الحلقه الرابعه من يوميات مشرف منحوس فى متندى

[I'm Alive]

　من غير رغى ولا كلام كتير

الحلقه الرابعه

ميزو : أنا كنت عايز أناقش معاكم فكرة كده

اسباى : خير اللهم اجعله خير

ميزو : هى قواعد الكتابة فى المنتدى حاليا كام صفحة

نهال : 25 صفحة تحتوى على 3000 بند

ميزو : أنا عايزكم تخلوها 100 صفحة تحتوى على ما لا يقل عن 50000 بند ...لو عرفتم تخلوها أكتر من كده يبقى أحسن

أحمد : مش كتير كده يا عم ... ده اللى مسجل جديد على ما يقراها تكون سنانه وقعت

سيد : ما هوه ده المطلوب ياعم ... مش عايزين حد يقراها ... وصلت الفكرة يازغللة

اسباى : فكرة بمليون جنيه ... الكبير كبير صحيح

تاليا : ما تفهمونا إيه العبارة ياخوانا

سمسم : يعنى اللى هيسجل جديد لازم يوقع إنه قرا قواعد الكتابة فى المنتدى ووافق عليها ... تمام

تاليا : تمام

سمسم : طبعا لما يلاقى 100 صفحة تحتوى على خمسين ألف بند هيروح موقع من غير ما يقرا حاجة...تمام

تاليا :لأ مش تمام .... مش فاهمه حاجه

سمسم : هو انتى ديما كده يا تاليا خلاص سلميلى بقى عالمترو....أى حد يكتب حاجة ما تعجبناش نروح لازقينه إنذار ونقول له إجرى يلا روح إقرا قواعد المنتدى قبل ما تكتب داهية فيك وفى أيامك السوده

أحمد : طب إفرض عضو غتيت ورخم قرا القواعد كلها قبل ما يوقع

اسباى : من لم يمت بالسيف مات بغيره .... مين يعادينا ... هيه هيه

سيد بيقول لأحمد: نبه على جميع المشرفين إن فى إجتماع هام الساعة 3 فى قسم المشرفين ....الإجتماع مغلق وسرى للغاية

أحمد : بخصوص إيه

سيد : أنا عن نفسى معرفش يظهر إنه توب سيكرت .. ميزو حويط اوى ....مش عايز حد من الأعضاء يشم خبرعن الإجتماع

أحمد : رقبتى ياريس

فى منتدى المشرفين الساعه 3 بدأ اجتماع مغلق وسرى للغاية بحضور جميع المشرفين

ميزو : طبعا مستغربين أنا جمعتكم ليه النهارده ... الموضوع باختصار إن فيه معلومات وصلت للقيادة السياسية إن المنتدى فيه عدد كبير من الأعضاء بيكتبوا ضد الحكومة وضد الريس نفسه وتوريث الحكم...وصلتنى معلومات مؤكدة إن مبارك قرر يقوم بزيارة للمنتدى والتجول فيه بنفسه لمعرفة مدى صحة المعلومات دى...لازم نلم نفسنا بسرعة ونستعد للزيارة اللى غالبا حتكون الأسبوع اللى جاى

سيد : إحنا جاهزين يابوص ... لازم نبتدى نلم كل المواضيع اللى بتتكلم عن الريس ونحذفها

نهال : تمام ونخلى المواضيع اللى بتقول كلام كويس عنه

شيمــاء: مفيش مواضيع كويسة عنه غير الموضوع بتاع جرجاوى (نعم وألف نعم يامبارك)

ميزو : مين جرجاوى ده

شيماء : ده بيبيع جرجير....قصدى عضو جديد وله ولاء شديد لمبارك

ميزو : عظيم كلموه يكتب كام موضوع زى ده ووفروله كل الإمكانيات اللى هيحتاجها

نهال : إمكانيات زى إيه يعنى

ميزو : مساطر برايات اساتيك اقلام....كل حاجه

اسباى : عايزين نستعد للموضوع ده بكل جدية ياجماعة....زيارة الريس لفكك منى شئ مش بسيط خصوصا فى الظروف الدولية الحالية....متنسوش إن مصر دلوقتى بلد نووية يعنى الأنظار عليها والسد العالى لو إنضرب الميه كلها هتروح على توشكى والناس هتستخبى فى مترو الأنفاق

ميزو : مالك يا اسباى إنت عيان

شيمـاء : لازم ياجماعة نحضر قصيدة نلقيها عند وصول السيد الرئيس

نهال : فكرة هايلة....فى مين شعراء عندنا

اسباى : سعودى المصرى....ياسلام...أعجوبة....د� � لو قلت له صباح الخير يروح هفك قصيدة ستين بيت وما يخلصكش من إيده غير إنك تقول أنا جدع

