ألنصيـحـة على طريقــة (انتـى طالق , قالتله قوم بينا ننام)

[| Tears Of The Moon ●]

عمرك نصحت واحد وأخد بنصحتك؟؟؟؟
سؤال سالتة لنفسى وانا فى ساعة تجلى وكانت الاجابه مخيبة للأمال تمام.وتقريبا هتكون مشابهة لأجابات الكل وهى طبعا:لا مفيش
او ممكن نقول نادرا بلاش مفيش دى.
مثلا لو تخيلنا ان جنابك ماشى مع واحد صاحبك وطلعت بنت حلوة من بتوع اليومين دول وصاحبك قرر انة يروح يعكسها
ولو أفتراضنا انك واد محترم يعنى وعايز تنصحة
ممكن الحوار يكون كدا.
ياسيدى حرام عليك .اعتبرها اختك
يقولك معنديش اخوات
طيب امك
يقولك الله يرحمها
طيب مراتك
يقولك مش هتجوز
هو خلاص ركب دماغة وقرر انة هيعاكسها يعنى هيعاكسها مش فارق معاه يعنى تنصحة او لا
حلال بقى والا حرام مش فارقة.
ذى الست الى جوزها قالها انتى طالق دى
فكان ردها ياراجل قوم بينا ننام ولا كأنها سمعت من اساسة برضة مش فارق معاها حرام او حلال .صح او غلط.
وخد من دا كتير.نص مصر مثلا بتشرب سجاير
وشوف بقى قمة النصح لما الشركة نفسها تكتب على العلبه التدخين ضار جدا ويسبب الوفاه
عايز بقى ايه جنابك اكتر من كدا...؟
الى بيصنعوا الحاجة نفسها وهما اعلم الناس بضررها او نفعها بينصحوا سيدتك وبيقولوا ليك بلاش تشرب يابنى ادم انت.
وكتبوا على العلبة التدخين ضار جدا بالصحة ويسبب الوفاه
هتموت يا حمار
طيب شوفت حد بطل تدخين.؟؟؟
قالوا الكلام مش نافع الظاهر الناس دى مبتعرفش تقرى نجيب حاجة اقوى
صورة واحد بيموت مثلا بدل الكلام الى مش نافع.
طيب ياترى نفعت..؟؟؟؟
ولا الهوا برضة والناس فضلت تشرب
طيب هو ايه السبب الى بيخلى الناس متتقبلش النصيحة؟؟
تفضل بالساعات تقولة كدا غلط وكدا حرام والمفروض متعملش كدا ومش عارف ايه وايه
وممكن يقولك خلاص حرمت
وتانى يوم ترجع ريمة لعادتها القديمة
انا منكرش فعلا اننا شعب ديموطراقى هسيبك تتكلم اه.... وانصح للصبح ياسيدى... بس برضة هعمل الى فى دماغى
حتى الاطفال الصغيرين العدوى شكلها وصلت ليهم.
طيب تعالى كدا قول لطفل عيب ياسوسو... عيب ياحبيبى... كدا غلط.... من هنا للصبح
ابقى قابلنى لو الواد عبرك. وكأن دا جين وراثى انتقل ليه من ابوة وامة الى بيعملوا نفس الموضوع.
طيب ليه ياجماعة مبقاش حد يسمع نصيحه التانى...؟؟
وليه لو سمعها بتطلع من هنا وتخرج من هنا.؟؟؟
هو عدم تقبلها يعنى كنوع من انواع الكبر
ان اذاى حد يقولى حاجة واسمع كلامة.؟؟؟!!!
يبقى فى الحالة دى تأكد انك غلط علشان الرسول بيقول
(لايدخل الجنة من كان فى قلبة مثقال ذرة من كبر).
طيب لو قولنا مش كبر دا ادمان للحاجة الغلط وانة مش قادر يبطلها.طيب ماهنا برضة الموضوع اخطر لما حاجة غلط تتحكم فيك
تبقى انت انسان عاجز وهتبقى نهايتك سودة بأذن واحد أحد.
علشان كدا دايما بنشوف نهايه المدمنين نهايه سيئة علشان ساب حاجة غلط اتحكمت فيه واصبح انسان عاجز قدمها.
لما حد يقولك متعملش كدا الموضوع دا حرام
اخدت بالك من كلمة حرام.بذمتك الكلمة دى مش بتأثر فيك
مش بتهزك من جواك.والا موضوع الحلال والحرام مبقاش فارق معاك انت كمان.
ومساهمة من الناس فى نشر الغلط نفسة او التقليل من شأن الحاجة الحرام نلاقى كلمة عيب حلت مكنها
يعنى بقينا نسمع الناس تقول عيب متعملش كدا وشالت حرام خالص من الصورة.
وطبعا لو حد عمل العيب ممكن نقول عليه واحد بجح وعينة يندب فيها رصاصة
انما لو عمل الحرام يبقى عاصى وهينال عقاب من ربنا
الناس قالت نقول عليه بجح اهون شويه بلاش كلمة عاصى دى بلاش نكبر الموضوع.
وبجد تحول كلمة حرام لعيب فى حد ذتها مصيبة وتحتاج مقال كامل.
من الاخطاء برضة انى انصح حد انة يسيب حاجة غلط بيعملها وانا نفسى بعملها
القرأن نفسة بيقول كدا
(أتامرون الناس بالبر وتنسون انفسكم وانتم تتلون الكتاب أفلا تعقلون )
يعنى الى بينصح حد يعمل حاجة هو نفسة بيعملها دا انسان غير عاقل
يعنى المفروض لما اقول لواحد مدخن ياسيدى حرام عليك مش من المنطق انى اكون بقولة كدا وانا ماسك سيجارة فى ايدى ابقى اهبل علطول من غير نقاش
وخلينا نقول لكل الاباء المدخنين الى لما بيعرفوا ان اولادهم بيدخنوا بيركبهم 100عفريت
عفوا نصحتك غير مقبولة
بطل الاول الحاجة الغلط الى بتعملها وبعدين شوف مين بيعملها وروح انصحة

