ادخل واحكى واضحك واخرج

**Messi** · 23-02-2009 01:37 AM

مستنين قصه الهروب

**Messi** · 25-02-2009 04:06 PM

مره كنت معزوم عند واد صحبي اسمعلاوى كان عايز يعرف اهله عليا
المهم كان صحبي واخوه واختهم وباباه ومامته وكان معاهم خاله
المهم احنا بناكل عادي وانا اساسا بنكسف من الناس الكبار اللى هى الابهات والامهات والناس دى
المهم قلتلهم تسلم ايديكم علي الاكل لقيت باباه بيقولي بالهنا والشفا
قلتله الله يشفيك وانا معرفش اقول اية اساسا

انا دايما ببرطم بكلام مش مفهوم في مواقف زي دي مش عارف ارد يعنى
لقيت اخو صحبي ميت من الضحك قولتلوا متقلش حاجة والله مش هاجي تاني
المهم بعد شوية جابولي شاي وخلصته بيقولولي هنيا قلتلهم الله يهنيكم لقيتهم كلهم بصوا لبعضهم وزى مابيقولوا لنفسهم مين الواد ده؟
بس العيلة حبتني من الموقفين دول ماتو من الضحك
كان يوم ما يعلم بيه الا ربنا من وقتها بقيت اسال اقول اية واعمل اية

**Messi** · 02-03-2009 02:44 PM

هحكى تانى معلش ع الصداع بس اهو الواحد بيسلى نفسه

امبارح كان عندنا واحد سباك اسمه جمال بس ضارب كيميا وبايظ خالص المهم جمال ده كان بيعمل شويه حاجات كده
جه امبارح الساعه 9 الصبح فعموكوا عز ابويا داخل صحانى فقومت بس مكنتش شايف قدامى وقايم مبهدل بقى وقايم م النوم يعنى
الحج قالى هروح احضر جنازه واجى وخليك مع الراجل قولتله ماشى
روحت للمعلم جمال بقول صباح الخير لقيته بيقولى طيب
كان عاوز طلب فقولتله ثانيه طيب قمت مغير هدومى و عدلت نفسى فدخلت عليه تانى بعد اما غيرت لبسى واتغيرت وقولتله ازيك يا معلم فقالى امال اخوك اللى كان هنا من شويه فين انا عاوزه يروح يجيبلى طلب (افتكرنى اتنين )

قولتله قصدك احمد؟قالى معرفش بس هو كان هنا من شويه قولتله يا عم ده دخل ينام انت عاوز ايه وانا هجيبه قالى على كام طلب كده نزلت جيبتهم وانا فىالطريق قولت انا لازم اشتغله
جيبت الطلبين وحطيتهم فى الشقه اللى تحت وقمت طالع فوق وغير لبسى ولبست جلابيه ونضار الحج ولبست طاقيه بيضه اللى هى بتاعت الصلاه ونزلت شعرى لقدام ودخلت عليه بقوله ازيك يا معلم انت هنا من بدرى فقالى اه وفى طلبين طالبهم من الصبح ومجوش قولتله انت طلبت من مين؟ احمد وللا من سعيد وللا عماد وللا مين قالى معرفش انا طلبت من اتنين اخواتك
مكنتش قادر امسك نفسى م الضحك
قولتله طيب انا سامع سعيد جه تحت اهوه ونزلت جيبت الطلبات ودخلتها له وقولتله سلامو عليكم بقى انا قالى انت رايح فين يا استاذ محدش معايا هنا قولتله يا معلم هلحق صلاه الجمعه بس معلقش سكت
وقومت داخل مبهدل نفسى زى اول مره وناكش شعرى وعامل انى لسه قايم من النوم ودخلت على السباك لقيته بيقولى الله صحى النوم يا عم انت سيبتنى ومسالتش عنى قولتله يا عم مانا بعتلك سعيد قالى اه خلاص
قالى هو انتوا كام ولد قولتله احنا سبعه وللاد تؤام
لقيته رما الشغل من ايده وتنح وبصلى شويه
انا مقدرتش امسك نفسى م الضحك وفضلت اضحك لحد اما الحج جه وانقذ الموقف
كان نفسى اكمل السبع شخصيات بس مقدرتش

**SAW** · 02-03-2009 05:35 PM

ههههههههه

**| **المقصرة في حق الله** ●** · 04-03-2009 04:09 PM

هههههههههههههه

**| **المقصرة في حق الله** ●** · 04-03-2009 04:16 PM

الموقف ده حصل انبارح بس
في معيد عندنا بيدي مساحة المهم الراجل نص كلامه انجليزي وايه بيتكلم بسرعة مش لاحقة اكتب كلمة وراه المهم انا طبعا استحالة اكلم معيد بتكسف يعني

