يوميات بنتين لسه داخلين الجامعه

**| please smile ●** · 04-08-2009 04:06 PM

(المشهد الاول

فتاتان تجلسان في وسيله مواصلات
ـــــــــــــــــــــــــ ـــــــــــــــــــــــــ ـــــــــــــــ

الفتاه الاولى: اخيرا الواحده هتدخل الكليه وتعيش حياتها .

الفتاه الثانيه: اه اخيرا
الاولى: بصي بقا يا هيام لو احنا ناصحين بجد منسبش الكليه الا واحنا (مشنكلين) ولدين ولاد ناس .
الثانيه: ايه يا بت يا هبه عيب الكلام ده.
الاولى : ايه اللي عيب انا بفكر في الجواز هو انا فكرت اشرب خمره
الثانيه: صح معاكي حق مش عيب نفكر في الجواز
الاولى: ولازم نخطط كويس ومش نكون اقل من بنات مصر والا مفيش حد هيبصلنا.

(المشهد الثاني

غرفة بنات
ـــــــــــــــــــــــــ ـــــــــــــــــــ

هبه: بقالنا اسبوعين من يوم مدخلنا الكليه ولسه وشي في وشك . احنا لازم نعمل نيولوك

هيام: اه لازم
هبه: شوفي انا اشتريت علبه مكياج وناويه ابقى زي البنات اللي هنا
هيام: بس انا معرفش استعمله
هبه: انا هعلمك المهم بس تلبسي البنطلون الكحلي اللي عندك على البدي اللي اشتريناه امبارح.
هيام: البس البنطلون ده من غير حاجه فوقيه؟ ده انا صوري كانت تبقى على الموبيلات واتفضح
هبه: تكونيش فاكرة نفسك نانسي عجرم ؟ يا عبيطه كل البنات هنا كده ومفيش حد بيصور حد
هيام: طيب هلبسه بس انتي كمان تلبسي زيي

المشهد الثالث : هبه وهيام في(الحرم) الجامعي
هبة: شفتي يا بت هما يومين بعد ما غيرنا اللوك وعرفنا هادي وشادي
هيام: طيب خلي بالك اهم جايين
شادي وهادي: هاي بنات ايه اخباركوا
هبه : كويسين .
هادي : بقلكوا ايه المحاضرات هتخلص 12 تيجوا تعدوا معانا في الكافتيريا؟ احنا قاعدين للساعه 7
هيام (بسرعه): من 12 ل7 ليييه؟ ملناش حد يلمنا مينفعش
(زغده من هبه) هيام: لا خلاص احنا فعلا ملناش حد يلمنا
(زغده تانيه)هيام: لا مش عارفه لينا ولا ملناش
هبه : طيب يا جماعه هكلم ماما واقلها اني هتاخر عشان مش تقلق.
هيام: هتكلمي (امك ) في البل...........(زغده من هبه)
هبه: ايوة هكلمها يا هيمي
هيام (هامسه): مين هيمي دي؟
هبه : طيب يا جماعه احنا طالعين المحاضرة انتو مش طالعين باي
هادي وشادي : باي مستنينكوا متتاخروش
هبه: انتي يا بت يا هيام فيها ايه لما ادلعك واقلك هيمي انتي هتفضلي عبيطه كده على طول .
هيام : معلش يا هبلونا
هبه : هبلونا؟ خيبتك تقيله يا هيام قوليلي بوبا
هيام : ماشي يا بوبا
(مع الاعتذار لحاملي اسم هبه او هيام او هادي وشادي)

ههههههههههههه مخهم فاضى الا من رحم ربى

**| سندباد ●** · 04-08-2009 04:57 PM

هههههه
لذيذة القصة دى

وبتحصل فعلا

بس بصراحة هادى وشادى مش نازلين ليا من زور

**| MonyanA ●** · 04-08-2009 05:09 PM

هههههههههههههههههههههه
فعلا كل الكلام دة بيحصل
ناس فاضية
احنا لية رايحين الجامعة؟؟؟
مش عشان نتعلم وناخد شهادة
والا الجامعة بقت لحاجات تانية غير التعليم
ربنا يهدى
قصه جميلة يا محمود تسلم عليها