الحلقه الثالثه من يوميات مشرف منحوس فى منتدى

يلا أحسن على الحلقه التالته اللى كلها فضايح دى

ميزو: ياجماعة أنا عايزكم تفتحوا عينيكم وتراقبوا الناس كويس.....الفترة دى حرجة وحساسة فى تاريخ المواطنة.... وعايزكم كمان تخزقوا عينين أى واحد يقول على المكان ده (منتدى)...المكان ده إسمه (فكك منى )
دلوقتى تقدروا تتفضلوا على مكاتبكم جتكوا الغم ...........

اسباى هامسا فى أذن أحمد : إيه العبارة...مال البيج بوس كارف علينا كده ليه ....اللى يسمعه يفتكر إننا بنعبى فى فلوس من ورا الشغلانة دى .... أنا الشغلانة دى لولا إنها عاملالى بريستيج ولا كنت قبلتها .... إنت عارف إنى كان نفسى من زمان أبقى مشرف إن شالله حتى على دورة ميه

احمد: عارف يا اسباى أنا زيك بالظبط ...إنت عارف إنى كان نفسى أدخل كلية الشرطة عشان تبقى فى إيدى سلطة بس مجموعى فى الثانوية العامة طلع كبير غصب عنى فاضطريت أدخل كلية الهندسة وبعدين كمان مكنتش حتقبل فى الشرطة عشان عندى تقوس فى الساقين

شيماء : ممكن نبطل رغى شوية ونشتغل شويتين....الجدع اللى كاتب موضوع إيه الفايدة من ورا المنتدى ده عايزين نحول أوراقه لفضيلة المفتى

سيد : هوه المفتى فاضى لنا يا شوشو
المفتى بيحضر من دلوقتى علشان هلال شهر ذى الحجة....إنتى عارفه إن فيه فرق يوم بينا وبين السعودية.....إحنا نصفى الجدع ده من سكات...فى العزومة الجاية فى المول يكون احمد وسباى راكبين موتوسيكل ومعاهم سمسم ....وأول ما يشوفوه داخل المول يصفوه ويهربوا

تالبا: وأنا عليا هجيب لكم صورته.....هخترق جهاز الكمبيوتر بتاعه وأدعبس فيه على صورة له يكون مخزنها على الجهاز

نهال: أنا ضد التصفية الجسدية....إحنا نعمل معاه زى ما عملوا مع صدام حسين ..... يعنى وهوه رايح على المول نخطفه فى عربية ونطلع بيه عالطريق الصحراوى ياخد اللى فيه النصيب ولا من شاف ولا من درى

ضــى : تعالوا بسرعة....الحقونى.....شوفتوا الموضوع ده

يجتمع المشرفون حول ضــى فى فزع متسائلين (موضوع إيه ؟؟)

ضــى : ده موضوع مكتوب فى صفحة الحوادث فى أخبار اليوم مش هنا فى المنتدى

نهال : ممكن تتكلمى علطول ... أقصر الطرق إلى الحقيقة هى الطريق المستقيم

ضـى : قصدك أقصر الطرق إلى السجن

ينتزع اسباى الجريدة بقرف من يد ضــى قائلا : يختى إنطقى إحنا ناقصينك

يقرأ اسباى المكتوب فى الجريدة بصوت مرتفع: مقتل عاملة نظافه بالمول....مسلحان يطلقان النار عليها ويلوزان بالفرار على موتوسيكل....النيابة تعد بفك غموض الجريمة خلال ساعات

تاليا : يعنى بدل ما نصفى الجدع بتاع إيه فايدة الكتابة فى المنتدى قتلنا الولية الغلبانة دى

أحمد : إنتى يعنى بقيتى عاميه البصر والبصيرة كمان.....إنت مش قلتى هتخترقى الجهاز بتاعه وتجيبى صورته ؟؟؟....الصورة اللى إنتى إديتهانى دى أنا واسباى نسخة منها كانت صورة الست دى....

تاليا: شئ غريب فعلا دى شبهه تمام
بس إيه اللى جاب صورتها على الجهاز بتاعه....لازم ألاقى حل للغز ده

ميزو : لغز إيه وهباب إيه....الله يخيبكم....ده أنا لو معين أرنوب بدالكم كان عمل شغل أنضف من كده....إنتم إيه مشرفين ولا متفرجين

سيد : ياجماعة تاليا مالهاش فى إختراق الأجهزة .... هى بتحب تهول شويه لكن معندهاش فكره... أنا رأيى نجند لنهال وسمسم وضى مقابل مكافأة شهرية ..... خبرتهم كويسة فى المسائل دى

احمد : بلاش سمسم ...لو خدت لها جوز اقلام فى القسم هتعترف علينا كلنا

اسباى : لا حول ولا قوة إلا بالله.....ده أنا عملت فيها رامبو وأول ما شفت الوليه داخلة المول غنيت نشيد الولاء بتاع المنتدى وركعت على ركبى فى وضع الإستنفار وفضيت الرشاش فيها وبعد مالخزنة فضيت قلت لأحمد غطينى على ما أحط الخزنة التانية

نهال: بالمناسبة إيه نشيد الولاء ده يا اسباى

اسباى : (ماما زمانها جايه...جايه بعد شويه...جايبه لعب وحاجات)

ماتركز كدة
ولا اعتبر انك بتعمل دعاية لمنتدى تانى ههههههههههه
ركز وانت بتنقل الموضوع

وبعدين دة كدة مش منتدى
دة كدة منظمة ارهابية
لو كدة يبقى شومان ليه حق يقتلكم كلكم :d:d

واضح أنى بعمل دعايا
:-o

امممممممممم
دعايا من ورايا؟؟

غلطه مطبعيه
وهتتصلح أن شاء الله

اتصلحت خلاص
بس ابقى ركز فى باقى الحلقات

أوكى
يا مونى

هو احنا فى منتدى ولا وسط عصابه مافيا ولا ايه

واضح انها عصابه مافيا
x(