مين ظالم ومين مظلوم ؟

**● **TiTaNiC LoVeR** ●** · 17-04-2009 08:14 PM

اوقات بتبقى حكم فى مشكلة او نقاش وبتلاقى نفسك محتار مين ظالم ومين مظلوم
و اوقات انت نفسك مش بتبقى عارف انت فى الحياة ظالم ولا مظلوم
اوقات بتشوف الناس بتقسى عليك اوى و بتظلمك و مش مقدراك
واوقات تانيه تحس ان انت اللى ظالم وانت اللى متجنى عليهم ومكبر الموضوع وفاهمه غلط

مش كتير بتقدر تقف ادام نفسك و تقول لأ انا ظالم
طبعا مهم انك تعترف بغلطك وبظلمك
بس الاهم انك تعوض الشخص اللى ظلمته حتى لو معترفتش ليه انك ظلمته
بس بينك وبين نفسك مهم ترضى ضميرك لان مفيش ضمير ميت
فى ضمير بارد شوية - او شويتين - او اكتر
لكن والله فى الاخر بيصحى وبيفضل يعذب و يعاتب فى صاحبه

مين ظالم ومين مظلوم

حاكم بلاد ظالم ولا شعب مبيعرفش يقول لأ
مسئول ضعيف ولا موظفين حراميه
ظابط بيدليك على قفاك ولا قفاك اللى اتعود على الضرب
دكتور حمار ولا مريض سلبى و متعود على الحمورية
استاذ جامعه مش بيشرح ولا طلبه مش بيحضروا
اب قاسى و مشغول ولا اولاد مش متربيين و باردين
اب فرى وهاى كلاس ولا ابن صايع و مقضيها
ام بتدلع طول الوقت ولا ابن بيضربها
ام مش صاحبة بنتها ولا بنت مش محترمة
مهندس بلا ضمير ولا مقاول بلا ضمير بلا فلوس
كليبات خارجة و لا مشاهدين عاجبهم الوضع
افلام مستفزة ولا مراهقين بلا رقيب
حرامى بيصرف على عائلة ولا واحد غنى و بيتمنظر
واحد بيخون صاحبه ولا الصاحب المغفل

و أخيــــــــــــــرا

مين ظالم ومين مظلوم ؟

وللجميع فائق احترامى

**Spider GirL**(•'.'•) · 17-04-2009 08:23 PM

كله ظالم ونفس الوقت مظلومين ياعم شريف

**● **TiTaNiC LoVeR** ●** · 17-04-2009 08:31 PM

طيب يا ست امانى
ما تيجى تضربنى كمان

شكرا على مرورك

**الماجيك** · 17-04-2009 09:28 PM

تسلم ايدك يا باشا
بس بجد انت مش عنت تعرف تحدد الظالم والمظلوم في الدنيا دي لان دلوقتي الللي بيسكت وليه حق بيبقي الظالم

**● **TiTaNiC LoVeR** ●** · 18-04-2009 09:45 AM

شكرا على ردك يا ماجيك
نورت الموضوع

**I'm Alive** · 18-04-2009 10:19 AM

و أخيــــــــــــــرا

مين ظالم ومين مظلوم ؟

حيرتنى معاك ياريس شريف
بالطريقه دى مفيش فرق ياكبير
بين الظالم والمظلوم
بالنسبه ل المكتوب فى التوبك