النصيحة شىء جميل جدا بيجدد الايمان فى قلوب الغافلين وبينبههم ان فيه حاجة غلط ياما ناس حياتها كلها اتغيرت بمجرد نصيحة وياما ناس ربنا هدى ناس على ايديها بمجرد نصيحة ودا بجد يابختة
بس النصيحة فى زمنا دا اصبحت مجرد كلام فى الهوا ونادرا لما تلاقى حد ياخد بيها .
وخلونا نقول أخيرا
ياترى الناس هيجى الفترة الى هتمل فيها من النصح وتقول ذى مجموعة كبيرة ظهرت اشترى دماغى ومليش دعوة بحد.؟؟؟
والا هتفضل تنصح لحد مالناس حالها ينعدل.؟؟؟؟؟

[Spider GirL(•'.'•)]

حنا ما بنقبلش النصيحة عشان اللى بينصحنا بيكون غلط هو كمان


شكرا حمادة

[nour]

موضوع جميل جدا يا احمد وعندك حق فى كل كلمة قلتها
بس اعتقد الناس برده هتفضل تنصح علطول حتى لو محدش سمع كلام حد لان ده حاجة فى طبيعة الانسان

[| MonyanA ●]

موضوع جميل جدا يا احمد
اعتقد ان الواحد بيتقبل النصيحة من الشخص اللى بيحبة وبيرتاح لة بس
وكمان تقبل النصيحة يعتمد على اسلوب الناصح
شكرا على الموضوع

[!..!]

معلش .. اللى الشركة بتعمله ده منظر على الفاضى

انا اعرف اللى عايز يفيد الناس مش يديهم نصيحه

وهو نفسه اللى بيدى لهم السم بإيده !!

...............

والله لو حد عاقل وبيفهم وحد إدى له نصيحه

وعارف إنها فى مصلحته وهتخليه يكون أحسن

هينفذها ومش هيعتبرها إجبار .. او مش

هيعتبر نفسه (ضعيف) إنه سمع النصيحه وعمل بيها

وفى واحد تانى .. يفضل يبص تحت رجليه ومش

عايز يتقدم ولا يتحرك خطوه لأنه بينفذ اللى فى

دماغه وهو عارف ومتاكد إنه غلط والتانى هو اللى صح

بس لو عمل بالنصيحه شكله هيكون إيه ؟؟

وازاى يسمع نصيحة من حد ؟؟

وواحد تالت زى التانى بالظبط بس المشكلة انه

مش عارف إنه غلط وحاسس انه صح !!

كمان تقديم النصيحة مهمة جداً ..

كلمة عمرو خالد كان بيقولها

(إلمس قلبى علشان أسمعك)

مش معقوله يعنى اقول لواحد لازم تعمل كذا وكذا

فى طريقه علشان نقدر ننصح اى حد

بس المهم اننا نكون احنا كمان بنتقبل النصيحه وبنعمل بيها

فى كمان حديث عن رسول الله .. صلى الله عليه وسلم

(إذا استنصح احدكم اخاه فلينصح له )

.........................

بعتذر عن الإطاله بس الموضوع مهم جدا

وشكراً ليك




(لايدخل الجنة من كان فى قلبة مثقال ذرة من كبر).

.................

يارب يكونوا لسه فاكرينه!!

[الماجيك]

تسلم يا احمد باشا علي الموضوع المهم ده وانتي يا وهم انا بأيدك في كل كلمه ولا الناس هتسمع ولا انت هتسكت عن الحق هي دي الدنيا ناس وناس وسنه الحياه الظالم والمظلوم مش مهم الظالم مين ولا المظلوم بيتظلم من مين المهم ان احنا اتخلقنا كدا فالانسان اللي عنده اراده عدد قوليلين من المجتمع بس اللي بيتقال ان احنا هندننا كدا علشان الناس بتحب تقلد فلازم يكون القدوه صح علشان نبقي صح
وشكرا يا باشا واسف علي الدش الكتير ده

[| Tears Of The Moon ●]

شكرا لمرورك يا مونــى
بس مش كله والله غلط
فى واحد بينصح وهو غلطان وده طبعا الباور سابلاى بتاعه ضارب
وفى واحد بينصح ويكون بيعمل بالنصيحــة

[| Tears Of The Moon ●]

شكرا لمرورك يا نوور
مش كل انسان بيكون نصوح يا نوور
على حسب طبيعة الشخص اللى ادامك
واحد يقولك وانا مالى
والتانى ينصحك بضمير
وشكرا لمرورك مرة تانية

[| Tears Of The Moon ●]

عندك حق فى اللى قولتيه يا منــى
بس فى ناس برضو بتنصح ناس ما تكونش عارفاها أصــلا
ومع ذلك ساعات المنصوحين بيتأثروا بالنصيحــة
شكرا ليكى يا منمن

[| Tears Of The Moon ●]

شكرا لتعليقك يا وهــم
وده اللى انا بتكلم فيه
لما تكون شركة السجاير بتنصح وبتبيع فى نفس الوقت
يبقــى أكيد فى حاجــة غلط
شكرا مرة تانية لمرورك