يمانى : أظن عيب أوى يا سباى أبقى قاعد جنبك وتدور على شاعر يكتب القصيدة.....أنا ليا حق عرب عندك....وحياة طنط تاليا مهنسهالك

اسباى : بس إنت يا يمانى يعنى ولا مؤاخذة ما بتحبش الكاكى...واللى جاى ده كاكى واللى جابه كاكى واللى جاب اللى جابه كاكى

يمانى : معلش ياعم الضرورات تبيح المحظورات....قل لى إيه رأيك فى الحتة دى

يابلدنا يامهلبية

ياحلوة يامستوية

ومبارك خلاكى آية

حسنك مالوش نهاية

ميزو : معلش يا يمانى...اتفضل إنت روح إستريح شوية...فى مين تانى شعراء عندنا

سيد : فيه إسماعيل يس فى الأسطول... قصدى سين ...دى شاعره جامده جدا...أنا مبفهمش هى بيقول إيه بس هايله

نهال : أنا موافقه على سين لإلقاء قصيدة الترحيب بالريس....ندخل على النقطة اللى بعدها فى جدول الأعمال.....تنظيم موكب الريس

أحمد : أنا رأيى إن موكب الريس يدخل من باب السياسة الداخلية وموكب شوزان قصدى سوزان وجمال من باب الأسرة والطفل وأحمد نظيف من باب المطبخ

تاليا : مش هنرش المنتدى يابوص

ميزو : إيه المناسبة

تاليا : مش جايز الريس يكون فى جيوبه جراد وأول مايدخل ينطرهم علينا

ميزو : إنتى مين يابنتى ...إنتى بقالك كتير معانا هنا

سمسم : فعلا الإحتياط واجب...أول ماييجى ندلق عليه جردل فنيك

ميزو بيتكلم مع سيد : أول ما الزيارة دى تتم على خير الطقم ده كله لازم يتغير

سيد : هنجيب مين بس يابوص

ميزو: أى حد إن شالله المخبول اسلام

نهال : بمناسبة اسلام ... ده هنسيبه كده والريس جاى ؟؟؟....أنا رأيى إننا نطرده مؤقتا لحد ما الزيارة تخلص وبعدين نرده بدل ما يعملنا قلق

ميزو : ونرده ليه....مشيه خالص

سمسم : مالوش لزوم نعمل طرد أو ندى إنذارات اليومين دول.... بالنسبة لاسلام هوه كان كاتب قصة مؤرفة أنا حذفتها...رجعوهاله خلوه يتلهى فيها لحد ما الزيارة تنتهى وبعدها إرموه هو وقصته فى الشارع

مش عايز حد يزعـــل

.................................................. ........................

[| لولا ●]

...وصلتنى معلومات مؤكدة إن مبارك قرر يقوم بزيارة للمنتدى والتجول فيه بنفسه لمعرفة مدى صحة المعلومات دى...لازم نلم نفسنا بسرعة ونستعد للزيارة اللى غالبا حتكون الأسبوع اللى جاى
هههههههههههههههههههه والله انت بتهرج يا محمد بس ييجى يورينا بس وشه شكرا لموضوعك يا محمد

[I'm Alive]

نفسى
والله يعملها
وأنا أطلع عين الى خلفوة
وشكرا لمرورك الجميل لولا نورتى التوبك

[Jasper]

انت كرهتنى فى الاشراف ربنا ينتقم منك

[Spider GirL(•'.'•)]

ههههههههههههههههه
بابا حسنى ينورنا

هههههههههههه
بسم الحمد لله
الأدمن بتاعنا عسول اوى ومش بيعجزنا خالص
والمشرفين كمان طيبيين
ولا هتنكروا ؟؟!!!

[I'm Alive]

الله يسامحك ياعم جاسر
بس كويس أنك كرهته

[I'm Alive]

صاصا
ده ممكن يولع فينا
أنتى متعرفيهوش
ده شرانى

[Spider GirL(•'.'•)]

مصطفى شرانى !!!!
خالص
دة ملاك برئ
اما بقا موضوع يولع فيكم دة ع حسب يعنى انتوا عملتوا فيه اية يمكن تستاهلوا
بس فى الظروف العادية.. شومى ملاك الورد مش ليك دة لشومان

[I'm Alive]

ماشى ياعم شومان
أنا أكتب مواضيع
ويتبعتلك ورد على قفايا
أبسط ياعم

بس ابقا أفتكرنا بورده
الله يخليك
أما حكايه ملاك
فا الموضوع ده مشكوك فيه

[Wezooo(•'.'•)]

...وصلتنى معلومات مؤكدة إن مبارك قرر يقوم بزيارة للمنتدى والتجول فيه بنفسه لمعرفة مدى صحة المعلومات دى...لازم نلم نفسنا بسرعة ونستعد للزيارة اللى غالبا حتكون الأسبوع اللى جاى
والله هيشرفنا بس ييجى