تحب تعرف أفضل الطرق للمذاكرة؟

**| لولا ●** · 07-04-2009 02:00 AM

تحب تشوف الذاكرة بتاعتنا ماشية ازاي؟

تحب تخلي ذاكرتك دي طوع إرادتك؟
طبعا الكلمة دي بتعمل عندنا قلق والبيت كله بيعلن حالة الطوارئ القصوى.. خصوصا لو كان في البيت واحد في الثانوية العامة.. مش كده؟

النهارده هاقول لك أفكار رائعة هتساعدك وإنت بتذاكر..

الأفكار دي هتساعدك تعرف أفضل الطرق للمذاكرة وتثبيت المعلومات.. خلي بالك إن كاتب السطور جاب 99% في الثانوية العامة يعني جربت الحاجات دي قبل ما أقولها لكم.. وإن شاء الله كلنا نجيب أكتر من كده ونكون كلنا متفوقين...

أنواع الذاكرة:
عشان نعرف نذاكر لازم نعرف الأول الذاكرة بتاعتنا بتشتغل ازاي.. وعن طريق معرفتنا دي ممكن نستخدمها أفضل استخدام..

الذاكرة أيها السادة نوعان.. ذاكرة قصيرة الأمد، وأخرى طويلة الأمد.

1- الذاكرة قصيرة الأمد..

النوع ده من الذاكرة هو اللي متخزن فيه المعلومات العابرة خلال اليوم..

فطرت إيه النهارده؟

عملت إيه امبارح؟

المعلومات دي بتبقى معانا لفترة قصيرة وبعدين ممكن تنساها... لو سألتك الأسئلة دي بعد سنتين.. ممكن ماتبقاش فاكر إنت فطرت إيه من سنتين!

الذاكرة قصيرة الأمد بتتخزن بسرعة عن طريق العقل اللاواعي..

والذاكرة قصيرة الأمد دي سعتها 7 زائد أو ناقص معلومتين في المرة الواحدة..

عايز تعرف ازاي؟

يبقى العب معايا اللعبة دي:

احفظ الرقم اللي هيظهر قدامك ده:

123313414515

ماعرفتش تحفظه؟ عادى....

الرقم اللي قريناه من شوية ده.. ماعرفناش نحفظه بسرعة عشان زي ما قلت لك.. الذاكرة قصيرة الأمد بتشيل بس 7 معلومات زائد أو ناقص اتنين (من 5 إلى 9 معلومات في المرة)..

فالرقم اللي شفناه ده مكون من 12 رقما.. يعني 12 معلومة.. عشان كده صعب على الذاكرة قصيرة الأمد إنها تشيله..

يبقى إيه الحل؟

عشان تحط الرقم ده بسهولة في الذاكرة قصيرة الأمد.. ممكن تلعب لعبة جامدة جدا.. ممكن بدل ما تخليه 12 معلومة.. تخليه 4 معلومات بس!

عارف ازاي؟

بص على نفس الرقم لما كتبناه بأسلوب تاني:

123

313

414

515

سهل يتحفظ كده.. صح؟

كل اللي عملناه إننا قسمنا الرقم بشكل تاني.. بحيث نحفظ كل شوية مع بعض (مش رقم رقم زي الأول.. الرقم الطويل بقى 4 معلومات بس.. فبقى أسهل!

قاعدة مهمة:

عشان تعرف تحفظ.. قسم المعلومات الكبيرة بطريقة سهلة الحفظ..

واربط بين المعلومات وبعضها عشان تحفظها أسهل..

2- الذاكرة طويلة الأمد..

دي الذاكرة اللي بتشيل المعلومات المهمة جدا اللي من الصعب جدا إنها تتنسي..

اسمك إيه؟

رقم تليفونك كام؟

وكده يعني..

والذاكرة دي عشان تتكون لازم تقوم بشوية مجهود في الأول.. بعد كده هتثبت بطريقة رائعة..

وهي دي المذاكرة بقى..

يعني إيه مذاكرة؟

المذاكرة دي ببساطة هي إنك تنقل المعلومات من الذاكرة قصيرة الأمد، للذاكرة طويلة الأمد.. عشان كده لما حد يقول لك: عايزك تحفظ الدرس ده زي اسمك، يبقى كأنه بيقول لك: عايزك تحفظ الدرس ده بالذاكرة طويلة الأمد!

لكن لو ذاكرت درس ونسيته تاني يوم.. تبقى بتستخدم الذاكرة قصيرة الأمد بس.

