليلة القدر خير من ألف شهر , السجدة فيها كإنك سجدت كل يوم لمدة 84 سنة ( قيس عليها أي عمل تاني ) وكل حاجة تانيه - الصدقة - الدعاء - العبادة .....

والليلة دي لا يحرم منها إلا شقي محروم أعاذنا الله

6-فرحة الله بعباده " يا ملائكتي انظروا إلى عبدي ترك طعامه وشرابه وشهوته من أجلي يا ملائكتي أشهدكم أني قد غفرت له "

يعني تخيل وتخيلي إحساس إنك تبقى في معية الله ورضا الله

أ-ينظر الله في أول ليلة بعين الرحمة ومن نظر له بعين الرحمة لم يعذبه أبدا

ب-يأمر الملائكة أن استغفروا لعبادي الصائمين

ج-خلوف فم الصائم أطيب عند الله من ريح المسك

د-يأمر الله الجنة : تزيني يا جنتي فقد أوشك أحبابي أن يتركوا ويستريحوا من الدنيا إلى دار كرامتي

ه-آخر ليلة في رمضان نظر لهم مرة أخرى بعين الرحمة فيغفر لهم

ده غير ليلة القدر لأ دي غيرها

وإن العمال يعملون فإذا فرغوا من أعمالهم يوفوا أجورهم , والله أحق من يوفي أجر العاملين

ده غير إن ربنا بيباهي بينا الملائكة

ولا يحرم من رحمة الله في رمضان إلا الشقي

كل ده ثواب وأجر عظيم لا يمكن أبدا تفوته

طب تدي إيه إنتا في رمضان

أروا الله من أنفسكم خيرا

دي تركيبة الدوا

دول ال6 اللي عليهم التركيز في رمضان

واللي حط التركيبة دي النبي صلى الله عليه وسلم

1- القرآن ( هتشتغل بقى بجد ) القرآن - القرآن اللي كرم رمضان

ما هو رمضان لولا القرآن ؟؟؟

" شهر رمضان الذي أنزل فيه القرآن"

فاحنا بقينا بنشرف رمضان ونسينا إنو إتشرف من
أجل القرآن

لو صمت رمضان من غير القرآن يبقى انتا مش فاهم

لو صمتي رمضان من غير القرآن يبقى انتي مش فاهمه

لأن رمضان شهر القرآن

الحسنة في رمضان ب70 ضغف

والحديث بيقول " من قرأ حرفا من كتاب الله فله به حسنة والحسنة بعشر أمثالها لا أقول الم حرف ولكن ألف حرف ولام حرف وميم حرف "

الجزء فيه تقريبا 7000حرف×10=70000×70=4900000اربعة مليون وتسعميت ألف حسنة في الجزء الواحد من القرآن !!!!!!!!!!!!!!!!!!!!!!!!!

يا ترى هتختم القرآن كام مرة

ده لو ختمته مرة واحده يبقى انتا محتاج تضرب ال4مليون وتسعميت ألف × 30 جزء

حوالي 5 مليون إضربهم في 30!!!!!!!!

ميّه وخمسين مليون حسنة

هتختم مرتين

إضرب في 60

هتخم أكتر ؟؟؟؟!!!!!!!!!!!!!!!!!!!!!!!!!!!!!!!!!!!!!!!!!!

2-الصدقة ( داخل على العتق من النار )

ومتنساش الحسنة بعشر أمثالها ال10 دول إضربهم × 70

طول ما أنت في شهر رمضان

3- صلة الأرحام " إن الرحمة لا تنزل على قوم بهم قاطع رحم "

4-الدعاء ( نصيحة إكتب 5-6 أدعية وركز عليهم الشهر كله - طول الشهر - الصحابة كانوا بيقولوا " نعد لرمضان دعوات مخصوصة نلح عليها الشهر كله فوالله ينقضي رمضان ولا يأتي رمضان القادم إلا وقد أجاب الله لنا ما دعوناه بها")

- جربوا عند الفطار , في التراويح , صلاة الليل , ليلة القدر , الفجر ............. إلخ

ده غير إن دعوتك وقت الفطار بعد ما تدعي دعاء الإفطار بتبقى مستجابة لو صيامك صح

5- صلاة التراويح " من قام رمضان إيمانا واحتسابا غفر له ما تقدم من ذنبه "

أوعى تفوت ليلة
روحوا صلوا في المساجد

طب البنات مش قادره ؟؟

صللي في البيت

أوعي تفوتي صلاة القيام !!!

6- الصلاة في المسجد تعادل صلاة الفرد ب27 درجة

يعني 5× 27 × 70 = 20000 عشرين ألف حسنة × 5 = 100000 ميت ألف حسنة

كإنك رحت الحرم المكي - الناس اللي محرومين يروحوه وقاعدين في بيوتهم عندكوا الفرصة !!!

6 حاجات قدام 6 حاجات

هنقول للناس وللدنيا كلها وهنبعت إيميلات وهنقولهم على الثواب 6 حاجات وهنعمل قدامهم 6 حاجات

**M@GO** · 12-08-2009 10:49 AM

1- مغفرة جميع الذنوب التي مضت ,

قال صلى الله عليه وسلم : " من صام رمضان إيمانا
واحتسابا غفر له ما تقدم من ذنبه "

وفي حديث تاني : " من قام رمضان إيمانا واحتسابا غفر له ما تقدم من ذنبه "

وفي حديث كمان : " من قام ليلة القدر إيمانا واحتسابا غفر له ما تقدم من ذنبه "

الحمد لله يعنى فى امل