قلت للعيال حد يقوله لراحة محدش قال

حسيت ان الكلام كله بيدخل لوداني مرة واحدة

فمرة واحدة والسكشن هاااااااااااادي
قلت بشمهندس ممكن تتكلم براحة

انا استغربت اني قلت كده؟؟؟؟؟؟؟؟؟ظظ

جه الرد اسرع لا مش ممكن :">:">:">
انا مش مطلوب من اني اشرح وعشان اديكوا فكرة عن الموضوع
انا الشرح مش مسئوليتي
انما انا احل امتحانات بس

ايه اللي حصل ده
طب انا مش قدرت اسيطر على نفسي

هو كمان طلع مرة واحدة كده

**| Mannora ●** · 08-03-2009 12:25 AM

اولا موضوع تحفه وجامد اوى يا احمد.....

وحرام عليك انا موت من الضحك ....

وانطلاقا من تاريخك مع الكلاب احب اكمل الفصل التانى بس معايا

كان الموقف ده فى الامتحانات ويوم امتحان الببلك وبقالى ست ايام عماله اذاكر لما الواحد دماغه ورمت...
وطالعه من بيتنا يوم الامتحان الصبح وعماله اكلم فى نفسى هيجى ايه....طب لو ما افتكرتش فى الامتحان هأعمل ايه....
وماشيه عامله زى الهبله....اصلى بأعز قسم الميكرو اوى

المهم فى وسط الاستغراق ده وانا على اخر الشارع..وشارعنا بأسم الله ما شاء الله الكلاب دى اكتر حاجه بيعملوا تجمعات عندنا فعادى قولت هأعدى عادى ومش هأخف لان الكلاب بتحس بالخوف وعمله نفسى راجل وكده يعنى....
المهم لقيت اتنين جاين ناحيتى عملتى نفسى مش واخده بالى مع انى كنت ميته من الخوف وقلبى وقع فى رجليا اصلى مع الكلاب جبانه اوى المهم...يدوب هما قربوا وعملوا الصوت اياه على رأى ميسى ...وعنيكوا ما تشوف الا النور وصحبتكم قالت يا فكيك ....
وياريت على قد الجرى دا انا فى الصوت ما اتوصاش..
قعدت اصوت زى ما يكزن سلك كهربا مسيكنى.....ولميت عليا امه لا اله الا الله والمشكله انهم كلهم جيرانى وانا البت الدكتوره وليا برستيج فى الشارع ....:">:">
المهم مش اتنيل وواعمل اى حاجه تغطى....لا ...لقيت نفسى مش قادره اخد نفسى ورجلى مش شيلانى ووقعت من طولى والسوقين اتلموا وقعدوا يقولو لا حول الله يارب بنت مين دى ...وشويه قعدوا يقولوا دا كلب يعنى عادى ايه الهيافه دى وكده يعنى....
المهم بعد ما فقت وصحصحت كنت حاسه بأحراج رهيب جدا وكأن جردل ميه وقع على دماغى....المهم ركبت والناس اللى ركبه معيا عماله تبص ليا طول الطريق وتضحك وانا قاعده فى نص هدومى وبقول هو الطريق طول كده ليه .....بجد كان شكلى زباله اوى
وانا راجعه اخر النهار كنت مكسوفه اوى لان كل ما حد يشوفنى يضحك..بجد شكلى كان فظيع....

**Messi** · 08-03-2009 02:01 AM

mannora
*****************
ههههههههههههههههههه
موقف منيل بسبعوميه نيله
ده على كده الواحد برستيجوا لسه كوبس قدام الناس
شكرا منار باشا نورتى

**● **TiTaNiC LoVeR** ●** · 08-03-2009 02:33 AM

انا بقى هحكيلم على موقف حصلى وانا فى الابتدائى
كنت فى مره كنت بلعب بالعجله
وكان قدام البيت كانوا حافرين الشارع العمومى عشان يركبوا مواسير مايه
المهم بقى
جابوا الكراكات وحفروا وبهدلوا الدنيا
واخر النهار ميشيوا العمال
فكان فى ردم بقى كتير على الجنب
فخبتط فى دماغى انى اطلع
فوق الردم ده بالعجله
وانزل بالعجله وانا راكبها
وانا لسه بقول يا هادى وبنزل روحت مقلوب من فوق بالعجله
وقعد اتشقلب تقولوا توم كروز
لو ما وصلت للارض فقوقت وبصيت فى حد شافنى وانا بندلق الدلقه السوده دى
عشان مفيش حد يمسكه عليها ويفضلوا يتريقوا
وملقتش الحمد الله حد
ويادوب بقوم من الارض لاقيت العجله مقسومه نصين الحمد لله
وماشى بعرج