في رحاب الكــــون
يا خالق العرش وحدك قلت كـُـن ليكـــــون
يا رازق الطير برزقك في رحاب الكــــون
يا واهب الخلق رحمه رب يا وهـَّـــــــــاب
إهدي يا رب العِباد والناس منين ما تكـُـون
ــــــــــــــــــــــ
يا واهب الحَب نبته وانت راعيهــــــــــــا
يا حافظ الدنيا بيـِنا وانت حاميهــــــــــــــا
الشمس ماشيه ف مسارها ومنك الأسباب
والمركب انت بإرادتك اللي ترْسيهــــــــا
ـــــــــــــــــــــــ
الدنيا فيها العجب والحب بقى غايـــــــــب
والكـُرْه مالي ربوعها والأمـــــل خايـــب
وانت بدأت الخلايق كلها أحبــــــــــــــاب
لكن تلاقي البشر جوّه الأنا دايـــــــــــــــب
ـــــــــــــــــــــــ
إنت خلقت الطبيعه كامله وموزونـــــــــــه
وتركتها للبشر خلاها مجنونـــــــــــــــــــه
لا منه خد حصِّتـُه ولا لغيرُه ســــــــــــــاب
خلـَّىَ التوازن خلل والدنيا مديونــــــــــــــه
ـــــــــــــــــــــــــ
يا رب عطفك علينا تغيَّر احوالنــــــــــــــا
وارضى علينا عشان يوم ينصِلِح حالنـــــا
والعاصي فينا ارحمُه وحنـِّن عليه لو تاب
ومن كنوز قـُدرتك تِعطف وتهديلنـــــــــــا
*****************