ازاي ننقل المعلومات للذاكرة طويلة الأمد؟

عشان ننقل المعلومات للذاكرة طويلة الأمد لازم نقوم ببعض المجهود زي ما قلنا.. لكن النتيجة بتكون رائعة..

1. التكرار:

هيخلّي عقلك يتعامل مع المعلومة باهتمام لأنها بتتكرر.. تبقى مهمة بالنسبة لك..

2. استخدام مراكز المخ المختلفة:

الطريقة دي مؤثرة وفعالة جدا..

- إنت بتذاكر بعينك: يعني مراكز الإبصار في المخ اشتغلت على المعلومة دي..

- اكتب وإنت بتذاكر: هيخلي مراكز المخ المخصصة بعملية الكتابة تشتغل على المعلومة دي..

- سمّع اللي ذاكرته: نشطت مراكز الذاكرة ومركز الكلام اشتغل برضه على نفس المعلومة لو كنت

بتسمّع بصوت..

بالطريقة دي المعلومة تغلغلت جواك بأكتر من طريقة.. يبقى ألف مبروك!

3. الحالة الذهنية:

وإنت بتذاكر المعلومة حط في دماغك إنك بتذاكرها عشان تفضل على طول وتفيدك طول حياتك.. لو ذاكرتها على اعتبار إنها معلومة مؤقتة عايزها للامتحان بس, عقلك هيتعامل معاها على إنها معلومة تافهة ويحطها في الذاكرة قصيرة الأمد زي ما إنت طلبت منه!

تخيل إنك بتحفظ المعلومات دي لأنك هتحتاجها بعد سنين طويلة.. تخيل كده مش هتخسر حاجة.. وهتندهش من النتيجة الرائعة اللي هتتحقق..

بالطرق دي هتلاقي إن اللي حفظته ده هينتقل للذاكرة طويلة الأمد وهتلاقي نفسك حققت النتيجة اللي إنت عايزها.. وابقى ادعي لي..

**| Mannora ●** · 07-04-2009 03:04 AM

يااااااااااااااه ايه الجمال ده....

بجد تسلم ايديك ويارب تجيب نتيجه اصل المعلومات عندى بتتبخر

**LovelyGirl55** · 07-04-2009 10:28 AM

والله يا بنتى ولا حاجة بتاثر معايا

الاقيش عندك كتب فى حبوب قبل وبعد الاكل

**| لولا ●** · 07-04-2009 11:48 AM

منورة
لفلى
شكرا لمروركم الجميل ويا ريت تمشوا على القواعد دى

تقبلوا تحياتى

**I'm Alive** · 11-04-2009 11:12 AM

نياع نياع نياع

ايه ده كل ده همشى عليه

أنا خايف

فى الاخر رقبتى تتكسر ولا حاجه

بصى لولا أنا من الاخر جايب جاز والشراب هوى ودماغى مهويه من جوة عايزة

تتنفخ ~X(~X(~X(~X(~X(من تانى ومفيش حاجه بتأثر معايا

فلو عندك كتاب أزاى تعمل المعلومات كبسوله ياريت

عشان نخدها ونخلص بقا هو أحنا لسا هنذاكر بلا كلام فاضى

بس برده أولا وأخيرا بحييكى لولا على مجهودك

**| لولا ●** · 12-04-2009 12:35 AM

محمد بشكرك لمرورك بس ليه التشاؤم ده الطرق دى حلوة بجد يا ريت تمشى عليها بس ما تخافش مش هتقع ولا اى حاجة ههههههههههه

**| سندباد ●** · 12-04-2009 02:41 AM

يعنى اذاكر دلؤتى وانا مطمن ؟؟؟

على فكرة انا حفظت الرقم اللى فوق علطول
ونزلت لقيت الطريقة اللى حفظتها بيها هى اللى انتى كاتباها
شوفتى انا قديم ازاى ؟؟

----------------
شكرا لولا على مجهودك
123131414515

**..●●**آه...لو**●●..** · 12-04-2009 03:58 AM

مش بذاكر كتير والله يا لولا كان على عيني

**| Mysterious man ●** · 12-04-2009 09:14 AM

شكرا يا لولا على الموضوع وربنا يوفقنا كلنا

**| لولا ●** · 12-04-2009 12:17 PM

سندباد شكرا لمرورك وكويس انك حفظت الرقم
تفاتيفى ليه بس مش بتذاكر يا ريت تذاكر عشان تنجح وتجبلى لتر البيبسى
روحيم شكرا لمرورك الجميل وتقبلوا ارق تحياتى